26 ნოემბერს ოზურგეთის მუნიციპალიტეტის საკრებულოს მორიგი სხდომა შედგა. საკრებულოს თავმჯდომარემ დავით დარჩიამ საკრებულოს წევრებს განსახილველად დღის წესრიგით გათვალისწინებული ექვსი საკითხი წარუდგინა.
მათ შორის ყველაზე მნიშვნელოვნი იყო 2025 წლის ბიუჯეტის მესამე კვარტლის შესრულების ანგარიში.
საფინანსო-საბიუჯეტო სამსახურის უფროსმა, პავლე ჭყონიამ საკრებულოს დეპუტატებს სიტყვით გამოსვლისას უთხრა, რომ მესამე კვარტლის მონაცემებით ბიუჯეტი შემოსავლების ნაწილში 68%-ით შესრულდა.
_ჩვენ დღეს წარმოვადგენთ მესამე კვრტალის ანგრიშს, რომელიც ძირითადად ეხება ფისკალურ მონაცემებს, ცხრა თვის მუშაობის ანალიზს, ასე ვთქვათ. ბიუჯეტი ამჟამად განისაზღვრება 100 (ასი) მილიონ 892 910 ლარით. შემოსავლების ნაწილში 75%-მდეა შესრულება. გადაჭარბებით არის შემოსული გეგმიურ მაჩვენებელთან ქონების გადასახადი. აგრეთვე ბუნებრივი რესურსების მოსაკრებელი და დასუფთავების მოსაკრებელი. შესაბამისად, ბიუჯეტის წლიური ანგარიშის შესრულება შემოსავლების ნაწილში არავითარი საფრთხე არ ემუქრება, _თქვა მან და ხაზი გაუსვა იმ ფაქტს, რომ დიდი ალბათობით შემოსავლების ნაწილში გეგმა გადაჭარბებით შესრულდება,_ თქვა პავლე ჭყონიამ.
პავლე ჭყონიამ ისაუბრა პრიორიტეტებზე, რომელზეც ხარჯები ყველაზე მეტია.
_ჩვენ ვიცით, რომ გვაქვს პრიორიტეტები. ეს არის ინფრასტრუქტურა, სპორტი, განათლება, ეკონომიკის განვითარება, გარემოს დაცვა და დასუფთავება. შესაბამისად 65%-70%-ის ფარგლებში მერყეობს კონკრეტულ პრიორიტეტებზე შესრულებები, _ განაცხადა მან და დასასრულს ხაზგასმით განმარტა, რომ თანხების დეფიციტი არცერთ პროგრამულ მუხლში არ ააქვთ. ამის დასტურად კი მოიყვანა მაგალითები, რომ სოციალური პროექტები, მომართვანობა დაკმაყოფილებულია.
_შეგვიძლია ვთქვათ, რომ ამ მომენტში დინამიკა დადებითია, როგორც შემოსულობის ნაწილში და შესაბამისად ვფიქრობ, აღნიშნული წელი წარმატებით დასრულდება , _ ასე დაასრულა სიტყვით გამოსვლა პავლე ჭყონიამ.
საკრებულოს სხდომაზე განიხილეს და მუნიციპალიტეტის მერს თანხმობა მისცეს ა(ა)იპ ოზურგეთის მუნიციპალიტეტის სკოლამდელი აღზრდის ცენტრის და სოფელ ცხემლისხიდის საბავშვო ბაღის მიერ ოზურგეთის მუნიციპალიტეტის სახელით გერმანიის ფედერაციული რესპუბლიკისგან გრანტის მიღების თაობაზე.
საკითხის ირგვლივ მუნიციპალიტეტის მერის მოადგილემ სოფო რამიშვილმა ისაუბრა.
_ჩვენ განვიხილეთ პროექტი რომელსაც თანხმობა მიეცემა ოზურგეთის მუნიციპალიტეტის სკოლამდელი აღზრდის ცენტრსა და ცენტრის შემადგენლობაში არსებულ ცხემლისხიდის საბავშვო ბაღს, რომ მიიღოს გრანტი გერმანიის ფედერაციული რესპუბლიკიდან, რომელსაც საქართველოში გერმანიის საელჩო წარმოადგენს. გრანტის ბიუჯეტი 27 ათას 400 ლარია. ის მოხმარდება ცხემლისხიდში საბავშვო ბაღის ეზოების, ინკლუზიური გარემოს მოწყობას და ინფრასტრუქტურის განვითარებას, _თქვა სოფო რამიშვილმა.
სხდომაზე განხილული დღის წესრიგით გათვალისწინებული ექვსი საკითხიდან , მნიშვნელოვანი იყო ქუჩებისთვის სახელის მინიჭების საკითხი. ცნობილია, რომ ეს პროცესი ჯერ არ დასრულებულა და გადაადგილებისას საკმაოდ რთულ ვითარებას ქმნის.
საკრებულოს გადაწყვეტილებით დამტკიცდა დაბა ურეკში ქუჩების სახელდების შესახებ განკარგულების პროექტები. საკრებულოს გადაწყვეტილებით, N19 ქუჩას წყალწმინდის, ხოლო უსახელო ქუჩას ალექსანდრე ჟორჟოლიანის სახელი მიენიჭა.
საკრებულომ, ასევე, განიხილა და დაამტკიცა ქალთა და ბავშვთა საკითხებზე მომუშავე მუნიციპალური საბჭოს შექმნის, მისი დებულების და პერსონალური შემადგენლობის განკარგულების პროექტები. საკითხის ირგვლივ საკრებულოს წევრმა ნინო ჭანიშვილმა ისაუბრა.
საკრებულომ საბოლოოდ, თანხმობა მისცა მერს ა(ა)იპ ოზურგეთის მუნიციპალიტეტის სკოლამდელი აღზრდის ცენტრის და სოფელ ცხემლისხიდის საბავშვო ბაღის მიერ, ოზურგეთის მუნიციპალიტეტის სახელით გერმანიის ფედერაციული რესპუბლიკისგან გრანტის მიღების თაობაზე;
აგრეთვე, საკრებულომ მოისმინა და ცნობად მიიღო 2025 წლის ბიუჯეტის III კვარტლის შესრულების ანგარიში, რაზეც ისაუბრა საფინანსო სამსახურის უფროსმა, პავლე ჭყონიამ.
ავტორი
