ოზურგეთის მუნიციპალიტეტის „მოქალაქეთა ასამბლეამ“ მოსახლეობისათვის აქტუალური პრობლემის – მიუსაფარი ცხოველების მოვლა-პატრონობის საკითხის გადასაჭრელად სამი შეხვედრა გამართა და ექსპერტებთან თანამშრომლობით, ადგილობრივი ხელისუფლებისთვის რეკომენდაციები შეიმუშავა. შეხვედრები ჩატარდა ოზურგეთის „ტექნოპარკში“, „თანამონაწილეობისა და ჩართულობის ცენტრი სიპისის’’ ორგანიზებით, USAID-ის ადგილობრივი თვითმმართველობის პროგრამის მხარდაჭერით, პროექტის – „სათათბირო დემოკრატიის ინსტიტუციური განვითარება ოზურგეთის მუნიციპალიტეტში“ ფარგლებში. პროექტი ხორციელდება ევროპის საბჭოსთან, ოზურგეთის მუნიციპალიტეტის მერიასა და საკრებულოსთან, ადგილობრივ ბიზნეს და სამოქალაქო ორგანიზაციებთან პარტნიორობით.
„გურიანიუსთან“ საუბრისას, პროექტის კოორდინატორმა ხატია შელიამ აღნიშნა, რომ „მოქალაქეთა ასამბლეის“ საკითხის შერჩევის დროს, პროექტის გუნდი დაეყრდნო USAID-ის ადგილობრივი თვითმმართველობის პროგრამის მიერ პარტნიორ მუნიციპალიტეტებში ჩატარებული კვლევის – „მოქალაქეთა და ბიზნესის დამოკიდებულებები ადგილობრივი მმართველობისა და სერვისების მიმართ” შედეგებს, რომლის მიხედვით ოზურგეთის მოქალაქეებმა პირველ პრიორიტეტულ პრობლემად სწორედ მიუსაფარი ცხოველების მოვლა-პატრონობა დაასახელეს. „თანამონაწილეობისა და ჩართულობის ცენტრი სიპისის“ გუნდმა, ამ აქტუალური პრობლემის გადასაჭრელად, „მოქალაქეთა ასამბლეის“ ფორმატი შეარჩია და პროექტში ადგილობრივი მოსახლეობა, ექსპერტები, ოზურგეთის მუნიციპალიტეტის მერია და საკრებულო, ბიზნესსექტორი და სხვა დაინტერესებული მხარეები ჩართო.
რეზო ბარბაქაძე, „მოქალაქეთა ასამბლეის“ ფასილიტატორი განმარტავს, რომ ასამბლეის მეთოდოლოგია გამორჩეულია მონაწილეთა შერჩევის განსხვავებული წესით: „ეს არის მონაწილეთა შერჩევის შემთხვევითი წესი, მზადდება წინასწარ მთელი საქმიანობა იმისათვის, რომ მოქალაქეები მთელი მუნიციპალიტეტიდან შეირჩენ არა გარკვეული, წინასწარ დადგენილი ჯგუფებიდან, არამედ სხვადასხვა კატეგორიებიდან. მთავარი პრინციპი არის ის, რომ მონაწილეები უნდა მოიცავდნენ ყველა იმ კატეგორიას და მოქალაქეთა ჯგუფს, რაც ზოგადად მუნიციპალიტეტში არსებობს“ – რეზო ბარბაქაძის შეფასებით, ოზურგეთის „მოქალაქეთა ასამბლეა“ საინტერესო და მრავალფეროვანი აუდიტორიაა. თავიანთი მსოფლმხედველობით და გამოცდილებით გამოირჩევიან მონაწილეები, რომლებმაც შეძლეს, შეემუშავებინათ საჭირო რეკომენდაციები და მიუსაფარი ცხოველების პრობლემის გადაჭრის გზები შეეთავაზებინათ ადგილობრივი ხელისუფლებისთვის.
„მოქალაქეებმა შეიმუშავდეს და მხარი დაუჭირეს ისეთ რეკომენდაციებს/ინიციატივებს, როგორებიცაა: მიუსაფარი ცხოველების მიმკედლებელი მოქალაქეებისთვის წახალისების მექანიზმების დანერგვა; ცნობიერების ამაღლების ნაწილში ეფექტური საინფორმაციო კამპანიის ორგანიზება; ინტერმუნიციპალური თანამშრომლობა; მიუსაფარი ცხოველების სავალდებულო სტერილიზაცია/კასტრაცია/ვაქცინაცია და მათი აღრიცხვის მოწესრიგება; ცხოველთა დახმარების საზოგადოებრივი ფონდის დაარსება; საჯარიმო სანქციების შემოღება და მისი აღსრულების უზრუნველყოფა“ – აცხადებს „მოქალაქეთა ასამბლეის“ კოორდინატორი, კოკა კიღურაძე, რომლის ინფორმაციით, შემუშავებულ რეკომენდაციებზე ადგილობრივი ხელისუფლების წარმომადგენლებს მიეცათ უკუკავშირის შესაძლებლობა და მხოლოდ ამის შემდეგ გაიმართა კენჭისყრის პროცესი.
„გურიანიუსი“„მოქალაქეთა ასამბლეის“ მონაწილეებს ესაუბრა.
„ჩვენ უნდა მივაღწიოთ იმას, რაც მიზნად დავისახეთ: შემცირდეს ქუჩებში მიუსაფარი ცხოველების რაოდენობა და მოეწყოს თავშესაფრები. ამას გარკვეული რეკომენდაციების შესრულება სჭირდება. ადგილობრივ ხელისუფლებასთან გვაქვს ეს რეკომენდაციები. იმედია, გაითვალისწინებენ“. – ამბობს ანეტა ზაქარიაძე, სოფელ ბაილეთის მკვიდრი.
ამირან ფუტკარაძე (დაბა ნასაკირალი): „პირველ რიგში, საჭიროა მიუსაფარი ცხოველების უზრუნველყოფა თავშესაფრებით, მედიკამენტებით და პროდუქტებით. „მოქალაქეთა ასამბლეა“ კარგი შესაძლებლობაა ჩვენი ოთხფეხა მეგობრების პრობლემების გადასაჭრელად“.
ელზა ღუდუშაური (დაბა ურეკი): „პატივი მერგო, მეორედ გავმხდარიყავი „მოქალაქეთა ასამბლეის“ წევრი და მეტი გამოცდილება მიმეღო სამოქალაქო განათლების კუთხით. ვფიქრობ, უსახლკარო ცხოველებზე ზრუნვისთვის მნიშვნელოვანია ვაქცინაცია და სტერილიზაცია, რაც ხალხის, ბიზნესსექტორისა და თვითმმართველობის ჩართულობით არის შესაძლებელი“.
აღსანიშნავია, რომ გასულ წელს, თანამონაწილეობისა და ჩართულობის ცენტრი სიპისის“ ორგანიზებით, ადგილობრივი მოსახლეობის უკეთ ინფორმირების მიზნით, ოზურგეთის მუნიციპალიტეტში „სამოქალაქო პიკნიკები“ ჩატარდა, სადაც მიუსაფარი ცხოველების მოვლა-პატრონობის გამოწვევებზე იმსჯელეს. ამ ეტაპზე, პროექტის გუნდი ადვოკატირებას უწევს „მოქალაქეთა ასამბლეის“ რეკომენდაციების შესრულებას და მიუსაფარი ცხოველების მოვლა-პატრონობასთან დაკავშირებული სამოქმედო გეგმის დამტკიცებას. დაგეგმილია ინტერმუნიციპალური კონფერენცია, სადაც გაზიარებული იქნება პროექტის შედეგები და გამოცდილება.
წინამდებარე მასალის მომზადება შესაძლებელი გახდა ამერიკელი ხალხის მხარდაჭერით, აშშ-ის საერთაშორისო განვითარების სააგენტოს (USAID) ადგილობრივი თვითმმართველობის პროგრამის მეშვეობით. მასალა მომზადებულია „თანამონაწილეობისა და ჩართულობის ცენტრი სიპისის“ მიერ და შესაძლებელია არ ასახავდეს USAID-ის ან აშშ-ის მთავრობის შეხედულებებს.
პუბლიკაცია მომზადებულია USAID-ის ადგილობრივი თვითმმართველობის პროგრამის ფარგლებში, რომელიც მიზნად ისახავს საქართველოს მხარდაჭერას ადგილობრივი დემოკრატიის განმტკიცებასა და კეთილდღეობის დონის ამაღლებაში, დეცენტრალიზაციის და საჯარო მმართველობის რეფორმის განხორციელებასა და ისტორიული მიზნისკენ – ევრო-ატლანტიკურ სტრუქტურებში ინტეგრაციისკენ სწრაფვაში.
