ოზურგეთში ეპიდემიოლოგიური ფონი საყურადღებოა.
როგორც ჩვენთან საუბრისას ოზურგეთის საზოგადოებრივი ჯანდაცვის ცენტრის ეპიდემიოლოგი ელზა სიმონიშვილი ამბობს, ინფიცირების შემთხვევებმა საგრძნობლად მოიმატა. სააღმზრდელო პროცესი ანასეულის საბავშვო ბაღში შეჩერებულია.
“ეპიდემიოლოგიური ფონი მუნიციპალიტეტში გახლავთ საყურადღებო, მოიმატა როგორც ტესტირებაზე მომართვიანობამ, ასევე სიმპტომიანი პაციენტების რაოდენობამ. მომატებულია კოვიდ-დადებითი შემთხვევების სტატისტიკა. შემთხვევები ნაწილდება სხვადასხვა ასაკობრივ ჯგუფში. განსაკუთრებით აღსანიშნავია ის ფაქტი, რომ კოვიდის დადასტურებები მომატებულია ბავშვთა სააღმზრდელო დაწესებულებების პერსონალში, როგორც სკოლამდელი აღზრდის ანუ საბავშვო ბაღებში, ასევე საჯარო სკოლებში. დღეისათვის სასწავლო-სააღმზრდელო პროცესი შეჩერებულია ანასეულის ბაღში პერსონალის კოვიდინფიცირების გამო. მართალია ინფიცირების შემთხვევები მიმდინარეობს შედარებით მსუბუქი კლინიკით, თუმცა გართულებების საფრთხე არსებობს ხანდაზმული ასაკის კონტინგენტში, ორსულებში, ასევე სხვადასხვა ქრონიკული დაავადების მქონე და სუსტი იმუნიტეტის მქონე პირებში. ამიტომ ისევ ძალაში რჩება ის მოთხოვნები, რომლებიც მიეკუთვნება კოვიდინფიცირების პრევენციულ-პროფილაქტიკურ ღონისძიებებს: ვაქცინაცია, სიმპტომის გამოვლენისას ტესტირება, იზოლირება, დისტანცირება, ჯგუფური თავშეყრის ადგილებში ყოფნისას ნიღბის ტარება, ნებისმიერი დამახასიათებელი სიმპტომის არსებობისას სამსახურში, სხვა დაწესებულებებში ვიზიტისაგან თავის შეკავება და დროული მიმართვა ოჯახის ექიმთან, რაც თავიდან აგვაცილებს შემდგომ გართულებებსა და ეპიდ სიტუაციის დამძიმებას, რადგანაც პანდემიის დასრულება მსოფლიო ჯანდაცვის ორგანიზაციას, როგორც ცნობილია, არ გამოუცხადებია”,_ ამბობს სიმონიშვილი.
