2023 წლის 28 აპრილს, ინოვაციების და ცვლილებების ინსტიტუტმა, განათლების განვითარების და დასაქმების ცენტრთან (EDEC) პარტნიორობით, ევროკავშირის მიერ მხარდაჭერილი პროექტის „ისწავლე დასაქმებისთვის“ ფარგლებში, ოზურგეთში, თემატური შეხვედრა გაიმართა, რომლის მიზანი იყო სექტორთა შორის თანამშრომლობა განათლებისა და დასაქმების სფეროში არსებული პრობლემების დასაძლევად. ასევე იყო საუბარი მიმდინარე გამოწვევებსა და მდგომარეობის გაუმჯობესების გზებზე.
ღონისძიებას ადგილობრივი თვითმმართველობის, არასამთავრობო ორგანიზაციების, დასაქმების ხელშეწყობის სახელმწიფო სააგენტოს, მედიის, საგანმანათლებლო და ბიზნეს სექტორის წარმომადგენლები ესწრებოდნენ. განათლების განვითარების და დასაქმების ცენტრის აღმასრულებელმა დირექტორმა ნათია ნამიჭეიშვილმა და კოლეჯ „ბლექსის“ დირექტორის მოადგილე მაია თოიძემ იმსჯელეს დასაქმებისთვის კარიერული ორიენტაციის და პროფესიული განათლების სერვისების როლსა და მნიშვნელობაზე, დუალური განათლების საერთაშორისო და ქართულ პრაქტიკაზე.
“ვიმსჯელეთ იმ გამოწვევებზე და საჭიროებებზე, გადაჭრის გზებზე, რაც დაკავშირებული სწორედ სექტორის როლზე და სხვადასხვა სექტორის ჩართულობაზე იმისთვის, რომ დაძლეული იყოს ისეთი მნიშვნელოვანი პრობლემა, რაც არის დასაქმება და უმუშევრობა.“ – აღნიშნა მედიასთან საუბრის დროს ნათია ნამიჭეიშვილმა.
მანვე ასევე გვითხრა, რომ რიგ შემთხვევაში დასასაქმებელი რატომ ამბობს უარს დასაქმებაზე. “ ძალიან ხშირია შემთხვევაა და სურვილი, როდესაც სამუშაოს მაძიებელი მზად არის ნახევარი განაკვეთიან სამუშაოზე თანხმდებიან. ამის ერთ-ერთი პრობლემა არის ის, რომ სამუშაოს დასრულების შემდეგ მათ სოფელში უწევთ წასვლა და მაგ დროს მუნიციპალური ტრანსპორტი არ არის. დამსაქმებელი კიდევ ხშირ შემთხვევაში დასაქმებულის ტრანსპორტირების საკითხის ვერ ან არ აგვარებს. “ – გვითხრა ნათია ნამიჭეიშვილმა.
ავტორი
