დღეს, თბილისის დროით 23:00 საათზე, ჩემპიონთა ლიგის პირველ მეოთხედფინალურ დაპირისპირებაში, ხვიჩა კვარაცხელიას „ნაპოლი“ სტუმრად „მილანს“ დაუპირისპირდება.
ნეაპოლური კლუბის მთავარ მწვრთნელ, ლუჩანო სპალეტის შეტევაში პრობლემები აქვს, რადგან ვიქტორ ოსიმენის, ჯოვანი სიმეონესა და ჯაკომო რასპადორის თამაში საეჭვოა. ბოლო ორ ვარჯიშზე სპალეტიმ ფორვარდის პოზიციაზე ხვიჩა კვარაცხელია მოსინჯა. არაა გამორიცხული ქართველ ფეხბურთელს ცრუ ცხრიანის პოზიციაზე თამაში მოუწიოს.
ამ შემთხვევაში მარცხენა ფლანგზე მის ადგილს ელიფ ელმასი დაიკავებს, ხოლო მარჯვნივ მატეო პოლიტანო ან ირვინგ ლოზანო ითამაშებს.
სამწუხაროდ ვიქტორ ოსიმენი „ნაპოლის“ განაცხადშიც ვერ მოხვდება. უფრო მეტიც: კლუბის პრეზიდენტმა აურელიო დე ლაურენტისმა ქუჩაში რამდენიმე გულშემატკივარს შეკითხვაზე, ითამაშებს თუ არა ოსიმენი, უპასუხა: „სამწუხაროდ, ის არ არის სათამაშო კონდიციაში. იმედი გვაქვს, რომ 18 აპრილს, „მარადონაზე“ მაინც ითამაშებს“.
აღსანიშნავია, რომ ბოლო დღეების განმავლობაში ნიგერიელ ფეხბურთელს გუნდთან ერთად არ უვარჯიშია, სამაგიეროდ, გუნდთან ერთად ივარჯიშა ჯაკომო რასპადორიმ, და დიდი ალბათობით თამაშს მოახერხებს. თავის მხრივ, ჯოვანი სიმეონეს თამაში ნამდვილად გამორიცხულია.
იმ შემთხვევაში, თუ რასპადორი ვერ შეძლებს პირველივე წუთიდან თამაშს, ლუჩანო სპალეტის ცრუ ცხრიანით მოუწევს ფონს გასვლა. იტალიელმა სპეციალისტმა ბოლო ვარჯიშებზე ამ პოზიციაზე ხვიჩა კვარაცხელია გამოიყენა. არსებობს სხვა ვარიანტებიც: ფორვარდის როლში ირვინგ ლოსანომ ან ელიფ ელმასმა ითამაშოს. იტალიური მედია წერს, რომ ჩრდილომაკედონიელის ცრუ ცხრიანზე გამწესების იდეაზე სპალეტი სერიოზულად ფიქრობს.
„მილანის“ მცველმა ტეო ერნანდესმა გუშინ, „ნაპოლისთან“ მატჩის წინ პრესკონფერენციაზე ისაუბრა:
„ვფიქრობ, რომ მილანში ჩემი კარიერის ყველაზე მნიშვნელოვანი თამაშია. არ ვფიქრობ, რომ ჩემპიონატში 4:0 მოგებული შეხვედრა ამ თამაშზე გავლენას მოახდენს. განსხვავებული თამაში იქნება, „ნაპოლი“ ძლიერია, მაგრამ ჩვენ კარგად მოვემზადეთ. ოსიმენის არყოფნა ჩვენთვის არაფერს შეცვლის, „ნაპოლის“ ბევრი კარგი ფეხბურთელი ჰყავს. ჩემპიონთა ლიგის მოგება შეგვიძლია, მაგრამ ჯერ მხოლოდ ხვალინდელ თამაშზე ვფიქრობთ. ის უნდა გავაკეთოთ, რაც ვიცით, კარგად ვიმუშავეთ, მომავალში არავინ იცის რა მოხდება, მხოლოდ ხვალინდელ მატჩზე ვფიქრობთ“, – განაცხადა ტეო ერნანდესმა.
საკუთარი მოსაზრება გამოთქვა ტურინის „იუვენტუსის“ ყოფილმა გენერალურმა დირექტორმა ლუჩანო მოჯიმ:
„ბოლო პერიოდში „ნაპოლი“ ისეთი კარგი არ იყო, როგორიც ადრე, ოსიმენის გარეშე იგივე გუნდი არ არის. მეორე მხრივ, „მილანი“ ყველაზე ცუდი მეტოქეა, რომელიც შეიძლება შეხვედროდა.
ოსიმენის და კვარაცხელიას გაყიდვა ზაფხულში? ოსიმენის გარეშე „ნაპოლი“ კარგი გუნდია, მასთან ერთად კი დაუმარცხებელი. შეიძლება მის გარეშე კვარაცხელიასაც გაუჭირდეს. თუ ზაფხულში კარი წინადადებები იქნება, ყველაფრის შეფასება შესაძლებელია“, – თქვა ლუჩანო მოჯიმ.
გუშინ, გამოცემა „Milannews“-ის ჟურნალისტმა ლუკა ბიანკინმა ხვიჩა კვარაცხელია და რაფაელ ლეაუ შეადარა:
„ბერლუსკონისაც იგივე შეკითხვა დავუსვი და მან მითხრა, რომ კვარაცხელიას ყველგან თამაში შეუძლია, მაგრამ ლეაუ უფრო შეეფერება „მილანს“, რადგან დიდი ფეხბურთელის თვისებები აქვს. არ გამოვრიცხავ ორ წელიწადში კვარაცხელია ლეაუზე ძლიერი იყოს, მაგრამ ჩემთვის ლეაუს პოტენციალი მომხიბლავია. იმ მენტალობისთვის, რაც პორტუგალიელს აქვს, კარიერის ბოლოს მასზე იტყვიან, რომ თავისი პოტენციალის 60% გამოავლინა და არა 95%, ხოლო კვარაცხელიას შემთხვევაში ალბათ ამას არ იტყვიან. ლეაუზე ფსონის გაკეთება უფრო მიმზიდველია, თუმცა ფაქტი ფაქტად რჩება, რომ ქართველმა მიმდინარე სეზონში უკეთ ითამაშა“, – განაცხადა ლუკა ბიანკინმა.
