6 ივლისს, ოზურგეთის მუნიციპალიტეტის საკრებულოს მორიგ სხდომაზე განიხილეს საკითხი “ოზურგეთის მუნიციპალიტეტის გერბის და დროშის დამტკიცების შესახებ”, დადგენილების მიღების თაობაზე.
საკითხი წარმოადგინა მუნიციპალიტეტის მერიის იურიდიული სამსახურის უფროსმა ლაშა თავაძემ.
დარბაზში მყოფ დეპუტატებს შორის რეპლიკებიც გაჟღერდა, “რამდენჯერ უნდა მივიღოთ ეს ოზურგეთის დროშა და გერბი?”
საკრებულოს იურიდიულ საკითხთა კომისიის თავმჯდომარემ, ეროდი გორდელაძემ განაცხადა, რომ არაფერი არ იყო აქამდე დამტკიცებული:
_ პირველად ვიღებთ, მეგობრებო. ადრე ჩვენ ჰერალდიკის საბჭომ შემოგვთავაზა, რომ ჩატარებულიყო კონკურსი. შეიქმნა საბჭოც. გამოყოფილი იყო სამიათასლარიანი ჯილდო. ჩატარდა კონკურსი. როცა ეს ყველაფერი დასრულდა, მერე, ადგილობრივი თვითმმართველობის არჩევნებისას, მუნიციპალიტეტი გაიყო. შემდეგ ისევ გაერთიანდა და ახლა უნდა დავამტკიცოთ ის დროშა და გერბი, რაც იყო გაერთიანებამდე. ჰერალდიკის სახელმწიფო საბჭოსგან ოზურგეთის მუნიციპალიტეტის მერმა მიიღო წერილი, რომ თავისი კომპეტენციის ფარგლებში, შენიშვნები არ აქვს და მისი დამტკიცება წარმოდგენილი სახით მისაღებია. ამიტომ, კანონმდებლობის შესაბამისად, დღეს სახელმწიფო მნიშვნელობის სიმბოლოს დამტკიცების შესახებ უნდა მივიღოთ ნორმატიული აქტი, _ თქვა გორდელაძემ.
საკრებულოს წევრებმა ერთხმად უყარეს კენჭი და განკარგულება დაამტკიცეს.
ოზურგეთის მუნიციპალიტეტის გერბის ფარი გაკვეთილია ორად და იყოფა სამ ნაწილად. პირველ ნაწილზე, მეწამულ ველზე ვერცხლის ჰერალდიკური ჯვარია გამოსახული. მეორე ნაწილზე, ზურმუხტის ველზე ვერცხლის ხე გარშემოხვეულია ოქროს ვაზით, რომელსაც აქვს ოქროს მტევნები და ფოთლები. მესამე ნაწილზე არის შავი ველი, რომელსაც ზემოდან გასდევს ტალღოვანი სარტყელი. გერბის ფარს ზემოთ მოთავსებულია საქალაქო ვერცხლის გვირგვინი _ სამკოშკიანი ქონგურებიანი გალავანი, ნახევრად ღია კარიბჭით.
რაც შეეხება დროშას, იგი გაყოფილია ვერტიკალურად ორ მეწამულ და მწვანე ველებად. კომპოზიციის ცენტრში გამოსახულია თეთრი ჰერალდიკური ჯვარი.
საკრებულომ დადგენილება მიიღო _ წარმომადგენლობითი ორგანოს გადაწყვეტილებით, მუნიციპალიტეტში უკვე არსებული გერბი და დროშა დამტკიცდა, რომელიც თემთა მუნიციპალიტეტში მოქმედებდა.
საკრებულოს წევრმა ლავრენტი ბიგვავამ გაახმოვანა საკითხი “ოზურგეთს თეატრის მიმდებარე სკვერისთვის, ცნობილი ოზურგეთელი საზოგადო მოღვაწის, არსენ კეჭაყმაძის სახელის მინიჭების შესახებ”:
_ საქართველოს რეგიონული განვითარების და ინფრასტრუქტურის სამინისტროსთან არსებულმა სამთავრობო კომისიამ, ოზურგეთის საკრებულოს ინიციატივაზე, თეატრის მიმდებარე სკვერს არსენ კეჭაყმაძის სახელი ეწოდოს, თანხმობა განაცხადა. ეს იმას ნიშნავს, რომ აღნიშნულ სკვერს მიენიჭება სახელოვანი ოზურგეთელი საზოგადო მოღვაწის სახელი, რაც ძალიან კარგი გადაწყვეტილებაა და სასიხარულოა, _ თქვა ბიგვავამ.
საკრებულოს გადაწყვეტილებით ქალაქ ოზურგეთის დრამატული თეატრის მიმდებარე ტერიტორიაზე არსებულ უსახელო სკვერს არსენ კეჭაყმაძის სახელი მიენიჭა.
ოზურგეთის საკრებულოს თავმჯდომარემ, დავით დარჩიამ, რომელსაც სხდომა მიჰყავდა, აღნიშნა, რომ უმნიშვნელოვანესი გადაწყვეტილება მიიღეს:
“ოზურგეთის სახელმწიფო თეატრის მიმდებარე სკვერისთვის ცნობილი ოზურგეთელი მეცნიერის, საზოგადო მოღვაწის არსენ კეჭაყმაძის სახელის მინიჭება არის ნაბიჯი იქითკენ, რომ ქვეყნის სახელოვანი შვილების დავიწყება არასდროს მოხდება”.
საკრებულოს სხდომაზე, საკრებულოს წევრმა, ოზურგეთის თეატრის სამხატვრო ხელმძღვანელმა, ვასო ჩიგოგიძემ განაცხადა, რომ ის წყვეტს საქმიანობას საკრებულოში, რადგან თეატრის ხელმძღვანელის პოსტზე ძალიან ბევრი საქმე აქვს და დროის დეფიციტი დაბრკოლებას უქმნის.
მან დასვა საკითხი, ოზურგეთის თეატრის წინ მდებარე მოედანს, რომელსაც თეატრალური მოედანი ეწოდებოდა, მინიჭებოდა ზვიად გამსახურდიას სახელი.
_ დიდებული საქმეა, რომ არსენ კეჭაყმაძის სახელი მიენიჭა თეატრის მიმდებარე სკვერს. მინდა ვთქვა კიდევ, რომ ოზურგეთის თეატრი უკვდავია და ასევე, მის წინ მდებარე თეატრალური მოედანი იქნეს სახელდებული. გთხოვთ, უკვდავყოთ, მერამდენედ ვაფიქსირებ უკვე, ამ მოედნის სახელი და როგორც იყო ნათქვამი, რომ ეწოდოს საქართველოს პირველი პრეზიდენტის, ზვიად გამსახურდიას სახელი, _ თქვა ვასო ჩიგოგიძემ.
ლავრენტი ბიგვავამ მოიწონა წინადადება და შესთავაზა, ინიციატივით შემოსვლა საკრებულოზე, რადგან მოქმედი კანონმდებლობა ასე ითვალისწინებს. თუმცა, ვასო ჩიგოგიძემ განაცხადა, რომ უმჯობესია, სხვამ შემოიტანოს, კონკრეტულმა ჯგუფმა ან პირმა.
_ ეს ნაბიჯი უნდა გადაიდგას. ან საკრებულოს წევრმა უნდა შემოიტანოს, ან მუნიციპალიტეტის მერმა, _ თქვა ბიგვავამ და საკრებულოს მიმართა, რომ უახლოეს პერიოდში ეს საკითხი მოგვარდეს.
_ მოიძებნება წარმომდგენი, ეს არ არის ძნელი, ეს უნდა იყოს საკრებულოს წევრი ან თავად მერი, _ თქვა ბიგვავამ.
საკრებულოს წევრებმა წინადადებას მხარი დაუჭირეს.
საკრებულოს სხდომაზე ასევე, მოისმინეს ანგარიში ღია მმართველობის სამოქმედო გეგმის ვალდებულებაზე.
“ღია მმართველობა საქართველოს 2019-2020 წლების სამოქმედო გეგმით” გათვალისწინებული ვალდებულებების შესრულების თაობაზე, საკრებულოს დროებითი სამუშაო ჯგუფის მიერ მომზადებული ანგარიში მოისმინა. მონიტორინგის შედეგები საკრებულოს წევრებს, აპარატის უფროსმა ნანა თავდუმაძემ წარუდგინა.
_ OGP-ის მიმდინარე ღია მმართველობა პარტნიორობის ეროვნული სამოქმედო გეგმის ფარგლებში, ოზურგეთმა ვალდებულება აიღო და შეიმუშავა გამჭვირვალობისა და კეთილსინდისიერების სტრატეგია, სამოქმედო გეგმა, თანდართული კომპლექსური მონიტორინგის და შეფასების მეთოდოლოგიითურთ. ეს უკანასკნელი შემუშავდა ადგილობრივ არასამთავრობო ორგანიზაციებთან მჭიდრო თანამშრომლობით, OGP სამდივნოს და USAID/GGI მხარდაჭერით, _ თქვა მან და ხაზი გაუსვა, რომ ეს ოზურგეთის მუნიციპალიტეტისთვის მნიშვნელოვანი ეტაპია გამჭვირვალობისა და დემოკრატიული მმართველობის სტანდარტების გაუმჯობესებისა და კორუფციის წინააღმდეგ ბრძოლის გასაძლიერებლად. რომ ეს საკრებულოსთვის მნიშვნელოვანი გამოცდილებაა სრულყოფილი პოლიტიკის დოკუმენტების შემუშავება სამოქალაქო საზოგადოების აქტიური ჩართულობით, _ თქვა თავდუმაძემ, რომელმაც ანგარიშის წარდგენისას ყურადღება გაამახვილა სტრატეგიის მნიშვნელობასა და სამოქალაქო სექტორთან მჭიდრო თანამშრომლობის კარგ პრაქტიკაზე:
“თვითმმართველობისა და სამოქალაქო საზოგადოების ერთად მუშაობის მზაობამ შესაძლებლობა მოგვცა შემოგვეღო მონიტორინგისა და შეფასების მექანიზმი, რომელიც, სამოქმედო გეგმის გახორციელების პროცესის შეფასების ინსტრუმენტისა და ადრეული შედეგების შესახებ ანგარიშგების საშუალებით მოახდენს სამოქალაქო საზოგადოების მონაწილეობის ინსტიტუციონალიზაციას ადგილობრივ დონეზე”, _ აღნიშნა ნანა თავდუმაძემ. მანვე მოკლე ინფორმაცია მიაწოდა საკრებულოს წევრებს OGP_Local- ის ფარგლებში ნაკისრი ვალდებულებების შესრულების მიზნით მიმდინარე სამუშაო პროცესზე.
საკრებულომ “ღია მმართველობა საქართველოს 2019-2020 წლების სამოქმედო გეგმით” გათვალისწინებული ვალდებულებების შესრულების თაობაზე საკრებულოს დროებითი სამუშაო ჯგუფის მიერ მომზადებული ანგარიში ცნობად მიიღო.
საკრებულომ ხმათა უმრავლესობით დაამტკიცა განკარგულება 2021-2023 წლებისთვის ოზურგეთის მუნიციპალიტეტის ახალგაზრდობის განვითარების სტრატეგიისა და სამოქმედო გეგმის შესახებ. როგორც სხდომაზე აღინიშნა აღნიშნული პროექტი საჭიროებების კვლევისა და ანალიზის შედეგად შემუშავდა.
დამტკიცდა განკარგულება შეზღუდული შესაძლებლობის მქონე პირთა უფლებების დაცვის 2021 წლის გეგმის დამტკიცების შესახებაც. კომისიამ საკითხებზე დადებითი დასკვნები წარმოადგინა.
მერს მიეცა თანხმობა ოზურგეთის მუნიციპალიტეტის საკუთრებაში არსებული მიწისქვეშა კომუნიკაციის ხაზობრივი ნაგებობების სარგებლობის უფლებით გადაცემაზე.
ავტორი: მარინა ჩიხლაძე
