ოზურგეთში, როგორც წინა წლებში, წელსაც, ნოემბრის ბოლოს მომავალი წლის მთავარი დოკუმენტის განხილვა მიმდინარეობს.
კოლეჯ ჰორიზონტის სააქტო დარბაზში დილით 11:00 საათზე დაგეგმილი შეხვედრა საათნახევრის დაგვიანებით დაიწყო.
ტრადიციულად, შეხვედრაზე ბიუჯეტით დაფინანსებული ორგანიზაციის თანამშრომლების სიმრავლეა. ამჯერადაც მოქალაქებმა ინერტულობა გამოიჩინეს და შეხვედრაზე არ მოვიდნენ. როგორც ამ შეხვედრაზე გახდა ცნობილი, დღეს დაგეგმილი მეორე შეხვედრა სოფელ ოზურგეთის კულტურის ცენტრში გაუქმდა და მოგვიანებით გახდება ცნობილი, როდის ჩატარდება.
2024 წლის ბიუჯეტის პროექტი 37 725 000 ლარით არის განსაზღვრული, – ამის შესახებ საზოგადოებას ინფორმაცია ოზურგეთის მუნიციპალიტეტის მერიის საფინანსო–საბიუჯეტო სამსახურის უფროსმა პავლე ჭყონიამ მიაწოდა. მისივე თქმით, 2023 წელს 34 480 000 ლარი იყო.
2024 წლის ბიუჯეტის პროექტის პრიორიტეტები იქნება: ინფრასტრუქტურის განვითარება; დასუფთავება და გარემოს დაცვა; განათლება; კულტურა, ახალგაზრდობა, სპორტი; ჯანმრთელობის დაცვა და სოცუზრუნველყოფა; ეკონომიკური განვითარება; მმართველობა და საერთო დანიშნულების ხარჯები.
შეხვედრას ესწრებოდა USAID-ის პროექტის ექსპერტი, რამაზ ბოლქვაძე.
„დღევანდელი შეხვედრა დაფინანსებულია USAID-ს პროექტის ფარგლებში და გულისხმობს საბიუჯეტო პროცესის იმ მეთოდოლოგიასთან შესაბამისობაში მოყვანას, რომელიც არის დამტკიცებული ფინანსთა მინისტრის #365 ბრძანებულებით, ეს არის პროგრამული ბიუჯეტის მეთოდოლოგია. ამ კუთხით გარკვეული წარმატება აქვს ოზურგეთის მუნიციპალიტეტის. თუმცა, ერთ-ერთი გასაუმჯობესებელი კომპონენტი ეს არის პროგრამის და ქვეპროგრამის ინდიკატორები. ასევე, მოსაგვარებელია მოსახლეობის ჩართულობის საკითხი. ამ კუთხით ოზურგეთის მუნიციპალიტეტის მერიამ 2024 წლის ბიუჯეტში გაითვალისწინა ერთი პროგრამა, რომლის ფარგლებში ამ საკითხის მოგვარება იქნება შესაძლებელი“, _ გვითხრა რამაზ ბოლქვაძემ.
2024 წლის ბიუჯეტის პროექტის განხილვის დასრულების შემდეგ „გურია ნიუსთან“ საუბრის დროს ოზურგეთის მუნიციპალიტეტის მერის მოადგილემ გიორგი ღურჯუმელიძემ აღნიშნა, რომ მათთვის მთავარია მოსახლეობა უფრო მეტად ჩაერთოს ბიუჯეტის პროექტის განხილვის დროს:
„ოზურგეთის მუნიციპალიტეტის მერია აქტიურად მუშაობს მოქალაქეთა მონაწილეობის ფორმების გაძლიერებაზე. სწორედ ამას ემსახურებოდა დღევანდელი შეხვედრა, რაც გულისხმობდა 2024 წლის ბიუჯეტის პროექტის საჯარო განხილვას დაინტერესებულ პირებთან ერთად. ეს ნიშნავს, რომ მეტი ინფორმაცია ჰქონდეთ, რაში იხარჯება საბიუჯეტო სახსრები და რა პროექტების განხორციელებას გეგმავს მუნიციპალიტეტი შემდეგ წლებში, _ აღნიშნა ჩვენთან საუბრის დროს გიორგი ღურჯუმელიძემ.
„საქართველოს დემოკრატიული განვითარების კავშირის“ აღმასრულებელი დირექტორის, ლევან ხინთიბიძის თქმით, მსგავსი შეხვედრები სამოქალაქო სექტორს აძლევს შესაძლებლობას, რომ ხელისუფლების წინაშე დააყენოს ის საკითხები, რა უნდა იქნეს ასახული მნიშვნელოვან ფინანსურ სეგმენტში, რასაც ბიუჯეტი ჰქვია.
_ ბიუჯეტის პროექტი ამ წუთებისთვის ოზურგეთის მუნიციპალიტეტის საკრებულომ დაუბრუნა ოზურგეთის მუნიციპალიტეტის მერიას და ხელახალი განხილვისთვის 10 დეკემბრამდე უნდა წარმოადგინოს ახალი რედაქციით. ჩვენ ყველა პროცესს გავყვებით ბოლომდე და მივაქცევთ ყურადღებას ყველა იმ ინიციატივას, რომელიც ჩვენ მიერ იქნა დაყენებული, რომ ასახვა ჰპოვოს ბიუჯეტში, _ გვითხრა ხინთიბიძემ.
საჯარო განხილვა ოზურგეთის მერიის ორგანიზებითა და USAID-ის ადგილობრივი თვითმმართველობის პროგრამის ტექნიკური მხარდაჭერით გაიმართა.
ავტორი
