„ოცნებას“ გუნდში დაბრაკული ნაცები ჰყავს მოგროვებული, ვნახავ სააკაშვილს როგორ დაიჭერენ“ _სანიკიძე

 „გურია ნიუსს“ „დემოკრატიული მოძრაობა_ერთიანი საქართველოს“  ლიდერი გუბაზ სანიკიძე ესაუბრა.

_ ბატონო გუბაზ, გაერთიანება „ძალა ერთობაშია“ 16 დეკემბერს, სალომე ზურაბიშვილის ინაუგურაციის დღეს, რამდენიმე ქალაქში, მათ შორის, თელავში მასშტაბური აქციის გამართვას გეგმავს. მათი მოთხოვნა რიგგარეშე საპარლამენტო არჩევნების ჩატარება და საარჩევნო კოდექსის ცვლილებაა. მიესალმებით პროტესტის ამგვარი ფორმით გამოხატვას ? და რა შედეგი შეიძლება გამოიღოს ოპოზიციის მიერ დაანონსებულმა საპროტესტო აქციებმა ?

_ ჩვენ ოპოზიციასთან არც გაერთიანებას ვაპირებთ და არც მხარის დაჭერას, რადგან ვფიქრობ, რომ აღნიშნულს პოზიტიური შედეგი არ მოყვება. ინაუგურაციის შემდეგ, სხვა რაღაცებია გადასაწყვეტი. აუცილებელია ოპოზიციის კონსოლიდირება საარჩევნო გარემოსთან დაკავშირებით. ჩვენ საარჩევნო კანონმდებლობის გასწორებას ვითხოვთ. რიგგარეშე საპარლამენტო არჩევნების ჩატარება კი მეორადი მოთხოვნაა, რადგან არჩევნები მოქმედი საარჩევნო კანონმდებლობით რომ ჩატარდეს, იმ შედეგს მივიღებთ, რაც ქოცებისა და ნაცების პარადს ნიშნავს.

_ საზოგადოების გარკვეული ნაწილისთვის მოულოდნელი იყო თქვენი განცხადება, რომელშიც განაცხადეთ, რომ ქართულმა მხარემ მიხეილ სააკაშვილს საქართველოს მოქალაქეობა უნდა დაუბრუნოს. აღნიშნულს აცხადებთ იმ ფონზე, როცა საქართველოს ყოფილმა პრეზიდენტმა მოქალაქეობა თავად დათმო. ალტერნატივას სააკაშვილისთვის მოქალაქეობის მინიჭებაში  რატომ ხედავთ?

_ ორი გამოსავალია, ან სააკაშვილი ჩამოვიდეს  საქართველოში და თუ საჭიროა, დაიჭირონ ან ბიძინა ივანიშვილმა მიატოვოს აღნიშნული საქმე. ეს ამბავი ექვსი წელია გრძელდება და როდესღაც ხომ უნდა დამთავრდეს?! სააკაშვილს მისცენ მოქალაქეობა, ხომ იძახიან მშიშარა არის და ვერ ჩამოვაო?!  როდემდე უნდა იძახოს „ქართულმა ოცნებამ“ სააკაშვილი მოვა და თავებს დაგვაჭრისო?! სააკაშვილი აქ რომ ჩამოვიდეს, ვნახავ, როგორ დაიჭერენ. „ქართული ოცნების“ ყველა წევრი ზოგი წითელ ხიდზე, ზოგი კი სარფში დაიფანტება. „ქართულ ოცნებას“ გუნდში  ნახევარზე მეტი სააკაშვილის მიერ დაბრაკული ნაცები ჰყავს მოგროვებული.

_ პოლიტიკურ წრეებში საუბარია, რომ  2020 წლის საპარლამენტო არჩევნებში მმართველმა პარტიამ, შესაძლოა, ფიასკო განიცადოს და საზოგადოებამ ალტერნატივა კვლავ ოპოზიციაში იპოვოს. პოლიტიკური პარტიების მომავალი მათ მიერ გაწეული შრომის ეფექტურობაზეა დამოკიდებული, თუმცა როგორ აფასებთ, საპარლამენტო არჩევნებში ოპოზიციის  შესაძლო გამარჯვების შანსებს?

_ოპოზიციას ძალიან დიდი შანსი აქვს, რომ საპარლამენტო არჩევნებში გაიმარჯვოს. თუ არჩევნებს ხელისუფლება გააყალბებს, რევოლუცია მოხდება. მორჩა და გათავდა, საქართველოში  სომხური ვარიანტი განმეორდება.

_პოლიტიკურ სივრცეში,  სხვა პარტიებთან შედარებით,  ჩანს ორი ძლიერი ძალა _ „ქართული ოცნება“ და „ნაციონალური მოძრაობა“. ამ ფონზე, საზოგადოებაში არსებობს მოთხოვნილება, რომ ქვეყანაში მესამე ძალა ჩამოყალიბდეს.  როგორ ფიქრობთ, „ქართული ოცნების“ ერთპარტიული მმართველობის პირობებში, პოლიტიკური ელიტა უფრო მრავალფეროვანი არ უნდა გახდეს?

_ ამ ქვეყანაში ვარსკვლავები არ ჩამოცვივდება. ივანიშვილმა ქვეყანა ახალი სახეებით გამოტენა და შეხედეთ, რას ჰგვანან, რისი გამკეთებლები არიან. პოლიტიკურ ასპარეზზე არავითარი ახალი ძალა არ გამოჩნდება. პარტიების დაწყვილება და დაბლოკვა დაიწყება. მგონია, რომ ამ ქვეყანას ძველი და გამოცდილი პოლიტიკური ელიტა სჭირდება, თუ არა და ჰყავდეთ ბიძინა ივანიშვილი, არსად დაეკარგოთ.

_ პარტიის ლიდერმა ბიძინა ივანიშვილმა ქვეყანაში რიგი პრობლემების აღმოსაფხვრელად, ერთი წელიწადი მოითხოვა. დაპირების შეუსრულებლობის შემთხვევაში, როგორ ფიქრობთ, რა ბედი ელის „ქართულ ოცნებას“?

_დაპირებების შეუსრულებლობის შემთხვევაში, „ქართულ ოცნებას“ ძალიან ცუდი ბედი მოელის, რაც არის ისტორიის სანაგვეზე გადაგდება, რომელიც  პოლიტიკოსისთვის და პოლიტიკური პარტიისთვის ყველაზე ცუდი ადგილია. რაც დაემართა სომხეთში „რესპუბლიკურ პარტიას“, ის დაემართება „ქართულ ოცნებას“. ვერ ვხედავ რესურსს იმისას, რომ მმართველი პარტია დაპირებებს შეასრულებს. ბიძინა ივანიშვილმა ერთი წლის განმავლობაში ქვეყნის ფეხზე დაყენების ზღაპრები „ქართული ოცნების“  წევრებს მოუყვეს.

_ ანალიტიკოსები ვარაუდობენ, რომ „ქართულ ოცნებაში“  პარტიაში დაშლის პროცესი უკვე დაწყებულია, რაზეც მმართველი პარტიის წარმომადგენლები გარეთ არ საუბრობენ.  როგორ ფიქრობთ, ახლო მომავალში,  „ქართული ოცნების“ გუნდის დაშლა მოსალოდნელია?

_ რა თქმა უნდა, მოსალოდნელია. „ქართული ოცნების“ წევრებს იდეოლოგია  არ გააჩნიათ. გუნდის წევრებს საერთო ინტერესი არ აქვთ და არც ერთად ჩადენილი დანაშაული აერთიანებთ. რა არის ბიძინას იდეოლოგია, ვინმემ იცის?! მარიხუანას დათესვა და ქვეყნის გაბარიგება. „ქართულმა ოცნებამ“ საკუთარ სახელს რებრენდინგი უნდა გაუკეთოს, ქართული ზღაპარი უნდა დაირქვას. ქვეყანას დღეს მაფია მართავს, რომლის სათავეში ბიძინა ივანიშვილია. მთელი სახელმწიფო სისტემა ერთი კაცის ინტერესებზეა მორგებული.