გუშინ, ინგლისურ მასმედიაში საინტერესო ინფორმაცია გავრცელდა. რომან აბრამოვიჩის წასვლის შემდეგ ლონდონის „ჩელსის“ ახალმა მეპატრონეებმა ზამთრის სატრანსფერო აქტიურობის დროს არაერთი ძვირადღირებული მოთამაშე შეიძინეს. ახალმოსულებმა იმედები ვერ გაამართლეს და ჩრდილოლონდონური გუნდი სატურნირო ცხრილის შუაში დამკვიდრდა.
მიმდინარე წლის ზაფხულში „ჩელსის“ დიდი ალბათობით არგენტინელი ფეხბურთის სპეციალისტი მაურისიო პოჩეტინო ჩაიბარებს. მან კლუბის ხელმძღვანელობას სამომავლოდ შესაძენი მოთამაშეების ჩამონათვალი უკვე გადასცა.
გავრცელებული ინფორმაციის თანახმად, „ნაპოლი“ „ჩელსის“ მაროკოელი ფეხბურთელით, ჰაკიმ ზიეჩით ინტერესდება. საპასუხოდ, ლონდონელებმა თვალი ნეაპოლელთა ორ გამორჩეულ ფეხბურთელს, ხვიჩა კვარაცხელიასა და ვიქტორ ოსიმენს დაადგეს. ამ ორიდან ერთ-ერთის გადაბირება მათი პროგრამა-მინიმუმია.
გამოცემა „Mirror“-ის მტკიცებით, „ჩელსი“ ზაფხულში „ნაპოლის“ პრეზიდენტ აურელიო დე ლაურენტისს ორივე ფეხბურთელზე დაელაპარაკება.
ამავე გამოცემის ინფორმაციით, მაურისიო პოჩერტინო სამომავლოდ „ჩელსიში“ მეკარის პოზიციის გაძლიერებასაც აპირებს და გიორგი მამარდაშვილის გვარმაც გაიჟღერა.
ქართველთან ერთად არგენტინელის სიაში დორტმუნდის „ბორუსიას“ მეკარე გრეგორ კობელი, „ბრენტფორდის“ კარის დარაჯი დავიდ რაია და მილანის „ინტერის“ წევრი ანდრე ონანა მოხვდნენ. პოჩეტინო არჩევანს სწორედ ამ ოთხ მეკარეს შორის გააკეთებს.
გამოცემა „The Sun“-ის მტკიცებით, „მანჩესტერ სიტი“ „ნაპოლის“ სამხრეთკორეელი მცველი კიმ მინ-ჯეთი დაინტერესდა. ფეხბურთელის დამატება ყველაზე მეტად პეპ გვარდიოლას სურს.
„მანჩესტერ სიტი“ მზადაა მოთამაშე გამოისყიდოს. მიუხედავად იმისა, რომ „მანჩესტერ სიტი“ დაცვის ხაზში ძალიან კარგადაა დაკომპლექტებული, გვარდიოლა უკანა ხაზის გაძლიერებას მაინც აპირებს.
საინტერესოა „ნაპოლი“ კიმს რამდენად შეელევა. იტალიურმა კლუბმა აზიელი მცველი გასულ ზაფხულს „ფენერბაჰჩედან“ 20 მილიონი ევროს სანაცვლოდ შეიძინა. ამ სეზონში მის ანგარიშზე ყველა ტურნირზე 40 ჩატარებული შეხვედრა და 2 გატანილი გოლია.
გუშინ, იტალიური ფეხბურთის ლეგენდა ფრანჩესკო ტოტიმ ტელეკომპანია DAZN-ის პირდაპირ ეთერში „ნაპოლისა“ და ხვიჩა კვარაცხელიაზე ისაუბრა:
„სრულიად განსხვავებული ფეხბურთელები არიან: ლეაო ფიზიკურად ძლიერი და სწრაფია, კვარა ტექნიკური, ის ყოველთვის მცველზე შეტევაზეა მიმართული, ძნელია იტალიის ჩემპიონატში ასეთი ფეხბურთელის პოვნა.
თავიდან არ მეგონა, რომ „ნაპოლი“ ბოლომდე მისვლას შეძლებდა, მაგრამ მათ ყველა დახოცეს და მსგავსი გუნდი მიმდინარე სეზონში არ ყოფილა. აპლოდისმენტები გუნდს, მწვრთნელს და კლუბის ხელმძღვანელობას ამ გასაოცარი სეზონისთვის“.
ნეაპოლში კი იტალიის ჩემპიონობისთვის ემზადებიან. ნაპოლის 33-წლიანი პაუზის შემდეგ „სკუდეტომდე“ მხოლოდ რამდენიმე დღე აშორებს და შესაძლოა, ჩემპიონობა მიმდინარე კვირის ბოლოსაც გაიფორმოს.
32-ე ტურში „ნაპოლი“ საკუთარ მინდორზე „სალერნიტანას“ თუ დაამარცხებს, ხოლო იმავე ტურში „ლაციო“ სტუმრად „ინტერთან“ ვერ მოიგებს, ხვიჩა კვარაცხელიას გუნდი ჩემპიონი ოფიციალურად გახდება.
„ნაპოლიმ“ შაბათს უნდა ითამაშოს (29 აპრილს) თბილისის დროით 17:00 საათზე, „ლაციომ“ კვირას (30 აპრილს) თბილისის დროით 14:30 საათზე. ნეაპოლში სერია A-ს ხელმძღვანელობას მიმართეს, რომ ორივე თამაში პარალელურად გაიმართოს. ნეაპოლის მუნიციპალიტეტის განცხადებაში აღნიშნულია, რომ საზოგადოებრივი წესრიგისა და უსაფრთხოების დაცვის უკეთ უზრუნველსაყოფად უკეთესი იქნება, თუ „ნაპოლიც“ კვირას ზუსტად იმ დროს ითამაშებს, როდესაც მილანში, „ინტერი“ და „ლაციო“ შეხვდებიან.
გამოცემა „Tuttomercatoweb“-ის ინფორმაციით, იტალიური ფეხბურთის მმართველმა ორგანიზაციამ ნეაპოლელთა ეს მოთხოვნა არ დააკმაყოფილა. ამგვარად, კალენდარი უცვლელი დარჩება: ნაპოლი შაბათს ითამაშებს და დაელოდება „ლაციოს“ მატჩის შედეგს. „სალერნიტანას“ შემდეგ „ნაპოლიმ“ 2 მაისს (სამშაბათს) „უდინეზესთან“ სტუმრად უნდა ითამაშოს, ამიტომაც, ვერ მოხდა სალერნოელებთან მატჩის თარიღის შეცვლა, რადგან „უდინეზესთან“ მატჩამდე მხოლოდ ორი დღე დარჩებოდა. შესაბამისად, კალენდრის სიმჭიდროვიდან გამომდინარე, ყველაფერი უცვლელი დარჩება.
„ნაპოლი“ 33 წელია იტალიის ჩემპიონი არ ყოფილა, სულ კი პირველობა ორჯერ აქვს მოგებული, ორივე დიეგო მარადონას დროს 1987 და 1990 წლებში. „ნაპოლი“ სერია A-ს 78 ქულით ლიდერობს, უახლოეს მდევარ „ლაციოს“ კი 17 ქულით უსწრებს.
ავტორი
