24 აპრილს, ოზურგეთისა და ქობულეთის საზღვარზე, მდინარე ჩოლოქთან, ოზურგეთელი ახალგაზრდა მამაკაცი დაიღუპა.
როგორც თავდაპირველად გავრცელდა ინფორმაცია, ტრაგიკული შემთხვევა თევზაობის დროს მოხდა და ახალგაზრდა დენმა იმხვერპლა.
_აქ გამორიცხულია ბრაკონიერობის ფაქტი. მდინარესთან კი იყვნენ წასული, ახალგაზრდებს მოულაპარაკიათ, რომ გასულიყვნენ სააღდგომოდ სადმე. ანკესი თვითნაკეთი კი არ იყო, არამედ ეს არის ქარხნული წესით, მეტალისგან დამზადებული მოწყობილობა, რომელსაც სიგრძე დიდი აქვს და ამავე დროს, დენის კარგი გამტარიცაა. როდის იყო ანკესის მეშვეობით დენის მოშველიება შესაძლებელი და ასე თევზის დაჭერა? მართლაც ტრაგიკული შემთხვევაა. დენს წამოედო ანკესი, რომელც მხარზე ჰქონია გადებული და საუბედუროდ მოხდა ტრაგედია. სოცარი ბიჭი იყო. მალე ოჯახის შექმნას აპირებდა. საცოლეც ჰყავდა. ძალიან ვწუხვართ…შემზარავია ეს ყველაფერი…ღმერთმა ნათელი დაუმკვიდროს, _ გვეუბნება გარდაცვლილის ახლო მეგობარი.
“ენერგო-პრო ჯორჯიას” ოზურგეთის სერვისცენტრში “გურია ნიუსს” განუცხადეს, რომ მომხდარის შესახებ ინფორმაციას ფლობენ, მაგრამ ტერიტორია, სადაც ტრაგიკული შემთხვევა მოხდა ქობულეთს ეკუთვნის.
_ვიცით ამ სამწუხარო ფაქტის შესახებ. ჩვენთვის ცნობილია, რომ ანკესი წამოედო მაღალი ძაბვის სადენს. თუმცა ეს ამბავი სადაც მოხდა, ჩოლოქის ნაპირას, ტერიტორია ეკუთვნის ქობულეთს. ამიტომ მიმართეთ ენრგო-პრო ჯორჯიას“ აჭარის საზოგადოებასთან ურთიერთობის სამსახურს, – გვითხრეს „ენერგო- პრო ჯორჯიას“ ოზურგეთის სერვისცენტრში.
_ფაქტს გიდასტურებთ. ახალგაზრდა მამაკაცი ნამდვილად სათევზაო ანკესით შეეხო მაღალი ძაბვის სადენს და სამწუხაროდ, დაიღუპა. პირველ რიგში ოჯახს ვუთანაგრძნობთ. შემთხვევისთანავე, კომპანიის წარმომადგენლების მიერ მოხდა სადენების გაბარიტების შემოწმება. ამ დათვალიერების მიზანი იყო, შემოწმებულიყო, ნორმაში იყო თუ არა ყველა სადენი. ჩამოწეული ხომ არ იყო დაბალ სიმაღლეზე და ასე შემდეგ. შემოწმების შემდეგ კი დადგინდა, რომ ყველაფერი ნორმაში იყო. რაც შეეხება შემდგომ მოვლენებს, როგორც ვიცით, მიმდინარეობს გამოძიება, რაც უკვე ჩვენი კომპეტენცია არ არის, _ გვითხრა „ენერგო-პრო ჯორჯიას ,“ გურია- აჭარის პრესსამსახურის წარმომადგენელმა ბექა რომანაძემ.
„გურია ნიუსი“ არაერთხელ დაუკავშირდა შსს-ს პრესსამსახურს, თუმცა კვლავ მოლოდინის რეჟიმში ვართ.
მკითხველს ინფორმაციას მიღებისთანავე შევთავაზებთ.
ავტორი
