ოზურგეთის საკრებულოს მორიგი სხდომა, მორიგი ხელჩართული ჩხუბითა და ერთმანეთის გინებით

7 სექტემბერს, ოზურგეთის მუნიციპალიტეტის საკრებულოს მორიგი სხდომა შედგა.

საკრებულოს თავმჯდომარემ დავით დარჩიამ დღის წესრიგის საკითხები გააცნო საკრებულოს წევრებს. შემდეგ, ვიდრე პირველი საკითხის ირგვლივ მომხსენებელს უხმობდა, “ნაციონალმა” დეპუტატმა, რაინდი დუმბაძემ ყურადღების მიპყრობა ითხოვა.

ის მშვიდი ნაბიჯებით წავიდა დავით დარჩიასთან და თან იძახდა, სხდომის ჩაშლას არ ვაპირებ, არაფერს ვამბობ, პრობლემების დასტა წერილობით უნდა გადმოგცეთო.

_ არ ვაპირებ სხდომის ჩაშლას, არც განცხადების გაკეთებას ვგეგმავ. მათქმევინეთ ორი სიტყვა. მოგიტანეთ ნარუჯა-ლაითურის პრობლემებზე ყველაფერი ჩამოწერილი. ნახეთ, წაიკითხეთ. მე არ ვაპირებ სხდომის ჩაშლას, _ კვლავ გაიმეორა დუმბაძემ, მობრუნდა და კუთვნილ ადგილზე დაჯდა.

დღის წესრიგის პირველი საკითხი, “მშენებლობის (განსაკუთრებული მნიშვნელობის რადიაციული ან ბირთვული ობიექტების მშენებლობის გარდა) სანებართვო პირობების შესრულების დადასტურების (ექსპლუატაციაში მიღების) თაობაზე, აქტის გამოცემის (მასში ცვლილების შეტანის) დაჩქარებული მომსახურების მოსაკრებლის გადახდის წესისა და ოდენობის განსაზღვრის შესახებ”, მომხსენებელმა ოფიციალურად წაიკითხა და საკრებულოს წევრებმა კამათისა და დავის გარეშე მხარი დაუჭირეს დადგენილებას.

ასევე, ყველამ მოიწონა და მხარი დაუჭირეს დადგენილებას: “ოზურგეთის მუნიციპალიტეტის სოციალური მიზნის მქონე პროექტების თანადაფინანსების პროგრამის გახორციელების შესახებ”.

საკითხის ირგვლივ, მუნიციპალიტეტის მერის პირველმა მოადგილემ, გიორგი ღურჯუმელიძემ ისაუბრა და თქვა, რომ პროექტი მიზნად ისახავს ოზურგეთის მუნიციპალიტეტში სოციალურად დაუცველი პირების, მრავალშვილიანი თუ მარჩენალდაკარგული ოჯახების, მარტოხელა ხანდაზმული პირების ჩართულობას სხვადასხვა სოციალური მიზნების მქონე პროექტებში.

ასევე, ოზურგეთის ტერიტორიაზე სოციალური საწარმოების განვითარების ხელშეწყობას. სხდომას ესწრებოდა “დემოკრატიული განვითარების კავშირის” აღმასრულებელი დირექტორი ლევან ხინთიბიძე. მან განმარტა, რომ ორგანიზაციის ინიციატივა იყო სოციალური საწარმოების განვითარების დაწყება:

_ ეს არის საპილოტე პროგრამა და სასიხარულოა მისი დაწყება და განვითარება. დაფინანსების 30%, 14 ათასი დოლარის სახით გამოიყოფა. ეს არის განსაკუთრებული პროგრამა და იდეაც საინტერესოა. ჩვენ მხარს ვუჭერთ ადგილობრივ ხელისუფლებას ამ საკითხში, _ თქვა მან.

საკითხს ყველამ მხარი დაუჭირა.

როცა დღის წესრიგის მესამე საკითხი განიხილეს და “ოზურგეთის მუნიციპალიტეტის დაბა გომისმთის ადმინისტრაციული ერთეულის სივრცის დაგეგმარების გეგმის კონცეფციის დამტკიცების შესახებ”, ოზურგეთის საკრებულოს განკარგულება უნდა მიეღო, “ნაციონალმა” დეპუტატმა, დავით მჟავანაძემ სიტყვა ითხოვა.

მან ხმამაღლა დაიწყო საუბარი გომისმთაზე არსებული დარღვევების შესახებ. მეტიც, მან ღიად თქვა, რომ არსებულმა მმართველმა ძალამ მუნიციპალიტეტში გომისმთას, როგორც კურორტს, განვითარების საშუალება არ მისცა:

_ თქვენ ხართ ის ადამიანები, რომლებმაც კურორტ გომისმთას განვითარების საშუალება მოუსპეთ. ადექით ფეხზე და თქვით, ვის არ გაქვთ გომისმთაზე მიწა მიტაცებული. 2020 წელს ქალბატონი წულუკიანი რომ გაგზავნეთ იქ ხმების სანაცვლოდ, ეს საარჩევნოდ გჭირდებოდათ. დღეს 22 ადამიანზე საქმეა აღძრული, თითქოს, უკანონოდ მიითვისეს მიწა. მოატყუეთ ადამიანები. ეს კურორტი თქვენ გაანადგურეთ, _ ყვიროდა მჟავანაძე, რაზეც “ქართული ოცნების” დეპუტატები, ასევე, ყვირილითა და შეძახილებით პასუხობდნენ, ცრუობ და იტყუებიო.

_ ტარიელ აროშიძემ აღიარა და დეკლარაციაში პირდაპირ წერს, უკანონოდ მივითვისეო, _ იყვირა მჟავანაძემ და ხელი “ქართული ოცნების” წარმომადგენლის, საკრებულოს წევრის ტარიელ აროშიძისკენ გაიშვირა.

საპასუხოდ აროშიძემ პირდაპირ შეაგინა მჟავანაძეს. გინებას “ნაციონალი” დეპუტატების მხრიდან საგნების სროლა მოჰყვა აროშიძის მიმართულებით და უკვე ორივე მხარის შემადგენლობა წამოიშალა და გაიწია ერთმანეთისკენ.

გინება, გაწევ-გამოწევა, ყვირილი, ფიზიკურ ჩხუბში და კიდევ უფრო მეტ დაპირისპირებაში რომ არ გადაზრდილიყო, საკრებულოს თავმჯდომარემ, დავით დარჩიამ შესვენება გამოაცხადა.

(აქვე შევნიშნავთ, რომ მიუხედავად არაერთგზის საკითხის დაყენებისა, შეწყვეტილიყო ოზურგეთის საკრებულოს სხდომებზე გინება, ყვირილი, გამუდმებული დაპირისპირება, რაც დროის ფუჭი ფლანგვა და უკუსვლაა მხოლოდ _ შედეგი მაინც არ დადგა. აღნიშნულ თემაზე საგანგებო განცხადებაც გაავრცელა საკრებულოს წევრმა, გახარიას პარტიის “საქართველოსთვის” წარმომადგენელმა ალეკო ბურჭულაძემ. ავტ.).

დღის წესრიგით გათვალისწინებულ საკითხზე “ოზურგეთის მუნიციპალიტეტის 2022 წლის ბიუჯეტის დამტკიცების შესახებ”, 2021 წლის დადგენილებაში ცვლილების შეტანის თაობაზე, გიორგი ღურჯუმელიძემ ისაუბრა.

მან თქვა, რომ ოზურგეთის საკრებულოს ბიუჯეტის ზრდა 3 873 833 ლარით ხდება და მატების შედეგად, ჯამში, ოზურგეთის ბიუჯეტი 61 371 733 ლარს შეადგენს.

გაზრდილი ბიუჯეტი მნიშვნელოვანი ინფრასტრუქტურული, სოციალურ-ეკონომიკური პროექტების გახორციელებას მოხმარდება.

“ნაციონალმა” დეპუტატმა ბესო ქათამაძემ ინფრასტრუქტურული პროექტების გახორციელების პრიორიტეტულობას მხარი დაუჭირა, თუმცა, თქვა, რომ მოსახლეობა როცა გაღარიბებულია, არანაირად არ შეიძლება, ვთქვათ, თერთმეტი კამერისთვის სამასი ათასი ლარი გამოიყოს:

_ ყველა ექვს კილომეტრში სათვალთვალო კამერის დაყენება რას ემსახურება? საკვების ფული არ აქვს მოსახლეობას და მათი დაჯარიმება შეიძლება? ჩაის ბუჩქებში და ტყეშია კამერები დაყენებული. ვის სჭირდება ეს? _ ბრაზობდა ქათამაძე.

გიორგი ღურჯუმელიძემ უპასუხა, რომ თუ მოისმენდა, აუხსნიდა:

_ კამერების დამატებას კიდევ ვითვალისწინებთ და მათი რიცხვი გაიზრდება. მარტო პარკებში ჰქონდა უამრავ, მოუთმენელ, ვანდალურ ფაქტებს ადგილი, ამიტომაც უნდა დაიდგას. საზოგადოებრივი თავშეყრის ადგილებშიც. უსაფრთხოების გარანტი იქნება ეს კამერები, _ თქვა ღურჯუმელიძემ.

ბესო ქათამაძემ კი ამჯერად განაცხადა, რომ ეს კამერები არანაირ უსაფრთხოებას არ იცავს და ისინი პოლიციის უფლებებში იჭრებიან.

საკრებულოს “ნაციონალმა” დეპუტატმა თათია ნიკოლაშვილმა სოფელ ბახვში არსებულ წყლის პრობლემის თაობაზე ისაუბრა.

_ ინფრასტრუქტურულ საკითხებზე საუბრობთ და ერთი თვე სოფელ ბახვში წყალი არ იყო. ერთ-ერთ უბანში მცხოვრებ რუსუდან ახალაძეს კი ისევ არ აქვს სახლთან მისასვლელი ხიდი. მიუხედავად იმისა, არა ერთხელ დავსვით ეს საკითხი, _ თქვა მან და ფოტოები ააფრიალა.

_ თუ დამაცდით, ამაზეც გიპასუხებთ. გასულ წელს დასრულდა 30-წლიანი უწყლობის პრობლემა ანასეულში. მე იქ ვცხოვრობ და ვიცი, რას ნიშნავს უწყლობა. საკითხი არ არის, რის შესახებაც არ ვიცოდეთ. რაც შეეხება იმ ხიდს, რომელზეც თქვენ საუბრობთ, მერის მოადგილე ნიკა ბოლქვაძე იმყოფებოდა ადგილზე და ამ ეტაპზე ზრუნავს, დაეხმაროს ამ ოჯახს. ვიდრე ტენდერი გამოცხადდება და გაკეთდება ხიდი, _ თქვა გიორგი ღურჯუმელიძემ.

საკრებულოს წევრმა რაინდი დუმბაძემ საფრთხის შემცველად მოიხსენია ლაითურის წყალმომარაგების სისტემა, რომელიც ხუთი მილიონი ლარი დაჯდა.

_ სათავე ნაგებობას აქვს პრობლემა. არ არსებობს გაწერილი გრაფიკი და გვალვის პერიოდში არამიზნობრივი ხარჯვა ხდება. ამიტომ ყურადღება უნდა მიაქციოთ, რომ სათავე ნაგებობა არ მოიშალოს, _ მიმართა მან საკრებულოს თავმჯდომარეს.

გიორგი ღურჯუმელიძემ განმარტა, რომ აღნიშნული წყალმომარაგების კონტროლი და მართვა გადაცემული აქვს შპს “სატისს”:

_ რაც შეეხება გრაფიკს თუ ტარიფს, ეს საქართველოს მარეგულირებელ კომისიას ეხება. საკითხი მარტივი არ არის, ჩვენ წუთით არ გავჩერებულვართ, საქმეს ვაკეთებთ.

საბოლოოდ, საკრებულომ მიიღო განკარგულებები: “ოზურგეთის მუნიციპალიტეტის დაბა გომისმთის ადმინისტრაციული ერთეულის სივრცის დაგეგმარების გეგმის კონცეფციის დამტკიცების შესახებ”;

“საქართველოს სახელმწიფო ბიუჯეტით გათვალისწინებული საქართველოს რეგიონებში გასახორციელებელი პროექტების ფონდიდან სოფლის მხარდამჭერი პროგრამის ფარგლებში, ოზურგეთის მუნიციპალიტეტში დასაფინანსებელი პროექტების დამტკიცების შესახებ” და ოზურგეთის მუნიციპალიტეტის საკრებულოს 2022 წლის 29 აპრილის #28 განკარგულებაში ცვლილებების შეტანის თაობაზე.

ასევე დაიწყო საჯარო წარმოება “ოზურგეთის მუნიციპალიტეტის საკუთრებაში არსებული უძრავი ქონების საპრივატიზაციო ობიექტების ნუსხის დამტკიცების შესახებ”.