როგორც ცნობილია, გურიაში, საჯარო სკოლებს შორის, მხოლოდ ოზურგეთის მეოთხე საჯარო სკოლაში იყო წარმოდგენილი დირექტორობის ორი კანდიდატი. თუმცა, სკოლის ამჟამინდელ დირექტორის მოვალეობის შემსრულებელს და წლების განმავლობაში დირექტორს, ტარიელ კალანდაძეს განათლების სამინისტრომ მხარი არ დაუჭირა და ამიტომ სამეურვეო საბჭოს წინაშე მხოლოდ ერთი კანდიდატი, ხათუნა ლომთაძე წარდგა.
სანამ პრეზენტაციას წარადგენდა, მან მოკლედ ისაუბრა საკუთარ აქტივობაზე იმ დროის განმავლობაში, რაც სკოლაში მუშაობს:
_ ამ კონკურსის გარდა, სხვა უამრავ კონკურსში მიმიღია მონაწილეობა. როცა შენ სახელმწიფო კონსტიტუციურად გაძლევს უფლებას, რომელიმე კონკურსში ღიად ჩაერთო და შენი შესაძლებლობა გამოავლინო, ამაში ცუდს ვერაფერს ვხედავ. დღეს აქ ჩემი შვილები ტყუილად არ არიან. მათ უნდა იცოდნენ, რომ უკან არასდროს არ უნდა დაიხიო. ოღონდ ისე, რომ მორალს და კანონის ზღვარს არ უნდა გადააბიჯო, _ განაცხადა ქალბატონმა ხათუნამ.
შემდეგ მან, როგორც დირექტორობის კანდიდატმა, ისაუბრა თავის პროგრამაზე. კერძოდ, საჯარო სკოლის განვითარებაზე, სასწავლო პროცესის მართვაზე, სწავლა-სწავლების ხარისხის ამაღლებაზე, პროფესიულ განვითარების ზრუნვაზე, ანგარიშვალდებულების სისტემაზე, მშობლებთან და საზოგადოებასთან ურთიერთობაზე.
ხათუნა ლომთაძემ ხაზგასმით აღნიშნა, რომ ყველა პროექტზე მუშაობა სასარგებლოდ და აუცილებლად მიაჩნია, თუმცა, უდიდეს მნიშვნელობას ანიჭებს აკადემიურ განათლებას და მისი მთავარი მიზანი სწორედ ეს იქნება.
პრეზენტაცია დარბაზში მყოფმა ყველა ადამიანმა მოიწონა და მას ტაში დაუკრეს.
შემდეგ ჩატარდა არჩევნები და კენჭისყრაში ცამეტმა ადამიანმა მიიღო მონაწილეობა. იქვე განმარტეს, რომ 14 წევრიდან აკლდა ერთი მშობელი, რომლის შვილმა გასულ სასწავლო წელს სკოლა დაამთავრა და მას უფლებამოსილება შეუწყდა.
კენჭისყრის შემდეგ, აღმოჩნდა, რომ ხათუნა ლომთაძეს სამეურვეო საბჭოს 13 წევრიდან, ხმა მხოლოდ ერთმა მისცა.
ტარიელ კალანდაძემ, კენჭისყრის შემდეგ ჟურნალისტებთან ისაუბრა.
_ ვისაუბრებ მხოლოდ ორგანიზაციულ მხარეზე. პრეზენტაცია კარგად იყო ორგანიზებული და კანდიდატს ჰქონდა საშუალება, კარგად წარმოედგინა თავისი პრეზენტაცია.
კითხვაზე, თუ რა მოხდება ამის შედეგ და ვინ გახდება დირექტორი, ტარიელ კალანდაძემ თქვა, რომ მინისტრს აქვს უფლება, ერთხელ კიდევ წარადგინოს კანდიდატი სამეურვეო საბჭოს წინაშე. უფლება აქვს, დანიშნოს მოვალეობის შემსრულებელი ან გამოიყენოს დისკრეციული უფლება და დანიშნოს დირექტორი.
ტარიელ კალანდაძემ ყველა კითხვას ამომწურავად უპასუხა. მან ისაუბრა კანდიდატის შესახებ და თქვა, რომ ის მისი აღზრდილია.
_ ყველანაირად ხელს ვუწყობდი მის პროფესიულ დაოსტატებას და ამას ვერ უარყოფს, _ თქვა მან. ასევე ჟურნალისტებისგან ითხოვა, რომ გაეჟღერებინათ მისი ერთ-ერთი კომენტარი, მისი ბრეჟნევთან შედარების შესახებ.
_ ვიღაცამ ბრეჟნევს შემადარა სადღაც და ვიტყვი, რომ ბრეჟნევი როცა საუბრობდა, პროთეზი პირიდან უვარდებოდა. მე კი ყველა ჩემი კბილი მაქვს, „დაპლომბილიც“ კი არ მაქვს. ამასთანავე ბრეჟნევი მუდამ დაწერილს კითხულობდა. მე კი ამის პრობლემა არ მაქვსო.
ტარიელ კალანდაძეს, ასევე, ჰკითხეს ხათუნა ლომთაძის, როგორც „ქართულ ოცნებასთან“ დაახლოებული პირის შესახებ _ მისი კანდიდატურა ამიტომ უფრო განიხილება თუ არა.
_ კი არიან, თუმცა მე არ ვარ პოლიტიკურად აქტიური ადამიანი და ვერავინ იტყვის, რომ ოდესმე ვინმესთვის მეთქვას, რომ ხმა მიეცით „ნაციონალებს“ ან „ქართულ ოცნებას“. მე ვარ მასწავლებელი და ვიცი ჩემი საქმე. რა თქმა უნდა, რაც ხდებოდა, ეს მიხაროდა და ამას ვერც ვერავინ უარყოფს. მე გამიხარდა ის, რომ საზოგადოებამ დაინახა, როგორ ვმუშაობდი 35 წლის მანძილზე, _ თქვა ტარიელ კალანდაძემ.
რაც შეეხება ხათუნა ლომთაძეს, მან კენჭისყრის შემდეგ, მალევე სოციალურ ქსელში ასეთი პოსტი გამოაქვეყნა:
„16 ოქტომბერი ერთი ჩვეულებრივი დღე იქნება ჩემს ცხოვრებაში. ვინც მიცნობს, დამეთანხმება, სხვისი კენჭიც კი არ მიმითვისებია არასოდეს; დღემდე ღირსეულად მოვედი, პატიოსანი შრომით; ჩემთვის მნიშვნელოვანი ჩემი ოჯახია, შვილები და ძმისშვილები. იმდენად მძიმეა ცხოვრება, დამეთანხმებით, არაფერი არ ღირს უაზრო თავგანწირვად. მქონია უმძიმესი დღეები და გადამილახავს. დღემდე არ ამომდის გონებიდან ელენეს გაყინული თვალები და სასიკვდილოდ განწირული ბავშვები, მე ამას გავუძელი (რამდენიმე წლის წინ, ლომთაძის ახალგაზრდა რძალი უმძიმეს ავტოავარიას ემსხვერპლა ოზურგეთში და ის დღემდე მზრუნველობს ობოლ ძმისშვლებს. ავტ.). ასე რომ, დღევანდელი შედეგი ვერ აისახება ჩემზე უარყოფითად. ვერავიზე ვერ გავბრაზდები! ,,წყალი მიდგება, მოდგება”… ცხოვრება ჩვეულ რიტმს დაუბრუნდება! არ მძულს არავინ და არასოდეს გავიმეტებ მტერსაც კი, ამით ნამდვილად ბედნიერი ვარ! მიყვარხართ!“
ოზურგეთში, შექმნილი ვითარებიდან გამომდინარე, ბევრი ადამიანია იმის მომხრე, რომ წარმატებულ და მუდამ მოწინავე პოზიციაზე მდგომ მეოთხე საჯარო სკოლაში ვითარება დამშვიდდეს და ურთიერთპატივისცემა ისევ ძველებურად გაგრძელდეს.
შექმნილი ვითარების შესახებ ისაუბრა და სიტუაცია შეაფასა სკოლის პედაგოგმა, ელენე მარმა, რომელმაც გაკვირვება ვერ დამალა სამინისტროს პოზიციის გამო, თითქოს, ტარიელ კალანდაძემ გასაუბრება ვერ გაიარა და ამიტომ მოიხსნა მისი კანდიდატურა:
_ თავიდანვე გაჩნდა დიდი უსამართლობის განცდა. თითქოს ტარიელ კალანდაძემ გასაუბრება ვერ გაირა. რას ჰქვია, ვერ გაიარა? ის არის წარმატებული პედაგოგი, მენტორი, ექსპერტი, დირექტორთა ტრენერი, უდიდესი გამოცდილების მქონე. დიდ პატივს ვცემ ხათუნა ლომთაძეს. ჩვენ ამდენი ხანია, ერთად მოვდივართ, ერთმანეთის ჭირს და ლხინს ვიზიარებთ, თუმცა, ამ ეტაპზე ტარიელ კალანდაძეს ალტერნატივა არ ჰყავს, _ განაცხადა ელენე მარმა.
ავტორი
