„გურია ნიუსს“ შერიგებისა და სამოქალაქო თანასწორობის საკითხებში ყოფილი სახელმწიფო მინისტრი პაატა ზაქარეიშვილი ესაუბრა.
_ ბატონო პაატა, საპრეზიდენტო არჩევნების მეორე ტურამდე მმართველი პარტია, საზოგადოების გულის მოგების მიზნით, გარკვეულ პოლიტიკურ კომპრომისებზე წავიდა, მათ შორის, „ქართულმა ოცნებამ“ პარლამენტიდან კანაფის კულტივაციის შესახებ კანონპროექტი უკან გაიწვია და ყოფილ მთავარ პროკურორ ოთარ ფარცხალაძეს ბრალი წარუდგინა.
როგორ ფიქრობთ, „ოცნების“ მხრიდან ახლა განხორციელებული „დათმობების პოლიტიკა“ ამომრჩეველის განწყობაზე რაიმე გავლენას მოახდენს?
_ “ქართული ოცნება“ ძალიან რთულ ვითარებაშია, თუმცა კარგია, რომ ასეთი ნაბიჯების გადადგმა დაიწყეს. ასე რომ არ მოქცეულიყვნენ, უარესი იქნებოდა და მეორე ტურს აუცილებლად წააგებდნენ. კომპრომისები არ არის გარანტია, რომ არჩევნების მეორე ტურში გაიმარჯვებენ, მაგრამ მოსახლეობის გარკვეული ნაწილის გულს ნამდვილად მოიგებენ.
„ქართულ ოცნებას“ ნუ ექნება იმის ილუზია, რომ არჩევნები, მაინცდამაინც, მათი გამარჯვებით დასრულდება. წაგებასაც უნდა შეეგუონ, ხელისუფლებაში ორი წელი იქნებიან და ამ დროის განმავლობაში ამომრჩევლებს აჩვენონ, რისი გამკეთებლები არიან.
საპრეზიდენტო არჩევნებში სალომე ზურაბიშვილმა რომც გაიმარჯვოს, „ქართული ოცნება“ უკვე დამარცხებულია, რადგან ლეგიტიმაცია აღარ ექნება. არჩევნების დღეს ხალხი გამოვა და ხმას მისცემს არა „ქართული ოცნებას, არამედ მიხეილ სააკაშვილის წინააღმდეგ დააფიქსირებს საკუთარ განწყობას, რაც სხვადასხვა რამეა.
არჩევნების გაყალბება დაუშვებელია. „ქართულ ოცნებისთვის“ გაყალბება დამარხვის ტოლფასია, თუ ასე მოხდა, ვადამდელი არჩევნები გარდაუვალი იქნება. ნუ გადააყოლებენ ვითომ დამოუკიდებელ კანდიდატს, სალომე ზურაბიშვილს, თავის ბედს და საბოლოო ჯამში, საქართველოს.
_ “ქართული ოცნება_დემოკრატიული საქართველოს“ თავმჯდომარე ბიძინა ივანიშვილი საპრეზიდენტო ინსტიტუტის ოპოზიციისთვის დათმობასაც აპირებდა. ახლა, როცა „ძალა ერთობაშიას“ საპრეზიდენტო კანდიდატის გრიგოლ ვაშაძის გამარჯვების შანსი საკმაოდ მაღალია, ხელისუფლება სამოქალაქო ომზე გვესაუბრება. ქვეყანას „ოცნება“ მართავს და ასე რამ შეაშინა მმართველი პარტია?
_ ეს ნიშნავს, ამ ქვეყნის ბატონ-პატრონად თავს ვერ გრძნობენ. „ქართული ოცნება“ არ ელოდა, რომ ოპოზიცია ასეთ წარმატებას მიაღწევდა, რაც მათ სისუსტეზე და არაკომპეტენტურობაზე მეტყველებს. ბიძინა ივანიშვილი დარწმუნებული იყო, რომ სალომე ზურაბიშვილი პირველივე ტურში გაიმარჯვებდა და გრიგოლ ვაშაძეს ამხელა მხარდაჭერა არ ექნებოდა, ამიტომ ვეძახი მას ფარისევლურ პარტიას. გული მწყდება, რომ ფარისევლობით უნდოდათ გაეტანათ სიტუაცია, რაც არათუ მე, არამედ არავინ აპატია.
დღეს მმართველი პარტიის ხელშია ძალაუფლება, როგორც ჩანს, დაავიწყდათ, რომ საქართველო საპარლამენტო რესპუბლიკაა, სადაც საკონსტიტუციო უმრავლესობით მოვიდნენ ხელისუფლებაში.
„ქართული ოცნება“ საკუთარი ისტერიკით ოპოზიციის კიდევ უფრო აძლიერებს. როცა ძაღლი გრძნობს, რომ მისი გეშინია, კიდევ უფრო აგრესიული ხდება. დღეს ოპოზიცია გრძნობს, რომ „ქართულ ოცნებას“ მისი ეშინია, რაც კიდევ უფრო აძლიერებთ.
„ქართული ოცენება“ დამშვიდეს, დაწყნარდეს, არც დამარცხებაა ტრაგედია. თუ დამარცხდებიან, ოპოზიციურ კანდიდატს გამარჯვება მიულოცონ. თავისი საქმე მშვიდად და თანმიმდევრულად აკეთონ.
_ „დოიჩე ველესთვის“ მიცემულ ინტერვიუში გრიგოლ ვაშაძე ამბობს, რომ თუ დასჭირდა, ქუჩაში 50 ან 100 ათას მოქალაქეს გამოიყვანს. საპრეზიდენტო კანდიდატი საკუთარ ძალაუფლებაზე უსვამს ხაზს, თუ გაპრეზიდენტების შემთხვევაში, პირდაპირ დესტაბილიზაციას აანონსებს?
_მაშინ ქვეყანა არ გვქონია! გამოდის, ექვსი წელის განმავლობაში „ქართული ოცნება“ ხელისუფლებას აშენების ნაცვლად, ანგრევდა. იმ შემთხვევაში, თუ ისეთი უუნარო ინსტიტუტის ხელმძღვანელს, გრიგოლ ვაშაძეს შეეძლება ამ რაოდენობით ხალხის გარეთ გამოყვანა, ყველაფრის ღირსი ვყოფილვართ.
ქართველმა ხალხმა 2012 წელს „ნაციონალური მოძრაობა“ დასაჯა, 6 წლის თავზე_ „ქართული ოცნება“. ქართველმა ხალხმა უკეთ იცის, რა უნდა, თუ ხალხი ვაშაძეს ქუჩაში გამოჰყვა, ესე იგი, არეულობა სურს.
_ ბოლო კვირების განმავლობაში, საზოგადოებამ პარტიის ლიდერის ბიძინა ივანიშვილის ორი ურთიერთგამომრიცხავი განცხადება მოისმინა. ივანიშვილმა ქვეყნის აღმშენებლობის შესახებ ნათქვამი სიტყვები მაშინ უარყო, როცა მეორე ტურში განცდილი წარუმატებლობა არსებულ მძიმე სოციალურ-ეკონომიკურ მდგომარეობას დააბრალა, რაც საზოგადოებისთვის კარგა ხანია ცნობილი იყო. როგორ ფიქრობთ, ბიძინა ივანიშვილი ქვეყანაში არსებულ მძიმე ვითარებას საპრეზიდენტო არჩევნების პირველ ტურამდე ვერ ამჩნევდა?
_ არ სჯეროდა. გარშემო ფარისევლები, მლიქვნელები ჰყავს, რომლებიც მხოლოდ საკუთარ თავზე ფიქრობენ. უქმნიდნენ ილუზიებს, რომ საპრეზიდენტო არჩევნებში 27 % აქვს ოპოზიციასო, ბიძინა ივანიშვილს დიდ პატივს ვცემ და გული მწყდება, რომ ასეთ დღეში ჩაიგდო თავი.
როცა მის გარშემო ნამდვილი გამოცდილი პოლიტიკოსები იყვნენ, რომლებიც გაკრიფა, რა მიიღო შედეგად? მლიქვნელები, ფარისევლები, მედროვეები და კარიერისტები, რომლებსაც წარმოდგენა არ აქვთ, რას აკეთებენ, სახელმწიფო საერთოდ ფეხებზე ჰკიდიათ.
ივანიშვილი გადალახავს კომპლექსს და იტყვის, მე შევცდი ამ ხალხთანო?! როგორც თავის დროზე „ნაციონალურ მოძრაობას“ ვაკრიტიკებდი, ისე ვაკრიტიკებ დღეს „ქართულ ოცნებას“. დაფიქრდნენ, დღემდე არ უღიარებიათ, რომ კოალიციის დაშლა დიდი დანაშაული იყო. პარტიები „ნაციონალურ მოძრაობასთან“ გადალაგდნენ და ვხედავთ, როგორ გააძლიერეს.
_ გავრცელებული ინფორმაციის თანახმად, საპრეზიდენტო არჩევნების შემდეგ, შესაძლოა, პარლამენტის თავმჯდომარის იმპიჩმენტის საკითხი დღის წესრიგში დადგეს. როგორ ფიქრობთ, უმაღლესი თანამდებობის პირების პერსონალური გადახალისება აუცილებელია?
_ პარლამენტის თავმჯდომარე და პრემიერ–მინისტრი, რომლებიც გაუგებარია, როგორ მოხვდნენ ამ თანამდებობებზე, არ არის მთავარი. ის პოლიტიკაა მთელი გაუგებრობა, რომელმაც ასეთი ხალხი მოიყვანა ხელისუფლებაში.
რა მნიშვნელობა აქვს, ერთი კობახიძის შეცლას მეორე კობახიძით?! ან ყოფილი „ნაციონალი“ ბახტაძის შეცლას მეორე „ნაციონალი“ ბახტაძით?! „ქართულ ოცნებას“ უნდოდა ძველი გვარდიის გაშვება და მათი სათბურში გაყვანა, რაც არ გამოვიდა.
თუ წყალში არ ჩახტი, ნაპირზე ცურვას ვერ ისწავლი. „ოცნებას“ უნიკალური, გამოცდილი პოლიტიკოსები ჰყავდა. ახლა კი, ე.წ. „ოცნების“ ბიჭებს წარმოდგენა არ აქვთ, რას აკეთებენ პოლიტიკაში.
