“იყო “ნაცი”, გახდა “ქოცის” მორიგი სერია _ 2012 წელი, საარჩევნო კამპანია, წითელი მაისურით ავთანდილ სურგულაძე, რომელიც დღეს “ოცნების” მაჟორიტარობის კანდიდატია ჭანიეთში” _ „გურია ნიუსის“ მიერ სოციალურ ქსელში ამ წარწერით გამოქვეყნებულ ფოტოს, რომელიც შესაბამის ფაქტს ასახავდა, დიდი გამოხმაურება მოჰყვა.
„ნახევარზე მეტი „ნაცები“ გაქოცდნენ“; „აი, მესმის ფერისცვალება“; „მედროვეები“ _ ფოტოს მოყოლილ ამ და სხვა კომენტარებს თავად ავთანდილ სურგულაძეც გამოეხმაურა და „გურია ნიუსის“ კოლექტივთან დებატები მოითხოვა:
„ქალბატონებო და ბატონებო! ძალიან გთხოვთ თავი შეიკავეთ უსაფუძვლო განცხადებებისაგან. თუ რაიმე საეჭვო საკითხები გაქვთ ჩემთან მიმართებაში, მზად ვარ დებატებში მოგიწვიოთ მთელი “გურია ნიუსის” კოლექტივი, რათა ნათელი მოვფინოთ საზოგადოებას. ძალიან გთხოვთ თავი შეიკავეთ უაპელაციო განცხადებებისაგან”, _ აღნიშნა სურგულაძემ, რომელიც ჯერ კიდევ მაშინ, როცა კანდიდატად დაასახელეს, ჩვენს სატელეფონო ზარებს არ პასუხობდა.
ეთერში არა, მაგრამ საინტერესო დიალოგი გაიმართა სოციალურ ქსელში. ჩვენს კითხვაზე _ იყო თუ არა „ნაციონალური მოძრაობის“ მხარდამჭერი და იყარა თუ არა სოფელ ჭანიეთში კენჭი ამავე პარტიის სახელით, სურგულაძემ ასე გვიპასუხა:
_ იმ დროს ვიყავი ჩემი სოფლის მაჟორიტარი დეპუტატი, რასაც არასოდეს ვუარყობ (სტილი დაცულია. ავტ), მაგრამ პიარკამპანიებში არასდროს ვმონაწილეობდი რამაზ ნიკოლაიშვილთან ერთად.
_ ბატონო ავთანდილ, თქვენს სოფელში „ნაციონალურ მოძრაობას“ წარმოადგენდით?
_ დიახ! _ დააკონკრეტა სურგულაძემ.
დიალოგში ჟურნალისტი დავით ხარშილაძე ჩაერთო, რომელიც დაინტერესდა, რას იზამდა სურგულაძე იმ შემთხვევაში, თუკი ხელისუფლებაში „ნაციონალური მოძრაობა“ დაბრუნდებოდა.
_ ესენი რომ წავიდნენ და „ნაცები“ მივიდნენ, მერე რას იზამთ? გულწრფელად დაწერეთ _ ისევ ემსახურებით სოფელს, რომელმაც აგირჩიათ, მაგრამ უმრავლესობაში „ნაცმოს“ სიით იქნებით? უშვებთ მოვლენების ასეთ განვითარებას? _ ჰკითხა ხარშილაძემ სურგულაძეს, რაზეც „ქართული ოცნების“ დეპუტატობის კანდიდატმა უპასუხა, რომ ისე მოიქცევა, „როგორც სოფელი გადაწყვეტს“.
„გურია ნიუსის“ კითხვაზე _ როდესაც რამაზ ნიკოლაიშვილი შეხვედრებს მართავდა, ესწრებოდა თუ არა შეხვედრებს და საზოგადოებას ეუბნებოდა თუ არა, რომ “ნაციონალები” ყველაფერს შეძლებდნენ და რომ დაპირებები შესრულდებოდა, სურგულაძემ გვიპასუხა, რომ მის სოფელში „იმ დროშიც ბევრი რამ გაუკეთებია“
_ ბატონო ავთანდილ, 2012 წლის საპარლამენტო არჩევნების საარჩევნო კამპანიის დროს, იდექით თუ არა რამაზ ნიკოლაიშვილის გვერდით შეხვედრებზე და ამბობდით თუ არა რომ „ნაციონალები“ და ბატონი რამაზი ყველა დანაპირებს შეასრულებდა?
_ ჭანიეთში კი, _ გვიპასუხა სურგულაძემ.
_ თუ 2012 წელს ბიძინა ცუდი იყო და მიშა კარგი, იქნებ, ისიც გვითხრათ, ახლა რატომ გახდა „ოცნება“ კარგი?
_ ნახეთ ჩემს სოფელში რაები კეთდება და პასუხიც გაცემული იქნება ყველა კითხვაზე. _ დავჯდეთ და ვისაუბროთ.
_ ვსაუბრობთ, ბატონო ავთანდილ, და გპირდებით, ამ საუბარს „გურია ნიუსის“ ვებგვერდის და გაზეთის მკითხველსაც გავაგებინებთ. ამიტომ, იქნებ გვიპასუხოთ რამ გამოიწვია თქვენი პოზიციის შეცვლა და როგორ აღმოჩნდით „ქართული ოცნების“ კანდიდატად მაშინ, როცა 2012 წელს წარმოადგენდით „ნაციონალურ მოძრაობას“ , იყავით იმ შეხვედრების მონაწილე, სადაც ამბობდნენ, რომ ბიძინა და მისი მომხრეები მოღალატეები და რუსეთის აგენტები იყვნენ. იქნებ განგვიმარტოთ როგორ შეუერთდით ამ “აგენტურას“?
ეს კითხვა სურგულაძემ, რომელიც დღეს ჭანიეთელებს “ქართული ოცნების“ სიკარგეზე, ზუსტად ისევე ესაუბრება, როგორც 5 წლის წინ „ნაციონალურ მოძრაობის“ წარმატებებზე ესაუბრებოდა, უპასუხოდ დატოვა.
პ.ს. იხილეთ ვიდეო, რომელიც 2012 წელს, სოფელ ჭანიეთში, რამაზ ნიკოლაიშვილის საარჩევნო კამპანიის დროს არის გადაღებული და რომელშიც, სურგულაძე ნიკოლაიშვლს ასაჩუქრებს კიდევაც!
სტატია ქვეყნდება პროექტის “გაცნობიერებული არჩევანი _ დემოკრატიის ფუნდამენტი” ფარგლებში.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს ფონდ “ღია საზოგადოება _ საქართველოს” პოზიციას. შესაბამისად, ფონდი არ არის პასუხისმგებელი მასალის შინაარსზე.
