წმინდა ნინოს სახელობის სამრევლო სკოლის მოსწავლეების, ანანო და ელენე მუჯირების მიერ შესრულებულმა ნახატებმა ონლაინ სივრცეში დიდი მოწონება დაიმსახურა. ანა მეცხრე კლასის მოსწავლეა, ხოლო ელენე _ მეშვიდე კლასის. ორივე ერთდროულად შევიდა ოზურგეთის სამხატვრო სკოლაში.
ანას და ელენეს ნახატებში ასახული გმირები მათ ჰგავს _ ისეთივე ნაღვლიანები არიან და ისეთივე მოკრძალებული ღიმილი აქვთ, როგორც დებს.
ნორჩი მხატვრები ლაპარაკით არ გამოირჩევიან. როგორც ერთ-ერთმა დამ გვითხრა, მათთვის მთავარია, რაც შეიძლება მეტი დახატონ.
როგორც სამხატვრო სკოლაში გვითხრეს, დებს შორის ჯანსაღი კონკურენციაა. სულ ცდილობენ, ერთმანეთზე უკეთესი ნახატი შექმნან.
“დილით სკოლაში მივდივართ, შემდეგ, როდესაც გვაქვს სამხატვრო სკოლაში სწავლის დღეები იქ დავდივართ. ვცდილობთ, რაც შეიძლება დატვირთულები ვიყოთ. ორივემ დამ მივიღეთ გადაწყვეტილება, ერთად შევსულიყავით სამხატვრო სკოლაში. ბაღის ასაკიდან ვხატავთ და ახლა პროფესიულ დონეზე გვინდა დავეუფლოთ ხატვას, _ გვითხრა ანანო მუჯირმა.
დების შესახებ სამხატვრო სკოლის დირექტორი, კახა ვასაძე გვესაუბრა.
“ოზურგეთის სამხატვრო სკოლაში ორივე და ყველაზე მეტს ხატავს. თვეში 200-300 ნახატს ქმნიან. ძალიან პროდუქტიულები არიან და მადლობა მინდა ვუთხრა ოზურგეთის სამხატვრო სკოლის საქმეთა მმართველს ნატო მუჯირს. სწორედ მან გაუწია რეკომენდაცია დებს და მოხვდნენ ჩვენთან. ასევე, ვიტყვი, რომ ჩვენთან მოსწავლეების მიღება ათი წლის ასაკიდან იწყება, მაგრამ ეს გოგოები ძალიან მონდომებული იყვნენ. ელენე იყო მაშინ 9 წლის და ანანო 10 წლის. ამ ეტაპზე ნამდვილად არ ვნანობ ჩემს გადაწყვეტილებას, ელენე ნაადრევად რომ მივიღე”, _ გვითხრა კახა ვასაძემ.
დები მუჯირების ნახატები შეუმჩნეველი არ დარჩენიათ “ბახვიჰესის” წარმომადგენლებს. შარშან, საახალწლო მისალოც ბარათებს მათი ნახატები ამშვენებდა. ეს იყო გოგოებისთვის პირველი კომერციული წარმატება. როგორც გავიგეთ წელსაც მოხდება კომპანიასა და დებს შორის თანამშრომლობა. ასევე, ანანოს და ელენეს ნახატები ჩეხეთში, ქალაქ ლიდიცეში ჩასატარებელ 51-ე სამხატვრო კონკურსში მიიღებენ მონაწილეობას (თემა არის ცეკვა).
“ოზურგეთის სამხატვრო სკოლიდან ჩვენი მოსწავლეების ნახატებს გავაგზავნით. ელენემ და ანანომ პირველებმა შეასრულეს საკონკურსო ნახატი და უკვე ელოდებიან, როდის გავაგზავნით ჩეხეთში. საბავშვო ნახატების კონკურსში. 70 ქალაქიდან იღებენ მონაწილეობს და 25 000-ზე მეტი ნახატი იგზავნება. კორონავირუსის პერიოდში ეს კონკურსი შეჩერდა და ახლა ისევ დაუბრუნდა ძველ ფორმას. წარმატებული ნამუშევრები ერთი წლის განმავლობაში გამოიფინება მსოფლიო ცნობილ სამხატვრო გალერეაში.
წელს ელენე მუჯირმა და ნიკოლოზ სიმონიშვილმა მინსკში ჩატარებულ კონკურსზე _ “მსოფლიო ბავშვების მეგობრობა”, დიპლომები დაიმსახურეს და ახლახან მივიღეთ დიპლომები. მადლობის ბარათები კი, ჩვენი სკოლის პედაგოგებს _ ნინო კეჭაყმაძეს, თამაზ დარჩიას და რეზო ჯაშს გადაეცათ. აღნიშნულ კონკურსში მსოფლიოს 26 ქვეყანა მონაწილეობდა, _ გვითხრა კახა ვასაძემ.
ასევე, ანანო და ელენე წარმატებით მონაწილეობენ ადგილობრივ კონკურსებში. “ზამთრის ვერნისაჟი”, რომელიც ყოველწლიურად ატარებს მერაბ ბერძენიშვილის სახელობის სურათების გალერეა, ელენემ დაიმსახურა პირველი ადგილი.
წელს “ახალგაზრდა პედაგოგთა კავშირის” მიერ ნახატების კონკურსში _”არა ძალადობას” ფასიანი საჩუქრები გადაეცა ორივე დას.
ოზურგეთის მუნიციპალიტეტის მერიის მიერ გამოცხადებულ კონკურსში _ “არა ოკუპაციას” პირველი ადგილი დაიკავა ანი მუჯირმა.
და ბოლოს, კიდევ ერთი სიახლის შესახებ, რომელიც გოგოებმა გვითხრეს _ ოზურგეთის მუნიციპალიტეტის მერიის მიერ დაფინანსებულ მაგიდის კალენდარში მათი 12 ნახატი იქნება დაბეჭდილი.
პატარა მხატვრებს დიდ მომავალს უწინასწარმეტყველებენ ოზურგეთში. მათი ნახატები სიღრმისეულია და ფერთა პალიტრით გამოირჩევა.
დები მუჯირების სურვილია, ცნობილი მხატვრები გახდნენ და მათი ნახატები მსოფლიო სამხატვრო გალერეას ამშვენებდეს.
ავტორი
