29 აგვისტოს, ზაფხულის ბოლოს, ოზურგეთის საკრებულომ მორიგი სხდომების ციკლი განაახლა. დღის წესრიგის ოთხი ძირთადი საკითხი (მეხუთე იყო „სხვადასხვა საკითხები: მიმართვები, განცხადებები და ასე შემდეგ…) სხდომას საკრებულოს თავმჯდომარემ, დავით დარჩიამ წარუდგინა, რაზეც მოკლედ და თანმიმდევრულად იმსჯელეს.
საკრებულოს გადაწყვეტილებით, დამტკიცდა შემდეგი განკარგულების პროექტი: ,,მუნიციპალიტეტის, დაბა ურეკი 2-ის ტერიტორიაზე ტურისტულ-დასასვენებელი სარეკრეაციო კომპლექსის განაშენიანების დეტალური გეგმის შემუშავების, ინიცირების თაობაზე – ოზურგეთის მუნიციპალიტეტის მერის გადაწყვეტილების შეთანხმების შესახებ. კერძოდ: განაშენიანების დეტალური გეგმის დავალებაში შედის სხვადასხვა საკითხი: წარმოსადგენი დოკუმენტაცია, სახელმძღვანელო კანონმდებლობა, განაშენიანების დეტალური გეგმის კონცეფციის შემადგენლობა და ასე შემდეგ. განაშენიანების დეტალური გეგმის პროექტი წარმოდგენილი უნდა იქნეს ადმინისტრაციული ხელშეკრულების გაფორმებიდან 18 თვის ვადაში.
შემდეგი საკითხი _ საჯარო ადმინისტრაციული წარმოება დაიწყო: ,, მუნიციპალიტეტის საკუთრებაში არსებული უძრავი ქონების საპრივატიზაციო ობიექტების ნუსხისა და პრივატიზაციის გეგმის დამტკიცების თაობაზე”, _ განკარგულებების მისაღებად.
საკითხი _ „ინფორმაცია 2024 წლის 1 ივლისის მდგომარეობით, ონკოლოგიური დაავადებების მქონე პირების დახმარების პროგრამის შესრულების შესახებ“, ონკოლოგიური დაავადებების მქონე პირების დახმარების პროგრამის შესრულების ანალიზით, საკრებულოს წევრმა ქეთევან ხომერიკმა ვრცლად წარმოადგინა.
უნდა აღინიშნოს, რომ ეს თემა საზოგადოებისთვის მეტად მტკივნეული და აქტუალურია.
_ წარმოგიდგენთ ინფორმაციას მუნიციპალიტეტის მერიის მიერ, ონკოლოგიური დაავადებების მქონე პირების დახმარების პროგრამის შესრულების შესახებ. ერთი მხრივ, სამწუხაროდ, მეორე მხრივ, საბედნიეროდ, აღნიშნული პროგრამა არსებობს და იგი პასუხობს მუნიციპალიტეტის საკრებულოს მიერ, დამტკიცებულ ბიუჯეტს და იგი წლიდან წლამდე უფრო მრავალფეროვანი, მიზანმიმართული და ეფექტური ხდება. უმჯობესდება ამ პირების მომსახურება და იზრდება დაფინანსების მოცულობაც. ამ პაციენტების საჭიროებების დაკმაყოფილება და ხარისხიანი სერვისის ხელმისაწვდომობა შესაბამისი უწყებების ერთ-ერთი პრიორიტეტია, _ თქვა ხომერიკმა და დააზუსტა, რომ 2022 წლის ნოემბრიდან ონკოლოგიური დიაგნოზის მქონე პაციენტების მკურნალობისა და მედიკამენტების წლიური ლიმიტი ყველა ბენეფიციარისთვის, 25 ათას ლარამდე გაიზარდა და ეს ხდება პაციენტის თანაგადახდის გარეშე. უახლოესი პერიოდისთვის კი იგეგმება აღნიშნული დაფინანსების ლიმიტის გაზრდა.
მისივე თქმით, მიმდინარე წელს სახელმწიფო 350 მილიონ ლარზე მეტს დახარჯავს ონკოპაციენტების სამკურნალოდ. შედარებისთვის საკმარისია ის ფაქტი, რომ 2012 წლისთვის აღნიშნული მაჩვენებელი 17 მილიონ ლარს შეადგენდა.
ამ წლის მარტიდან კი, ამოქმედდა კიბოს ადრეული დიაგნოსტიკის პროგრამა, რომელიც ყველაზე ეფექტური ღონისძიებაა ონკოლოგიური დაავადებების ადრეულ ეტაპზე გამოსავლენად.
ქეთევან ხომერიკმა სახელმწიფო უწყების მიერ გახორციელებული რეფორმების პარალელურად, ონკოპაციენტების მდგომარეობის შესამსუბუქებლად, ოზურგეთის მუნიციპალიტეტის მერიის წვლილზეც ისაუბრა:
_ ბოლო ორი წლის მანძილზე მერიამ უნიშვნელოვანესად გააუმჯობესა ონკოლოგიურ დაავადებულ პირთა მომსახურეობა. მაგალითად, თუ სახელმწიფო ან სხვა სადაზღვევო კომპანიის მიერ ასანაზღაურებელი თანხის 40% არ აღემატება 200 ლარს, მაშინ მერია სრულად აანაზღაურებს მოთხოვნილ თანხას.
ქეთევან ხომერიკმა, ასევე, დეტალურად ისაუბრა სხვა სიახლეებზეც. მაგალითად: მუნიციპალიტეტის მერიამ პირველად მიიღო გადაწყვეტილება პრეპარატ „ზომეტას“ დაფინანსების შესახებ. აღნიშნული პროექტი ითვალისწინებს ბენეფიციარის წლის განმავლობაში ათასი ლარით დაფინანსებას.
ხომერიკმა სტატისტიკურ მონაცემებზეც გაამახვილა ყურადღება _ მიმდინარე წლის აგვისტოს მდგომარეობით, თანადაფინანსების შესახებ, 520-მა ბენეფიციარმა მიმართა მერიას. აქედან კი 120 მოქალაქეს მედიკამენტებით გაეწია დახმარება. ავთვისებიანი დიაგნოზის მქონე 330 მოქალაქეს კი, სამედიცინო დაწესებულებებში 129540 ლარზე მეტი ჩაერიცხა.
საკრებულომ, შენიშვნის გარეშე მოისმინა და ცნობად მიიღო ეს ინფორმაცია, 2024 წლის 1 ივლისის მდგომარეობით, ონკოლოგიური დაავადებების მქონე პირების დახმარების პროგრამის შესრულების შესახებ.
სხვადასხვა საკითხების, მიმართვების თუ განცხადებებისთვის, საკრებულოს სხდომის დღის წესრიგით გათვალისწინებული საკითხების მოსმენის შემდეგ, საკრებულოში ტრადიციულად უთმობენ დროს გამოსვლის მსურველებს.
საკრებულოს წევრმა გელა ჩავლეშვილმა თავისი გამოსვლა დაიწყო იმით, რომ „დაიტანჯა უცხოეთი საქართველოს მკვდარი ოპოზიციით“.
_ რა არ მოიფიქრეს, დემოკრატიის ფესტივალებიც კი ჩაატარეს დანიის სამეფოს დაფინანსებით და სააკაშვილის სურათებით და ამ დღეებში რაღაც ამდაგვარს კიდევ აპირებენ, მგონი. კეზერაშვილის საპირწონედ მოფიქრებული ფანდი კიდევ ცალკე სალაპარაკო თემაა. ეს ხრიკი უკვე იმდენად სასაცილოა, ჰელსინკის კავშირმა თუ ამისთვის მოიცალა, რა ვიცი… იმ შორეული ქვეყნიდან მიიღეს, ალბათ, დავალება. არჩევნები ახლოვდება და კიდევ მრავალ დეზინფორმაციას შემოაგდებენ, ეტყობა, მაგრამ მაინც არაფერი ეშველებათ, ჩემი აზრით, _ თქვა მან და განსაკუთრებით უარყოფითად და სასაცილო შეაფასა ამერიკის პრეზიდენტის წერილი, მისივე თქმით, კონსტიტუციის მიღმა მდგარ პრეზიდენტ ზურაბიშვილისადმი.
_ ვციტირებ: „იმედგაცრუებული ვარ საქართველოს მთავრობის ანტიდემოკრატიული ქმედებებით, რომელსაც წარმოადგენს კრემლის მიერ მიღებული უცხოური აგენტების კანონი. საქართველოს მთავრობის ოფიციალური პირების განცხადებები არ შეესაბამება ევროკავშირის და ნატოს წევრობის კანდიდატობის მსურველს“, _ ამას წერს აშშ პრეზიდენტი, იმ ქვეყნის პრეზიდენტი, რომელ ქვეყანაშიც საფოსტო გზავნილებით ატარებენ არჩევნებს, სადაც არჩევნებში სასაფლაოს მკვდრები მონაწილეობს, სადაც კონგრესში ირჩევენ გარდაცვლილ ადამიანებს და პოლიტიკურ ოპონენტს ტერორს უცხადებენ, თან ლიკვიდაციით ემუქრებიან, _ თქვა მან. დარბაზში კი მისივე პარტიის წევრმა დეპუტატება ხმადაბლა ჩაილაპარაკეს: „მოასორომგორომა ამერიკა“.
_ ახლა ვიტყვი იმ 95-მილიონიანი დახმარების შეჩერების თაობაზეც, _ გააგრძელა ჩავლეშვილმა, _ მოვიშველიებ ამერიკის დეპარტამენტის შეფასებას, რომ თითქოს, საქართველოს მთავრობის განცხადებები არ შეესაბამება ევროკავშირის და ნატოს სტანდარტებს. ახლა ამასაც გვაბრალებენ, როცა მსოფლიოს წამყვანი საერთაშორისო ორგანიზაციების შეფასების ინდიკატორით, საქართველოში 40%-ითაა გაუმჯობესებული სამოქალაქო თავისუფლება, ადამიანის უფლებების დაცვა, სასამართლოს ეფექტიანობა, კორუფციის კონტროლი თუ პოლიტიკური უფლებების დაცვა. როცა ასეთი წარმატებით ხარ შეიარაღებული, ოპოზიცია კი ამოტრალებული რიტორიკით საუბრობს, ხომ ცხადია ყველაფერი. ახლა მოსწონთ რუსეთთან ურთიერთობა, ლიკა ხოშტარია ძუძუს გოჭივით რომ არის გატრუნული. დარწუნებული ვარ, მათ არაფერი აქვთ ქართველ ამომრჩეველთან მისატანი. 26 ოქტომბერს ქართველი ხალხი გააკეთებს სწორ არჩევანს, რადგან მშვიდობას და განვითარებას ალტერნტივა არ აქვს, _ ოპტიმისტურ ნოტაზე დაასრულა საკუთარი გამოსვლა გელა ჩავლეშვილმა.
ავტორი
