,,ქართული ოცნების“ ხუთწლიან მმართველობაზე, საკუთარ პოლიტიკურ ნაბიჯებზე, საქართველოში არსებულ პარტიათა შორის ძალთა გადანაწილებაზე ,,გურია ნიუსს“ მმართველი გუნდის ყოფილი წევრი, პოლიტოლოგი მამუკა არეშიძე ასეუბრა.
_ ბატონო მამუკა, როგორ აფასებთ ,,ქართული ოცნების“ ხუთწლიან მმართველობას?
_,,ქართული ოცნების“ პირობებში რაღაცები გაკეთდა, რაღაცები არ გაკეთდა. დაპირებების გამცემთა შორის მეც ვიყავი და გული ძალიან მწყდება, რომ ის დაპირებები, რომლებიც მე გავეცი, არ შესრულდა. 2012 წელს წარდგენილი ვიყავი გარდაბნის რაიონში ,,ქართული ოცნებიდან“ მაჟორიტარობის კანდიდატად, თუმცა, ვერ გავიმარჯვე. 2014 წელს ,,ქართული ოცნებიდან“ წამოვედი, რადგან იქ ვერაფერს ვაკეთებდი, ამიტომ ჩემი ყოფნა არ იყო საჭირო.
– გარდაბნის რაიონი ახსენეთ, ამ რაიონში დაპირებები ახლაც შეუსრულებელია?
– მანამდე რა უბედურებაც ტრიალებდა გარდაბნის რაიონში, ის უბედურება ტრიალებს ახლაც, არაფერი შეცვლილა. რასაც საზოგადოებას ვპირდებოდით _ მასშტაბური სამუშაო ადგილების შექმნას, განვითარებად ინდუსტრიასა და მრეწველობას არ შესრულდა, რაც უამრავმა ფაქტორმა განაპირობა. მათ შორის, სწორად ვერ შეფასდა საქართველოში არსებული ვითარება. არსებობს სუბიექტური გარემოებები, მსოფლიო ეკონომიკური კრიზისი და სხვა.
– გავრცელებული ინფორმაციით, ,,ქართული ოცნების“ საპრეზიდენტო კანდიდატი ბიძინა ივანიშვილი იქნება. ივანიშვილი, თავის მხრივ, აცხადებს, რომ პოლიტიკაში კატაკლიზმებისა და ხელისუფლების უზურპაციის შემთხვევაში დაბრუნდებოდა…
– ეჭვი მეპარება, რომ ბიძინა ივანიშვილმა საპრეზიდენტო არჩევნებში მიიღოს მონაწილეობა, მაგრამ თუ კენჭი იყარა, ეს იმას ნიშნავს, რომ ქვეყანაში მიმდინარე პროცესებზე ღიად იქნება პასუხისმგებელი. მიუხედავად იმისა, რომ პრეზიდენტის პოსტი მხოლოდ და მხოლოდ მედიატორის ფუნქციას ასრულებს, ვფიქრობ, რომ პრეზიდენტად გახდომის შემთხვევაში, ქვეყნის პროცესების ძირითადი წამმართველი პირი იქნება.
– როგორ ფიქრობთ, გიორგი მარგველაშვილი მიიღებს საპრეზიდენტო არჩევნებში მონაწილეობას?
– რაც შეეხება მარგველაშვილს, ეჭვი მეპარება, საპრეზიდენტო არჩევნებში მეორედ ჩაერთოს. შესაძლებელია, რომელიმე ოპოზიციური ძალა მოელაპარაკოს, მაგრამ მას საპრეზიდენტო არჩევნებში გამარჯვების შანსი, პრაქტიკულად, არ აქვს.
– იმ ფონზე, როცა არ ჩანს მესამე ძალა. რომელიც საზოგადოების მხარდაჭერას მოიპოვებს, მიგაჩნიათ თუ არა, რომ ,,ქართული ოცნების“ მიერ წარდგენილი ნებისმიერი კანდიდატი უალტერნატივო იქნება?
-არ ვიცით, როგორი ტიპის კანდიდატები გამოჩნდებიან ასპარესზზე. შესაძლოა, საზოგადოებისთვის მოსაწონი კანდიდატი გამოჩნდეს, რომელიც კონკურენციას გაუწევს ,,ქართული ოცნების“ კანდიდატს. გავიხსენოთ მერის არჩევნები, როდესაც ელისაშვილმა საზოგადოების სერიოზული მხარდაჭერა მოიპოვა. თუმცა, ამ ეტაპზე ჩანს, რომ ოცნების კანდიდატი უალტერნატივო იქნება.
_ დაპირებებების შეუსრულებლობის პირობებში, რატომ ფიქრობთ, რომ ,,ქართული ოცნების“ მიერ წარდგენილი საპრეზიდენტო კანდიდატი უალტერნატივო იქნება?
-გარკვეული პოტენციალი მაშინაც არსებობდა და ახლაც არსებობს, უბრალოდ, ზოგიერთი ჩინოვნიკის უტვინო საქციელმა და პროფესიონალიზმმა ეს პოტენციალი უკან დაწია. ამ ხელისუფლების ქმედება ბევრად უფრო სწორი და გამართლებულია, ვიდრე წინა ხელისუფლების. აბსოლუტურად მიუღებელია ,,ნაციონალური მოძრაობის“ პოლიტიკური ნაბიჯები საგარეო და შიდა პოლიტიკის თვალსაზრისით, თუნდაც ნაბიჯები, რამაც 2008 წლის ომი გამოიწვია.
– ელისაშვილი ახსენეთ, მან გარკვეულწილად თქვა, რომ საპრეზიდენტო არჩევნებში მიიღებს მონაწილეობას. როგორ ფიქრობთ, რა შანსები აქვს მას?
-ელისაშვილს საპრეზიდენტო არჩევნებში გამარჯვების არავითარი შანსი არ აქვს. მერის არჩევნებში მას ჰქონდა გარკვეული შანსები, მაგრამ საპრეზიდენტოში მისი შედეგები სახარბიელო არ იქნება. მერის არჩევნების პერიოდში საზოგადოებამ ელისაშილს მხარი იმიტომ დაუჭირა, რომ წლების განმავლობაში ასოცირდებოდა პიროვნებად, რომელსაც შეუძლია ქალაქის პრობლემების მოგვარება. ელისაშვილი საზოგადოების ცნობიერებაში არ აღიქმება პოლიტიკის სპეციალისტად, მას პოლიტიკის მკეთებლის იმიჯი არ აქვს. სწორედ ეს გახლავთ ძირითადი მიზეზები, რაც მის წარუმატებლობას განაპირობებს საპრეზიდენტო არჩევნებში.
