ოზურგეთის თეატრი საიუბილეო თარიღის წინ:  „მსურს,  ცვლილებებსა  და უახლოეს გეგმებზე გესაუბროთ“

ოზურგეთის ალ. წუწუნვას სახელობის თეატრის  სამხატვრო ხელმძრვანელმა, ვასო ჩიგოგიძემ, ჟურნალისტებთან  საგანგებო შეხვედრა გამართა.

მისი თქმით, ყველასთვის ცნობილია, რომ თეატრალური სეზონი იწყება შემოდგომაზე და მთავრდება გაზაფხულზე. 

მან  გამოთქვა  სურვილი,   ამომწურავად  ესაუბრა როგორც ჩატარებულ, განვლილ პერიოდზე, წარმატებულ გასტროლებზე, ასევე  თეატრში მომხდარ ცვლილებებზე და  უახლოეს გეგმებზე.

ოზურგეთის თეატრის მდიდარი და ცნობილი შემოქმედებითი ისტორია, რომელიც თეატრის ყველა მოყვარულის და რიგითი მაყურებლისთვის არის ცნობილი, ვასო ჩიგოგიძემ საკმაოდ ვრცლად მიმოიხილა.

მან თქვა, რომ გავლილ თვეებში განსაკუთრებით საინტერესო და მნიშვნელოვანი იყო, ოზურგეთის თეატრის გასტროლები დედაქალაქში, რუსთაველის, თუმანიშვილის და საქართველოში ყველაზე უძველეს გრიბოედოვის თეატრში.

_უმთავრესი, რაც გამოიკვეთა, ჩვენ შეგვძლებია, შეგვაძლებინეს და მივაღწიეთ პროექტში მონაწილეობას. გავიმარჯვეთ და  პროექტი დაფინანსდა კულტურის სამინისტროს მიერ.  რაც მთავარია, როგორც ექსპერიმენტი, რეგიონული  თეატრებისთვის  შეიქმნა პრეცედენტი! ჩვენ ასე ვთქვათ, ვერძის როლში აღმოვჩნდით! როცა ჩადიხარ დედაქალაქში და ხუთ სხვადასხვა  სცენაზე ვთამაშობთ,  ვდგამთ ჩვენს სპექტაკლებს, ეს არის დიდი პატივი!  თუმცა,  შედარებით ადვილი იქნებოდა ერთ კონკრეტულ სცენაზე თამაში.  ასევე, მინდა, სიხარულით გითხრათ, რომ  უდიდესი მნიშვნელობის  ფაქტია,   კულტურის სამინისტროს მიერ „ოქროს ფონდის“ შექმნა.  მასში ჩვენი სპექტაკლი „რესპუბლიკა გურია“ შევიდა, _ თქვა ბატონმა ვასომ  და გამორჩეულად ისაუბრა ამ სპექტაკლზე, როგორც გურულებისთვის ერთგვარ „სავიზიტო ბარათზე“.

მან  ასევე ისაუბრა გრიბოედოვის თეატრში დადგმულ „რეკვიემზე“. თუმანიშვილის თეატრში დადგმულ „3+3“-ზე. 

სპექტაკლი  „დედა ომი“  თუმანიშვილის სარეპეტიციო სივრცეს ისე მოერგო, აღფრთოვანებული ვართ! ტევა არ იყო, იმდენი ადამიანი მოვიდა!  რვა ნოემბერს დავხურეთ თბილისის გასტროლები, სადაც ცხრა სპექტაკლი ვითამაშეთ! შინ წამოსვლისას  კი  შევიარეთ გორის თეატრში. ასე დასრულდა ჩვენი საგასტროლო  ტურნე, სადაც,  მიუხედავად დიდი შემოქმედებითი დაძაბულობისა და ასე ვთქვათ, უდასვენებო  დატვირთვისა, არანაირი უსიამოვნო პრეცეგენტი არ მომხდარა, _ თქვა ბატონმა ვასომ.

ვასო ჩიგოგიძემ ასევე ისაუბრა ახალგაზრდა, ნიჭიერ რეჟისორებზე, რომლებმაც ინოვაციური ხედვით და განსაკუთრებული ნიჭის, შრომისმოყვარეობის წყალობით შექმნეს საინტერესო სპექტაკლები, რომლებმაც ასე დაშორებული მაყურებელი მოიზიდა.

ვასო ჩიგოგიძემ   განსაკუთრებით გაამახვილა ყურადღება თეატრში სხვადასხვა  საკადრო  ცვლილებებზე და თქვა, რომ სურს ღიად ისაუბროს ამ საკითხზე:

_სიახლე და ცვლილებებია  ოზურგეთის თეატრში სხვადასხვა დაკავებულ პოზიციაზე. მსურს,  გესაუბროთ ღიად.  ერთ–ერთი თანამშრომელი, პრესსამსახურის ხელმძღვანელი  გავიდა პენსიაზე და საკუთარი სურვილით დაწერა განცხადება წასვლის შესახებ. მოგეხსენებათ, აქამდე პრესსამსახურის შტატით განკუთვნილ პოზიციას, ახლა ჰქვია სამხატვრო ხელმძღვანელის თანაშემწე და ამ მოვალეობას ნათია მუქერია შეასრულებს, რომელიც აქამდე პრესსამსახურში მუშაობდა.  ასევე თეატრის დირექტორის პოზიციაზე კვლავ იქნება  იგივე ჩემს შვილად მიჩნეული, ჩემივე გაზრდილი,ზაზა ჯინჭარაძე, რომელიც დიდი ხანია, აქ მუშაობს და განსაკუთრებული პასუხისმგებლობით გამოირჩევა.   მთავარი ადმინისტრატორის პოზიციას შორენა გვეტაძე დაიკავებს. რაც შეეხება  ოზურგეთის თეატრის საზოგადოებასთან ურთიერთობის სამსახურის უფროსი  მენეჯერის შტატს, რომელიც ახალია, ამ პოზიციაზე  ეკა ნინიძე დაინიშნა. მას ყველა იცნობთ,_ თქვა ჩიგოგიძემ.

ეკა ნინიძე წარსულში პედაგოგად მუშაობდა არაერთ სკოლაში. ასევე იყო ოზურგეთის სკოლამდელი აღზრდის ცენტრის ხელმძღვანელი. დღეს, ასევე,  ერთ–ერთ სკოლაში მუშაობს პედაგოგად.

ვასო ჩიგოგიძემ ისაუბრა უახლოეს გეგმებზე  და თქვა, რომ განსაკუთრებული საორგანიზაციო და შემოქმედებითი სამუშაოები აქვთ ჩასატარებელი, რომლის შესარულებლად საზოგადოების, ჟურნალისტების,  ყველა მაყურებლის თანადგომა აუცილებელია.

_ადრე სცენა არ გვაძლევდა საშუალებას. ახლა კი, გაბრწყინებული შენობაში გვსურს აღვნიშნოთ ყველა მომავალი ზეიმი. განსაკუთრებით კი კარს მომდგარი ახალი წელი. თქვენ იცით, რა მასშტაბური სამუშაოები ჩატარდა ოზურგეთის თეატრის  რეაბილიტაცია  რომ მომხდარიყო. ახლა კი გვსურს,  გაბრწყინებულ შენობაში გაბრწყინებულად აღვნიშნოთ ახალი წელი.  გვინდა,  დავდგათ „კონკია“, რომლის ბედი მძიმეა, თუმცა, მომავალი „ჰეპი ენდით“ სრულდება და კეთილია ზღაპრის ბოლო. ბევრი ნეგატივია გარეთ და ძალიან დიდი სურვილი გვაქვს,  ჩვენს ხალხს ვაჩუქოთ სპექტაკლები. ასევე მსურს გითხრათ, რომ მხოლოდ საახალწლო ზეიმით არ შემოვიფარგლებით. სამი იანვრიდან გაგრძელდება როგორც საშობაო, ისე კალანდობისადმი  მიძღვნილი ტრადიციული ზეიმი,_ განაცხადა მან.

ვასო ჩიგოგიძემ ასევე დააანონსა, რომ მომავალ წელს დიდი სიუბილეო ფესტივალი ელოდება საზოგადოებას.

_მომავალ წელს, ივლისში,  ნოდარ დუმბაძის დაბადების 95-ე და ოზურგეთის თეატრის დაარსების 155-ე წლისთავია. ტრადიციულად გაიმართება ფესტივალი, რომელიც ამ უმნიშვნელოვანესი თარიღებისადმი ერთგვარი, გამორჩეული მიძღვნა იქნება, _ თქვა მან.

ვასო ჩიგოგიძემ, ასევე არაერთხელ გადაუხადა მადლობა კულტურის სამინისტროს და  ფონდ „ქართუს“, რომელმაც სრულად უზრუნველყო ოზურგეთის სახელმწიფო თეატრის რეაბილიტაცია.