ევროკავშირის ფინანსური მხარდაჭერით, ჩვენს რეგიონში გახორციელდება პროექტი „მწვანე გურია“. პრეზენტაცია ოზურგეთის ტექნოპარკში შედგა.
აღნიშულ პროექტთან დაკავშირებით, ეს იყო სრულფასოვანი საინფორმაციო შეხვედრა ჩოხატაურის, ლანჩხუთისა და ოზურგეთის მუნიციპალიტეტების მერიის თანამშრომლებთან, სხვადასხვა წარმატებული პროექტების წარმომადგენლებთან და რაც მთავარია, ახალგაზრდებთან.
ეს ახალი პროექტი „მწვანე გურია” – ადგილობრივი დემოკრატიისა და სოფლის განვითარების მხარდაჭერა ინკლუზიური და მდგრადი მწვანე ზრდისთვის“, ძირითადად ითვალისწინებს სოფლის, ადგილობრივი დემოკრატიის განვითარებას, მდგრად მწვანე ზრდას. ამის შესახებ, პროექტის მენეჯერმა, ნინო გაფრინდაშვილმა ისაუბრა.
_ზოგადად, ევროკავშირი მხარს უჭერს საქართველოში სოფლის განვითარებას. ENPARD IV – (ენპარდი) ის ფარგლებში, უკვე დავიწყეთ გურიაში მუშაობა. პროექტის მიზანია, სიღარიბის შემცირება და მოწყვლადი თემებისთვის ეკონომიკური, სოციალური, საცხოვრებელი პირობების გაუმჯობესება”,_ თქვა მან და ასევე დეტალურად ისაუბრა იმ ოთხი კომპონენტის შესახებ, რისგანაც პროექტი შედეგება:
_ პირველი კომპონენტია ოზურგეთის, ლანჩხუთის და ჩოხატაურის მუნიციპალიტეტებში LAG-ების შექმნა და მათი ინსტიტუციონალური გაძლიერება. Local Action Group – ეს არის ერთგვარი აქტიურ მოქალაქეთა გაერთიანება.
მეორე კომპონენტია, როდესაც ჩამოყალიბდება აღნიშნულ LAG-ები და სამივე მუნიციპალიტეტისთვის შეიქმნება ადგილობრივი განვითარების სტრატეგიები.
მესამე კომპონენტი იქნება უკვე ადგილობრივი ეკონომიკის გამწვანება და დივერსიფიკაცია, ინოვაციური და სხვადასხვა სადემონსტრაციო ღონისძიებების გახორციელებით.
მეოთხე კომპონენტი არის სამოქალაქო ჩართულობის პროცესების ხელშეწყობა და ქალების, ახალგაზრდების, ადგილობრივი სამოქალაქო ორგანიზაციებისა და საზოგადოების გაძლიერება, რათა მათ დაიცვან თავიანთი უფლებები.
პრეზენტაციაზე მისასალმებელი სიტყვით წარდგნენ: ნანა ჯანაშია, აღმასრულებელი დირექტორი, CENN; ქეთევან ხუციშვილი, პროექტის მენეჯერი, ევროკავშირის დელეგაცია საქართველოში; ეკატერინე ზვიადაძე – პოლიტიკის კოორდინაციისა და ანალიტიკის დეპარტამენტის ხელმძღვანელი,საქართველოს გარემოს დაცვისა და სოფლის მეურნეობის სამინისტრო; კარლო ამირგულაშვილი – საქართველოს გარემოს დაცვისა და სოფლის მეურნეობის სამინისტროს ბიომრავალფეროვნებისა და სატყეო დეპარტამენტის უფროსი.
პროექტის პრეზენტაციის მონაწილეებს სიტყვებით მიმართეს: გურიის სახელმწიფო რწმუნებულმა გიორგი ურუშაძემ; ჩოხატაურის, ოზურგეთის, ლანჩხუთის მუნიციპალიტეტების მერის პირველმა მოადგილეებმა მაია კუტუბიძემ, გიორგი ღურჯუმელიძემ, ეკა გუჯაბიძემ.
პროექტი ევროკავშირის ფინანსური მხარდაჭერით ხორცილედება CENN პარტნიორ ორგანიზაციებთან, ახალგაზრდა პედაგოგთა კავშირთან, დემოკრატიის ინსტიტუტთან და ქედის ადგილობრივი განვითარების ჯგუფთან (LAG) – თანამშრომლობით, ევროკავშირის მხარდაჭერით მიმდინარე სოფლისა და სოფლის მეურნეობის განვითარების ევროპის სამეზობლო პროგრამის ENPARD IV-ის ფარგლებში.
ავტორი
