“დღეისათვის ოზურგეთის მუნიციპალიტეტში გრიპისა და გრიპისმაგვარი დაავადებების შემთხვევათა მატება ფიქსირდება. თუმცა, უნდა აღინიშნოს, რომ რაოდენობა ამ პერიოდისათვის დამახასიათებელ სეზონურ ნიშნულს არ სცდება და ფიქსირდება ძირითადად სპორადული შემთხვევები. ეპიდ სიტუაცია გრიპისა და გრიპისმაგვარი დაავადებების მხრივ მუნიციპალიტეტში მართულია”,_ ამის შესახებ “გურია ნიუსს” ოზურგეთის საზოგადოებრივი ჯანდაცვის ცენტრის ეპიდემიოლოგმა ელზა სიმონიშვილმა განუცხადა.
სიმონიშვილის თქმით, გრიპისმაგვარ დაავადებათა რაოდენობა მომატებულია თითქმის ყველა ასაკობრივ ჯგუფში(წლამდე ასაკის გამოკლებით), განსაკუთრებით გაზრდილი მაჩვენებელი ფიქსირდებოდა 44-ე კვირაზე, ხოლო ამჟამად მატებაა წინა კვირეებთან შედარებით.
“რაც შეეხება აღნიშნული დიაგნოზით ჯანმრთელობის მდგომარეობის გართულებებს, გვაქვს შემთხვევები, როცა პაციენტს აღენიშნება მაღალი ტემპერატურა, ძლიერი ხველა, სუნთქვის უკმარისობა, საერთო მდგომარეობის დამძიმება, ასეთ შემთხვევაში ბინაზე მკურნალობა რისკის შემცველია,ამიტომ ხორციელდება მათი ჰოსპიტალიზება სტაციონარის პირობებში კვალიფიციური სამედიცინო დახმარების მისაღებად და სპეციფიური მკურნალობის ჩასატარებლად. ასეთი გართულებებით იანვრიდან დღემდე ჰოსპიტალიზებული იქნა 11 პაციენტი”,_ ამბობს სიმონიშვილი.
ცნობისთვის, გრიპი მუდმივად აქტუალური პრობლემაა, ვინაიდან გრიპის ვირუსი ყოველწლიურად დაახლოებით ერთ მილიარდამდე ადამიანს აინფიცირებს და ზოგჯერ დაავადება საკმაოდ მძიმედაც მიმდინარეობს.
“სეზონური გრიპი” საქართველოში შემოდგომიდან იწყება და, როგორც წესი, ადრეულ გაზაფხულამდე გრძელდება.
როგორც ეპიდემიოლოგი ელზა სიმონიშვილი გვეუბნება, ხშირად მოსახლეობა ვერ ახდენს დიფერენცირებას,თუ რა განსხვავებაა მსგავსი სიმპტომებით მიმდინარე რესპირატორულ(სასუნთქი გზების) ინფექციებს შორის, ამიტომ ოზურგეთის საზოგადოებრივი ჯანდაცვის ცენტრი მუდმივად ახდენს საინფორმაციო სახის განმარტებებს აღნიშნული ინფექციების სიმპტომატიკასა და პრევენციულ ღონისძიებებზე, განსაკუთრებით ეს ეხება ბავშვთა სააღმზრდელო დაწესებულებებს, რომელთა სამედიცინო პერსონალი საქმის კურსშია გასატარებელი ღონისძიებების თაობაზე.
“ამ დღეებში, საზოგადოებრივი ჯანდაცვის ცენტრის ექიმების მიერ კიდევ ერთხელ-დამატებით დაგეგმილია შეხვედრა ზოგადსაგანმანათლებლო და სკოლამდელი აღზრდის დაწესებულებათა ხელმძღვანელებთან და სამედიცინო პერსონალთან, სადაც განხილული იქნება დაავადებათა კონტროლისა საზოგადოებრივი ჯანმრთელობის ეროვნული ცენტრის მიერ შემუშავებული რეკომენდაციები.
იმისათვის, რომ მოსახლეობას უფრო გარკვეული წარმოდგენა ჰქონდეს სეზონური ვირუსების, აგრეთვე მსგავსი სიმპტომებით მიმდინარე სხვა გრიპისმაგვარი დაავადებების შესახებ, განვიხილოთ, რა მსგავსება და განსხვავებაა მათ შორის:
რა განსხვავებაა გრიპსა და გაციებას შორის?
გრიპსა და გაციებას შეიძლება ჰქონდეს მსგავსი სიმპტომები, როგორიცაა ცხვირიდან გამონადენი და ხველა. მაგრამ გაციების სიმპტომები ჩვეულებრივ მსუბუქია, ხოლო გრიპის სიმპტომები შეიძლება იყოს მძიმე და გამოიწვიოს სერიოზული გართულებები. გაციებასა და გრიპს განსხვავებული მიკროორგანიზმები იწვევს.
რა არის გრიპის სიმპტომები?
გრიპის სიმპტომები ჩვეულებრივ სწრაფად ვითარდება და შეიძლება მოიცავდეს:
- ცხელება.
- შემცივნება.
- ძვალ-სახსროვანი და კუნთოვანი ტკივილები.
- ხველა.
- თავის ტკივილი.
- ყელის ტკივილი.
- ცხვირის გამონადენი ან გაჭედვა (შეშუპება).
- დაღლილობა ან სისუსტის შეგრძნება.
- დიარეა ან პირღებინება (უმეტესად ბავშვებში).
გრიპის ვირუსის ტიპები
რაც შეეხება გრიპის ვირუსის ტიპებს, ყველაზე გავრცელებულია A და B ტიპები. A ტიპის ვირუსი იწვევს ყველაზე მძიმე კლინიკურ სურათს და პასუხისმგებელია პანდემიების უმეტესობაზე. B ტიპის გრიპი უფრო მსუბუქად მიმდინარეობს, თუმცა ასევე შეიძლება გამოიწვიოს ეპიდემიური აფეთქებები. C ტიპის ვირუსს კი იშვიათად აქვს მნიშვნელოვანი კლინიკური გამოვლინებები.
გრიპის კლინიკური სურათის სიმძიმე დამოკიდებულია ვირუსის შტამზე, დაინფიცირებული პიროვნების ასაკსა და ჯანმრთელობის ზოგად მდგომარეობაზე.
განსაკუთრებულ რისკ-ჯგუფებს მიეკუთვნება მცირეწლოვანი ბავშვები, ხანდაზმულები, ორსულები და ქრონიკული დაავადებების მქონე პირები. ყველაზე ხშირი გართულებებია ვირუსული და ბაქტერიული პნევმონია, ასევე გულ-სისხლძარღვთა პრობლემები.
როგორ ვრცელდება გრიპი?
გრიპის ვირუსი ვრცელდება პირდაპირი ან არაპირდაპირი კონტაქტით სხვა ინფიცირებულ ადამიანთან. გავრცელების გზებია:
ჰაერ-წვეთოვანი:
ინფიცირებული/დაავადებული ადამიანის ხველების, ცემინების ან საუბრის შემდგომ წვეთები შეიძლება მოხვდეს ხელებზე, ან პირდაპირ ცხვირისა და პირის ლორწოვანზე აღმოჩნდეს. ამის შემდეგ ვირუსი გადადის ფილტვებში.
კონტაქტური
თუ ადამიანი გრიპის ვირუსით დაბინძურებულ ზედაპირს შეეხო და შემდეგ კი სახეზე, ცხვირზე, პირზე ან თვალებზე მოხვდა ხელი, ესეც გრიპის გავრცელების ერთ-ერთი გზაა. ხსენებული ზედაპირი შეიძლება იყოს, კარის სახელურები, მაგიდები, კომპიუტერები, ტელეფონები და ა.შ.
გრიპით დაავადებული ადამიანის გადაკოცნით, ხელების ან სახის შეხებით, შემდეგ კი საკუთარი სახის, ცხვირის, პირის ან თვალების შეხებით.
რამდენი ხნის შემდეგ გამოვლინდება გრიპის სიმპტომები კონტაქტის შემდეგ?
თუ ინფიცირებული ხართ, ჩვეულებრივ გრიპის სიმპტომები გამოგივლინდებათ ექსპოზიციიდან ერთიდან ოთხ დღემდე (ინკუბაციის პერიოდი).
გრიპის მკურნალობა
სიმპტომური თერაპია
ანტივირუსული პრეპარატები
ანტიბიოტიკები
არ მოქმედებენ უშუალოდ ვირუსზე, მაგრამ საჭიროა ბაქტერიული გართულებების (მეორადი პნევმონია) დროს.
დამხმარე ღონისძიებები
მნიშვნელოვანია დასვენება და წოლის რეჟიმი. ასევე, უხვი რაოდენობით სითხის მიღება დეჰიდრატაციის თავიდან ასაცილებლად
ჰოსპიტალიზაცია
- შეიძლება დასჭირდეს მძიმე შემთხვევებში, განსაკუთრებით ბავშვებსა და ხანდაზმულებში
გრიპის პრევენცია
- ყოველწლიური ვაქცინაცია გრიპის სეზონის დაწყებამდე
- ხელის ჰიგიენა, რესპირატორული ეტიკეტი
- საზოგადოებრივი თავშეყრის ადგილებიდან მორიდება ეპიდაფეთქების დროს
უმნიშვნელოვანესია სიმპტომებიანი ადამიანების იზოლაცია, ეს პრობლემა განსაკუთრებით ეხება ბავშვთა დაწესებულებებს, ამიტომ კატეგორიულად დაუშვებელია სკოლამდელ და სასკოლო , აგრეთვე სხვადასხვა მიმართულების წრეებსა და ჯგუფებში სიმპტომებიანი ბავშვებისა და მოზარდების დაშვება.
