“ოცნება”: “არ აღიარებენ, წავლენ ციხეში!” ოპოზიცია: “ვერ შეგვაშინებენ!”

“ძლიერი საქართველოს” ლიდერები ბადრი ჯაფარიძე და მამუკა ხაზარაძე საკუთარ ოფისში დააკავეს _ ორივე მათგანს სასამართლომ 8 თვით პატიმრობა შეუფარდა.

ბადრი ჯაფარიძისა და მამუკა ხაზარაძის წინააღმდეგ საქმე აღძრული იყო “სისხლის სამართლის კოდექსის” 349-ე მუხლით, რაც “საქართველოს პარლამენტის დროებითი საგამოძიებო კომისიის მოთხოვნის შეუსრულებლობას” გულისხმობს. მათ ამ საქმეზე 50 000-50 000 ლარიანი გირაო ჰქონდათ შეფარდებული, რომელიც რამდენიმე ოპოზიციონერი პოლიტიკოსისგან განსხვავებით, გადაიხადეს.

მსგავს საქმეზე 7-თვიანი პატიმრობა უკვე მიუსაჯეს ოპოზიციონერ პოლიტიკოსს ზურა ჯაფარიძეს, “კოალიცია ცვლილებისთვის” ლიდერს, რომელიც უკვე დაპატიმრებული იყო, რადგან არ გადაიხადა გირაო.

“როდესაც ადამიანი სჩადის კანონდარღვევას, მით უმეტეს, სისხლის სამართლის დანაშაულს, ბუნებრივია, იქნება რეაგირება _ პარლამენტს არ აღიარებენ, წავლენ ციხეში!” _ ასე უპასუხა პრემიერ-მინისტრმა, ირაკლი კობახიძემ ჟურნალისტების შეკითხვას, რომელიც “კოალიცია ცვლილებისთვის” ლიდერის, ზურაბ ჯაფარიძისთვის პარლამენტის საგამოძიებო კომისიის სხდომაზე გამოუცხადებლობის გამო, 7 თვით თავისუფლების აღკვეთას და 2 წლით თანამდებობის დაკავების აკრძალვას შეეხება.

როგორც კობახიძემ აღნიშნა, როდესაც საგამოძიებო კომისიას, მის თავმჯდომარეს აქვს კითხვები, ყველა არის ვალდებული პატივის სცეს ქვეყნის კონსტიტუციას.

საგამოძიებო კომისიის თავმჯდომარემ თეა წულუკიანმა “ლელოს” ლიდერების დაკავებაზე ასეთი კომენტარი გააკეთა:

“არის გამოთქმა, რომ მარტო იდიოტები არ იცვლიან აზრს. ხოდა, ეს ჩემთვის მნიშვნელოვანი ანდაზაა. მე მგონია, რომ ახლა, როცა ხაზარაძე არის დაბარებული და უკვე მისჯილი აქვს და არის საპატიმროში, მას არაფერი ხელს არ უშლის, რომ გადაიფიქროს და ჩაერთოს კომისიას იმიტომ, რომ ის 30-ში არის, ორშაბათს დაბარებული. ამიტომ, ჩვენ წინასწარ… იმიტომ, რომ პირველად ასე მოიქცა, ეს არ ნიშნავს, რომ მეორედაც ადამიანი ისევე მოიქცევა.

მე იმის თქმა მინდა, რომ მათთვის ნათელი იყო, რაც მოხდებოდა, ანუ ჩვენი მხრიდან გადაგზავნა.

თუ საკნიდან, თუ საპატიმროდან გვარამია, ან ხაზარაძე ორშაბათს არ ჩაერთვებიან, რა თქმა უნდა, არავისთვის სიურპრიზი არ იქნება ალბათ, რომ ჩვენ ჩაგვერთვება ვალდებულება, რომ კვლავ გადავაგზავნოთ ეს მეორე არგამოცხადების საქმე პროკურატურაში“, _ თქვა თეა წულუკიანმა.

საკითხის შეფასებისას “ლელო _ ძლიერი საქართველოს” ლანჩხუთელი ლიდერი გოჩა ჯანაშია ამბობს, რომ “საგამოძიებო კომისიის მიზანი პოლიტიკოსების ციხეში გამომწყვდევაა, თუმცა, პარტიის ლიდერების დაპატიმრება მათ პოლიტიკურ მიზნებზე გავლენას ვერ მოახდენს“.

ჯანაშიას თქმით, “მამუკა ხაზარაძე და ბადრი ჯაფარიძე პარტიის ლიდერები არიან და მიიჩნევენ, რომ ეს პარლამენტი არალეგიტიმურია“:

“პრემიერმა პირდაპირ განაცხადა, რომ დავიჭერთ ყველა იმ ადამიანს, ვინც პარლამენტის ლიგიტიმაციას არ მოახდენსო. ე. ი. მე თუ განვაცხადე, რომ არ  მიმაჩნია პარლამენტი ლეგიტიმურად, სრული უფლება აქვთ, დამიჭირონ.

მამუკა ხაზარაძე და ბადრი ჯაფარიძე პარტიის ლიდერები არიან და მიიჩნევენ, რომ ეს პარლამენტი არალეგიტიმურია.

ეს კომისია ნონსენსია _ იქ არ არის წარმოდგენილი ოპოზიციის კვოტა, რომელიც ამ კომისიის დაკომპლექტების საფუძველია და რაც არ უნდა იძახოს “ქართულმა ოცნებამ“, რომ ეს კომისია ლეგიტიმურია, ეს არის მექანიზმი, რომ პოლიტიკოსები და ლიდერები ციხეში გამოამწყვდიონ.

კომისია იხსენებს წლების წინ მომხდარ მოვლენებს, რომლებზეც, წესით, გამოძიება უკვე ჩატარებული და დამნაშავეც გამოვლენილი უნდა იყოს, მაგრამ თავიდანვე იცოდნენ ,რომ პოლიტიკოსები არ მივიდოდნენ კომისიაზე და კონტრარგუმენტად შეცვალეს კანონი, რომ არმისვლის შემთხვევაში, ციხე იყოს პასუხი; არსებული სასამართლოს ფონზე კი დაპატიმრება ჩვეულებრივ ამბად იქცა.

ერთი რამ ვიცი _ ამით ისინი ვერ შეგვაშინებენ. ჩვენი პარტია გააგრძელებს იმას, რაც აქამდე გვქონდა დაწყებული“, _ ამბობს გოჩა ჯანაშია.

პოლიტიკოსების დაკავებას გამოეხმაურა “საქართველოს ახალგაზრდა იურისტთა ასოციაცია“.

“საია ეხმიანება ოპოზიციური პოლიტიკური პარტიების წარმომადგენლების _ ზურაბ გირჩი ჯაფარიძის, მამუკა ხაზარაძისა და ბადრის ჯაფარიძის მიმართ დროებითი საგამოძიებო კომისიის მოთხოვნის შეუსრულებლობის საფუძვლით მიმდინარე სისხლის სამართლის საქმეებზე თბილისის საქალაქო სასამართლოს მოსამართლეების, ჯვებე ნაჭყებიას და ზვიად შარაძის, მიერ გამოტანილ განაჩენებს და თავისუფლების აღკვეთის სახით შეფარდებულ მკაცრ სასჯელს.

2025 წლის 21 მაისს საია–მ საზოგადოებას წარუდგინა დასაბუთებული სამართლებრივი მოსაზრება იმასთან დაკავშირებით, თუ რატომ არ უნდა შეფასებულიყო საგამოძიებო კომისიაზე გამოუცხადებლობა სისხლის სამართლის დანაშაულად, რაზე დაყრდნობითაც, ორგანიზაციას მიაჩნია, რომ მოცემულ შემთხვევებში ადგილი აქვს ავი განზრახვით სისხლის სამართლის მექანიზმების გამოყენებას ოპოზიციონერი პოლიტიკოსების მიმართ. აღნიშნულს, ასევე, ამყარებს განაჩენის გამოცხადებამდე ირაკლი კობახიძის მიერ გაკეთებული განცხადებაც, რომლის მიხედვითაც, ის, ვინც არ აღიარებს ამ პარლამენტს, “წავლენ ციხეში“.

როდესაც ხელისუფლება სისხლის სამართლის მექანიზმებს ინსტრუმენტად იყენებს განსხვავებული აზრის გასაჩუმებლად, კრიტიკოსების დასაშინებლად ან პოლიტიკური კონკურენციის აღმოსაფხვრელად, ასეთი ქმედებები არღვევს, არა მარტო ინდივიდუალურ უფლებებს, არამედ, ძირს უთხრის დემოკრატიული პროცესებისთვის საჭირო ფუნდამენტებს.

დამატებით, მივუთითებთ, რომ, ბრალდებულთათვის ბრალად წარდგენილი სისხლის სამართლის კოდექსის 349-მუხლის შემადგენლობა განეკუთვნება ნაკლებად მძიმე დანაშაულთა კატეგორიას, და თავისუფლების აღკვეთის სახით მაქსიმალურ სასჯელად ითვალისწინებს ერთ წლამდე თავისუფლების აღკვეთას, ხოლო, მოსამართლეს შეეძლო ალტერნატიული სასჯელის სახის ჯარიმის გამოყენებაც, რაც არც ერთ შემთხვევაში არ მომხდარა.

ასევე, მიუხედავად იმისა, რომ კანონმდებლობაში არსებობს ხარვეზი, კერძოდ, დროებითი საგამოძიებო კომისიის კანონიერი მოთხოვნის შეუსრულებლობა შეიძლება შეფასდეს, როგორც სამართალდარღვევად, ისე დანაშაულად, სასამართლოს არ უსარგებლია მისთვის მინიჭებული უფლებამოსილებით, მიემართა საკონსტიტუციო სასამართლოსთვის.

საია 21 მაისს წარდგენილ მოსაზრებაში მიუთითებს, რომ, იმის გათვალისწინებით, რომ კანონმდებელი არ განსაზღვრავს, თანაბარი იურიდიული ძალის მქონე ნორმატიულ აქტებში იდენტური ჩანაწერების არსებობის შემთხვევაში რომელს ენიჭება უპირატესობა, მნიშვნელოვანია საკითხის შეფასება მოხდეს საქართველოს კონსტიტუციის და საერთაშორისო სტანდარტების შესაბამისად და დარღვევის შემთხვევაში გამოყენებული ყოფილიყო ის ნორმა, რომელიც ნაკლებად ზღუდავს პიროვნების თავისუფლებას.

საზოგადოებას შევახსენებთ, რომ ორგანიზაცია ჯერ კიდევ აღკვეთის ღონისძიების ცვლილების ეტაპზე კრიტიკულად აფასებდა რიგი ბრალდებულების, მათ შორის, ზურაბ გირჩი ჯაფარიძის, მიმართ აღკვეთის ღონისძიების სახით შეფასებული გირაოს პატიმრობით ცვლილებას და მიიჩნევდა, რომ მხოლოდ გირაოს სახით შეფარდებული თანხის გადაუხდელობა არ უნდა შეფასებულიყო გირაოს პირობის შეუსრულებლობად. შესაბამისად, მაშინ, როდესაც ბრალდებული პირები ცხადდებოდნენ სასამართლოში და თავს არ არიდებდნენ მართლმსაჯულების განხორციელებას, მათ მიმართ არ არსებობდა ყველაზე მკაცრი აღკვეთის ღონისძიების პატიმრობის გამოყენების საფუძვლები“, _ აცხადებს საქართველოს ახალგაზრდა იურისტთა ასოციაცია.