30 ივლისს, ოზურგეთის მუნიციპალიტეტის საკრებულოს რიგგარეშე სხდომაზე 2021 წლის ბიუჯეტში ცვლილების საკითხი განიხილეს.
_ დღეს ბიუჯეტში ცვლილება შეგვაქვს. ეს იქნება 2020 წლის 30 დეკემბრის დადგენილებაში ცვლილება და ბოლოა ეს ცვლილება. ამ საკრებულოს შემადგენლობის მიერ, რადგან ვიცით, რომ ოქტომბერში ადგილობრივი თვითმმართველობის არჩევნებია, _ თქვა საკრებულოს თავმჯდომარემ, დავით დარჩიამ სხდომის გახსნისას.
ბიუჯეტში ცვლილების თაობაზე საფინანსო სამსახურის უფროსმა გია მამაკაიშვილმა ისაუბრა.
_ დღემდე ბიუჯეტი იყო 25 მილიონ 104 ათასი ლარი. ახლანდელი ცვლილებით გაიზარდა 13 მილიონ 393 ათასი ლარით და შეადგინა 38 მილიონ 497 ათასი ლარი. მნიშვნელობა აქვს, გითხრათ, რატომ იზრდება 13 მილიონი ლარით და რატომ არის ამდენი ნაშთი, _ თქვა მამაკაიშვილმა და დააკონკრეტა, რომ 1 მლნ 832 ათასი ლარი _ ეს არის გადმომავალი ნაშთი; _ 215 648 ათასი ლარი არის საკუთარი ნაშთი, 16 017 არის მიზნობრივი ტრანსფერის ნაშთი _ დანარჩენი თანხა კი შეადგენს საქართველოს მთავრობის სხვდასხვა განკარგულებებიდან წარმოშობილ ნაშთებს, _ თქვა გია მამაკაიშვილმა.
მან, ასევე, პუნქტობრივად ჩამოთვლა რეგიონებში გასახორციელებელი პროექტების ფონდიდან გამოყოფილი თანხები: 8 179947 ლარი, სოფლის მხარდაჭერის პროგრამით გამოყოფილი მილიონ 086 ათასი ლარი, საჯარო სკოლების დელეგირებისთვის (მცირე სარეაბილიტაციო სამუშაოები და მოსწავლეთა გადაყვანა), ჯამურად 493 680 ლარი. სტიქიის შედეგების სალიკვიდაციოდ გამოყოფილი იყო და ასახულია 1 500 000 ლარი, ფინანსთა სამინისტროდან მიღებული ფისკალური პროგნოზების შესაბამისად 261 200 ლარის. ეს არის საბავშვო ბაღების სამფაზიანი ელექტრომომარაგებით და ელექტროღუმელებით უზრუნველყოფა _ 476848 ლარის მობილიზება მოხდა და ელექტროენერგიის მოხმარების ხარჯი 102 ათასი ლარით გაიზარდა. შპს „სატისსს“, რომელიც ახდენს შიდა ქსელის და სოფლების წყალსადენი სისტემების რეაბილიტაციას, _ასი ათასი ლარით გაუზარდეს სუბსიდირება.
მცირე შენიშვნების შემდეგ, საკრებულომ ბიუჯეტში ცვლილებას, როგორც დასაწყისში თავმჯდომარემ აღნიშნა, ამ შემადგენლობით, ბოლო ცვლილებას, მხარი დაუჭირა.
კიდევ ერთ ცვლილებაზე, ოღონდ მორიგ წესში, რომელიც წარმატებულთა დაჯილდოებას ეხებოდა, საკრებულოს დეპუტატმა, განათლების, კულტურის, სპორტის, ახალგაზრდულ საქმეთა, ჯანმრთელობისა და სოციალურ საკითხთა კომისიის თავმჯდომარემ ლელა საჯაიამ წარმოადგინა.
მან წარმატებული სპორტსმენების დაჯილდოვების წესში ცვლილებების თაობაზე ინიციატივა გააჟღერა. კერძოდ, მსოფლიო ჩემპიონებისათვის გაიზარდოს დასაჯილდოვებელი თანხა 3 000 ლარის ოდენობით, ხოლო ევროპის ჩემპიონობის შემთხვევაში 1500 ლარის ოდენობით და მოიხსნას წესში გაწერლი ასაკობრივი სხვაობა. მანვე, მსოფლიო და ევროპის ჩემპიონის აღმზრდელი კლუბისათვის დასაჯილოდვებელი თანხის ათასი ლარის ოდენობით დაწესება მოითხოვა.
დარგობრივი კომისიის თავმჯდომარის ამ ინიციატივას საკრებულომ მხარი დაუჭირა.
[sexy_author_bio]
