„ჩემ მიერ გაკეთებული განცხადება იმის შესახებ, რომ „ქართულ ოცნებას“ ოდიოზური მოსამართლეების გაყვანის შემთხვევაში დავტოვებ, ძალაში რჩება“, _ აღნიშნა „გურია ნიუსთან“ საპარლამენტო ფრაქცია „ქართული ოცნება-სოციალ-დემოკრატების“ თავმჯდომარის მოადგილე ბექა ნაცვლიშვილმა.
ნაცვლიშვილი მიიჩნევს, რომ მოსამართლეებთან დაკავშირებით პარლამენტის თავმჯდომარის, ირაკლი კობახიძის დამოკიდებულება არაფერს წყვეტს, რადგან მნიშვნელოვანი გუნდის საერთო პოზიციაა.
_ბატონო ბექა, „ქართული ოცნების“ პოლიტსაბჭოს განცხადების გავრცელებამდე, თქვით, რომ მმართველ პარტიას იმ შემთხვევაში დატოვებთ, თუ „ქართული ოცნება“ ოდიოზურ მოსამართლეებს მხარს დაუჭერს. პოლიტსაბჭოს აღნიშნული განცხადება თქვენსა და მმართველ პარტიას შორის საბოლოოდ აღმოჩნდა წყალგამყოფი?
_პოლიტიკური საბჭოს განცხადებას არ ვიზიარებ, გამომდინარე იქედან, რომ ავტომატურად ჩვენ მოვიაზრებით, ნებსით თუ უნებლიეთ, ამ პროცესის მონაწილედ. განცხადება იმის შესახებ, რომ „ქართულ ოცნებას“ ოდიოზური მოსამართლეების გაყვანის შემთხვევაში დავტოვებ, ძალაში რჩება. ჯერ პროცესი დამთავრებული არ არის, პროცესი დასრულდება მაშინ, როცა პროცედურებზე შეთანხმება მოხდება და შემდგომ კენჭისყრა ჩატარდება.
_ბუნებრივია, პროცესები დასრულებული არ არის, მაგრამ პოლიტსაბჭოს განცხადებით თუ ვიხელმძღვანელებთ, ჩანს, რომ ოდიოზური მოსამართლეები მმართველი პარტიის ლიდერებისთვის მიუღებელი ნამდვილად არ არის, თქვენ არ დაგრჩათ ასეთი განცდა?
_მნიშვნელობა არა აქვს ვისთვის არის მიუღებელი და ვისთვის არა. ამ შემთხვევაში, მთავარია რა შედეგს მივიღებთ. როგორც პროცესებს ვუყურებ, შედეგი დადგება ისეთი, როგორიც ჩვენ გვსურს.
_ რატომ ხართ დარწმუნებული, რომ შედეგი თქვენი პოზიციების სასარგებლოდ გადაწყდება? გასაგებია, რომ თქვენ თანამდებობებზე ოდიოზური მოსამართლეების განმწესება არ გსურთ, რასაც, როგორც ჩანს, მაგალითად, პარლამენტის თავმჯდომარე სრულებით არ ეწინააღმდეგება.
_ჩვენ ძალიან ბევრნი ვართ, მხოლოდ უმრავლესობაში ასზე მეტი დეპუტატია, აქედან გამომდინარე, მხოლოდ ერთი ადამიანი ხომ არ წყვეტს ამ ყველაფერს?!
_პარლამენტის თავმჯდომარე ირაკლი კობახიძემ განაცხადა „მოსამართლეები, რომლებიც ცუდ რაღაცებს აკეთებდნენ, ახლა კარგ რაღაცებს აკეთებენო“. ლოგიკურად, რატომ არ უნდა ვიფიქროთ იგივე „ნაციონალურ მოძრაობაზე“?
_მე თავიდანვე ვთქვი, პრობლემის ყველაზე მთავარი საფუძველი, რატომაც აღმოვჩნდით ამ გაუგებრობის წინაშე არის ის, რომ თავის დროზე არ მოხდა პოლიტიკური შეფასება „ნაციონალური მოძრაობის“. ეს რომ მომხდარიყო ამ პრობლემის წინაშე არ დავდგებოდით. ეს ადამიანები თვითონ გააცნობიერებდნენ თავიანთ დანაშაულს და აღარ დადგებოდა ცუდების და კარგების ერთმანეთისგან გარჩევის აუცილებლობა. ზოგადად, ძალიან ცნობილი ფაქტია, როდესაც 2013 წელს მთელი სასამართლო კორპუსი გამოვიდა და ბოდიში მოუხადა ჩინელ ხალხს, მიღებული გადაწყვეტილებების გამო.
_ ისეთი მოსამართლეები, რომლებსაც წინა რეჟიმის მსხვერპლს უწოდებ და მათ მიერ გამოტანილ განაჩენებზე პასუხისმგებლობის მთელ სიმძიმეს წინა რეჟიმს დააკისრებ, ბუნებრივია, ბოდიშს აღარ მოიხდიან. რაც შეეხება, „ნაციონალური მოძრაობის“ პოლიტიკურ შეფასებას, რატომ ვერ განხორციელდა აღნიშნული ქართულ პოლიტიკურ რეალობაში?
_აქცენტი გაკეთდა უფრო რიგი პირების სამართლებრივ დევნაზე და შესაბამისად, სამართლებრივი პასუხის დაყენებაზე პოლიტიკური პასუხისმგებლობის საკითხმა უკან გადაიწია ან საერთოდ ყურადღება არ მიექცა, ამის კულტურა ჩვენ არ გვაქვს, რაც ძალიან სამწუხაროა.
