„აღნიშნული კანონპროექტი იქმნება იმისთვის, რომ ახალ პრეზიდენტს, სალომე ზურაბიშვილს საშუალება ჰქონდეს, ყოველგვარი კონკურსის გარეშე და საკუთარი გემოვნების მიხედვით დააკომპლექტოს პრეზიდენტის ადმინისტრაცია“, _ აღნიშნა „გურია ნიუსთან“ იურისტმა ლევან ალაფიშვილმა „საჯარო სამსახურის შესახებ” კანონში დაანონსებული ცვლილებების შეფასებისას, რომლის მიხედვით, პრეზიდენტის ადმინისტრაციის თანამშრომლები ადმინისტრაციული ხელშეკრულებით დასაქმებულ პირებად ჩაითვლებიან.
იურისტის თქმით, მმართველი პარტია კანონს საკუთარ პოლიტიკურ ინტერესებს არგებს, რაც სახიფათო ტენდენციაა. როგორც იურისტი აღნიშნავს, ამ ინიციატივით საერთაშორისო საზოგადოება აუცილებლად დაინტერესდება, რაც მმართველი პარტიის პოლიტიკურ მომავალზე დადებითად არ აისახება.
„იკვეთება კანონისადმი ძალიან სახიფათო დამოკიდებულება, როცა მმართველი პარტია კანონს საკუთარ პოლიტიკურ ინტერესებს არგებს. პრობლემა კანონისადმი დამოკიდებულებაშია. ამ საკითხით საერთაშორისო პარტნიორები აუცილებლად დაინტერესდებიან, რაც მარტივად არ ჩაივლის.
ყოფილი პრემიერის, გიორგი კვირიკაშვილის დროს, ევროკავშირი იყო ის ორგანიზაცია, რომლის უშუალო ჩართულობით შემუშავდა საჯარო სამსახურის სტრატეგია, სამოქმედო გეგმა და შემდგომ კანონი, რომლის ამოქმედება „ქართულ ოცნებას“ საკონსტიტუციო უმრავლესობის პირობებში არ უნდოდა, რადგან კანონი სუბიექტური გადაწყვეტილების მიღების საშუალებას არ იძლეოდა.
2016 წლის კი „ქართული ოცნების“ მთავრობამ ყველაფერი გააკეთა იმისთვის, რომ აღნიშნული კანონის ამოქმედება გადაევადებინა, რაც, ბუნებრივია, საერთაშორისო საზოგადოებაზე დადებითაც არ აისახა“.
კითხვაზე _ ვინ შეიძლება იყოს აღნიშნული კანონპროექტის რეალური ინიციატორი? _ ალაფიშვილი გვპასუხობს, რომ კანონში ასეთი სახით ცვლილებების გახორციელება მხოლოდ სალომე ზურაბიშვილს შეიძლება აწყობდეს.
„კანონპროექტის ერთ-ერთი ინიციატორისგან რაც მოვისმინე, დამრჩა შთაბეჭდილება, რომ თვითონაც არ იცოდა, რაზე ჰქონდა ხელი მოწერილი. სხვა შემთხვევებიც გვინახავს, როდესაც პარლამენტარებმა არც კი იციან, რაზე აწერინებენ ხელს. არ გამოვრიცხავ, რომ ეს შემთხვევაც ანალოგიური იყოს. ფაქტია, რომ კანონპროექტის მიღება შეიძლება მხოლოდ ახლად არჩეულ პრეზიდენტს აწყობდეს“, _ აღნიშნა ალაფიშვილმა.
„საჯარო სამსახურის შესახებ“ კანონში ცვლილებების ინიციატორები პარლამენტის დეპუტატები _ გურამ მაჭარაშვილი და რატი იონათამიშვილი არიან.
