დღეს ოზურგეთის სამხატვრო სკოლის მოსწავლეების გამოფენა სამხატვრო სკოლის ეზოში, ახლად რეაბილიტირებულ გარე სივრცეში მოეწყო.
სამხატვრო სკოლის დირექტორის კახა ვასაძის თქმით, გამოფენა ორნაწილად გაიყო. ბავშვებმა წარმოადგინეს თავისი საუკეთესო ნამუშევრები და ასევე წარმოდგენილი იყო პროექტ „ჩემი ქალაქის“ ფარგლებში შექმნილი ნახატები.
კახა ვასაძე: „ჩემი ქალაქის“ ფარგლებში ახალბედა მხატვრებმა დახატეს ქალაქ ოზურგეთში რაც გაკეთდა და რაც იყო საინტერესო ჩვენს ქალაქში. უკვე ჩვენს სკოლაში სრულდება სასწავლო წელი და ამ გამოფენით დამატებით მოხდა სასწავლო წლის შეჯამება. სამხატვრო სკოლის პედაგოგმა და ცნობილმა მხატვარმა ვახტანგ მამეიშვილი „გურია ნიუსთან“ საუბრის დროს აღნიშნა, რომ ოზურგეთს ძალიან საინტერესო და ნიჭიერი თაობა ჰყავს.
„1973 წელს გაიხსნა ქალაქ ოზურგეთში სამხატვრო სკოლა და მინდა ვთქვა, რომ ყოველთვის გამოირჩეოდა ჩვენი სკოლის მოსწავლეები თავისი ნიჭიერებით და განსაკუთრებული ხედვით. ამჟამად მე მეორე კლასს ვასწავლი და მათი ნამუშევრებით, სწავლებით კმაყოფილი ვარ. უფრო მეტად ისინი თავისუფალ სტილში მუშაობენ. ჩემს ბავშვობას თუ გავიხსენებ ბევრი რამ იყო აკრძალული და შეზღუდული. ეს თავისუფლება, რაც ახალ თაობას აქვს ბევრ წარმატებას და წინსვლას მოუტანს მათ. “ – გვითხრა სამხატვრო სკოლის მასწავლებელმა ვახტანგ მამეიშვილმა.
ოზურგეთის მუნიციპალიტეტის მერიის განათლების კულტურის,სპორტისა და ახალგაზრდულ საქმეთა სამსახურის უფროსმა, ლალი სიჭინავამ ღონისძიებაზე თავისი სიტყვის გამოსვლის დროს თქვა: „ოზურგეთის მუნიციპალიტეტის მერის, ბატონი ავთანდილ თალაკვაძის გადაწყვეტილებით უახლოეს მომავალში, ოზურგეთის სამხატვრო სკოლას, შენობის სრული რეაბილიტაცია ჩაუტარდება და ჩვენი სკოლის მოსწავლეები და მასწავლებლები ღირსეულ პირობებში განაგრძობენ სასწავლო პროცესს.“ – თქვა ლალი სიჭინავამ. ლალი სიჭინავამ ოზურგეთის სამხატვრო სკოლის მოსწავლეებს გადასცა დიპლომები.
ავტორი
