8 თებერვალს, ოზურგეთის მუნიციპალიტეტის საკრებულოს მორიგი სხდომა გაიმართა. დღის წესრიგის განხილვამდე, საკრებულოს თავმჯდომარემ, დავით დარჩიამ, საკრებულოს წევრებს მიმართა, რომ წუთიერი დუმილით პატივი ეცათ თურქეთში მომხდარი მიწისძვრის შედეგად დაღუპულთა ხსოვნისთვის.
_ მეგობრებო, ყველამ ვიცით, რა ტრაგედია დატრიალდა მეზობელ მეგობარ ქვეყანაში. გამოვთქვამთ წუხილს და გთხოვთ, პატივი მივაგოთ დაღუპულთა ხსოვნას წუთიერი დუმილით, _ თქვა მან.
საკრებულოს წევრებმა, სხდომის ყველა დამსწრესთან ერთად, პატივი მიაგეს დაღუპულთა ხსოვნას.
შემდეგ, 2022 წელს გაწეული საქმიანობის შესახებ თავად დავით დარჩიამ, როგორც საკრებულოს თავმჯდომარემ, სხდომას ანგარიში წარუდგინა.
თავისი გამოსვლისას მან ისაუბრა წლის მანძილზე მიღებულ ძირითად გადაწყვეტილებებზე, მნიშვნელოვან ინიცირებულ საკითხებზე, რომლებიც შეეხებოდა ყველა ნორმატიულ აქტს, დადგენილებებს, ასევე, მნიშვნელოვან ინფრასტრუქტურულ პროექტებს, რომლებსაც მხარი დაუჭირეს წლის მანძილზე და წარმატებულად იქნა მიჩნეული.
_ მეგობრებო, მე შემიძლია განვაცხადო, რომ გასული წელი განსაკუთრებული იყო გახორციელებული სოციალური, ინფრასტრუქტურული პროექტებით. ამ პროექტების წარმატებით დასრულების შემდეგ, ჩვენს მუნიციპალიტეტში შესამჩნევად შეიცვალა სოციალურ-ეკონომიკური და ყოფითი პირობები. ეს იმედის მომცემია და თავისუფლად შემიძლია ვთქვა, რომ 2023 წელი და კიდევ მომდევნო წლები, მეტი წარმატების მომტანი იქნება ჩვენი მუნიციპალიტეტისთვის, ზოგადად, მთელი ჩვენი ქვეყნისთვის.
თუ გადავხედავთ ქვეყანაში მიმდინარე პოლიტიკურ და სოციალურ-ეკონომიკურ პროცესებს და გავაკეთებთ ანალიზს, ცალსახად დავინახავთ, რომ პარტია “ქართული ოცნება-დემოკრატიული საქართველო” არის ის ძალა, რომელიც უზრუნველყოფს ქვეყნის სტაბილურობას და საქართველოს ევროპულ მომავალს, _ თქვა დავით დარჩიამ.
მან, ასევე, საკრებულოს წარუდგინა სტატისტიკური ინფორმაცია გაწეული მუშაობის შესახებ.
_ წარმომადგენლობითი და აღმასრულებელი რგოლი _ ოზურგეთის საკრებულო და მერია, მუშაობს კოორდინირებულად, წარმატებით, რისი დასტურია პრიორიტეტულ მიმართულებებზე აქცენტირება. ეს მუნიციპალიტეტის უმთავრეს საფინანსო დოკუმენტებშია ასახული და ყველაფერი კეთდება მის გასახორციელებლად, _ თქვა დარჩიამ.
ფრაქცია “ქართულმა ოცნებამ”, ასევე საკრებულოს წევრებმა, დადებითად შეაფასეს დავით დარჩიას მიერ წარმოდგენილი მოხსენება და ზოგადად, 2022 წელს, საკრებულოს მუშაობა.
ოზურგეთის მუნიციპალიტეტის მერის პირველმა მოადგილემ, გიორგი ღურჯუმელიძემ ისაუბრა რეგიონული ფონდიდან დაფინანსებული და გასახორციელებელი ინფრასტრუქტურული პროექტების შესახებ, რომლის კორექტირებაც უნდა მოხდეს.
_ რეგიონული ფონდიდან გასახორციელებელ ინფრასტრუქტურულ პროექტში მოხდა ცვლილება, რომელიც სოფელ შრომაში გასაკეთებელ გზას ეხება. წარმოვადგინეთ კორექტირებული ვერსია, რომელსაც საკრებულომ მხარი დაუჭირა, _ თქვა გიორგი ღურჯუმელიძემ.
საკრებულოს სხდომის დღის წესრიგის საკითხებიდან, უმეტესი ნაწილი ეხებოდა სხვადასხვა განკარგულებების მიღებას და საჯარო ადმინისტრაციული წარმოების დაწყებას.
აღნიშნული საკითხებიდან, ხუთის ირგვლივ ცვლილებები გახორციელდა, კონკრეტულად:
სოფელ დვაბზუს ადმინისტრაციულ ერთეულში მდებარე ქუჩებისთვის, ცნობილი ქართველი ენათმეცნიერის და ლექსიკოლოგის, ალექსანდრე ღლონტის სახელის მინიჭების შესახებ.
_ აღნიშნული განკარგულების პუნქტი, უნდა გახორციელდეს შემდეგი სახით: #1 და#3 ქუჩებს უნდა მიენიჭოს მეცნიერის სახელი. ხოლო ოზურგეთის მუნიციპალიტეტის მერიამ, ოთხი თვის ვადაში უნდა უზრუნველყოს ყველა საჭირო ღონისძიების გატარება, _ თქვეს სხდომაზე.
განკარგულების შესრულებაზე მსჯელობისას წარმოადგინეს სოფელში მდებარე აღნიშნული ქუჩების რუკა.
ჩვიდმეტი საკითხიდან გათვალისწინებული ყველა განკარგულებას მხარი დადებითად დაუჭირეს.
ოზურგეთის მუნიციპალიტეტის საკრებულოს “გენდერული თანასწორობის საბჭოს” შექმნის და პერსონალური შემადგენლობის დამტკიცების შესახებ”, განკარგულებაში ცვლილების შეტანის თაობაზე, საკრებულოს წევრმა, ნინო ჭანიშვილმა ისაუბრა _ პირველი მუხლი შეიცვალა და რედაქციის მიხედვით, “გენდერული თანასწორობის საბჭო”, 21 წევრის შემადგენლობით დადგინდა. მასში არიან, საკრებულოს წევრები, როგორც “ქართული ოცნების”, ისე “ერთიანი ნაციონალური მოძრაობის” და ფრაქცია “ოზურგეთი საქართველოსთვის” წევრები. სულ ათი ქალბატონი და თერთმეტი მამაკაცი.
დადგენილებაში ცვლილების პარალელურად, დაამტკიცეს 2023 -2025 წლის სამოქმედო გეგმა.
“ოზურგეთის მუნიციპალიტეტის საკუთრებაში არსებული უძრავი ქონების სარგებლობის უფლებით, ა(ა)იპ სპორტულ გამაჯანსაღებელ დაწესებულებათა გაერთიანებისთვის გადაცემაზე”, საკრებულომ, ასევე, მიიღო განკარგულება. ცვლილების შემდეგ, ოზურგეთში, რუსთაველის ქუჩაზე (#28) მდებარე უძრავი ქონების, არასასოფლო-სამეურნეო დანიშნულების მიწის ნაკვეთი, მასზე არსებული 949.33 კვ.მ. შენობა-ნაგებობით) სარგებლობაში, უსასყიდლოდ, უზურფრუქტის ფორმით, პირდაპირი განკარგვის წესით, იურიდიული პირის არსებობის ვადით, ა(ა)იპ ოზურგეთის მუნიციპალიტეტის სპორტულ-გამაჯანსაღებელ დაწესებულებათა გაერთიანებისთვის, მუნიციპალიტეტის მერისთვის თანხმობის მიცემას ეხებოდა.
განკარგულება მიიღეს.
ასევე, ცვლილება მოხდა და განიხილეს დადგენილება “ოზურგეთში გამსახურდიას მოედანთან საგზაო ნიშნების განთავსების ორგანიზების შესახებ”.
კერძოდ, ოზურგეთში, გამსახურდიას მოედანთან, სადაც ახლა სარეაბილიტაციო სამუშაოები დასრულების ფაზაშია, უნდა განთავსდეს საგზაო ნიშანი: “გაჩერება აკრძალულია”, თანდართული სიტუაციური სქემის შესაბამისად. განკარგულების შესაბამისად კი, ოზურგეთის მერიას ღონისძიებების გატარება დაევალა.
აღსანიშნავია, რომ ეს გადაწყვეტილება მნიშვნელოვანია და ოზურგეთელ მოქალაქეთა (რომლებმაც აღნიშნულის თაობაზე “გურია ნიუსსაც” მომართეს) ეჭვს, რომ აქ ადგილს ავტოსადგომად გამოიყენებდნენ მავანნი, ფანტავს.
როგორც თავიდანვე აღვნიშნეთ, ცვლილება შევიდა განკარგულებაში: “მუნიციპალიტეტის ტერიტორიაზე 2023 წელში, რეგიონში გასახორციელებელი პროექტების ფონდიდან, გასახორციელებელი და დასაფინანსებელი ინფრასტრუქტურული პროექტების მოწონების თაობაზე”.
საკრებულოს წევრები მოწონებით შეხვდნენ საჯარო ადმინისტრაციული წარმოების დაწყებას “2023 წლის ბიუჯეტით გათვალისწინებული ქვეპროგრამის “ოზურგეთის მუნიციპალიტეტის მერის სტიპენდიები წარჩინებულ სტუდენტებს”, ფარგლებში გამოყოფილი ასიგნებებიდან წარჩინებული სტუდენტებისთვის სტიპენდიის გაცემის წესის დამტკიცების შესახებ.
წარჩინებულ სტუდენტთა დაჯილდოება ყოველთვის მნიშვნელოვან ნაბიჯად აღიქმება სახელმწიფოს მხრიდან, ახალგაზრდების დასახმარებლად და საკრებულოს წევრები ამ საკითხს განსაკუთრებული სიხარულით შეხვდნენ.
აღსანიშნავია, რომ რვა თებერვლის საკრებულოს სხდომა, დაპირისპირების, დავის და ხმაურის გარეშე დასრულდა, რაც ამ მოწვევის საკრებულოს მუშაობის პერიოდში გამონაკლისია.
ავტორი
