ლიფტების თემა მთელ ქვეყანაში, პრობლემურობიდან გამომდინარე, მუდამ აქტუალურია. თუმცა, ბოლო დროის ცნობილი ტრაგიკული ამბის გამო, უფრო ხშირად ისმის კითხვა, რამდენად უსაფრთხო ლიფტებით სარგებლობენ ჩვენი მოქალაქეები? გასულია თუ არა ამ ლიფტების ექსპლუატაციის ვადა? ან ზოგადად, არის თუ არა ეს ვადები დაცული, რაც მუდმივ რეჟიმში კონტროლის განახლებას გულისხმობს? არსებობს თუ არა საშიში ლიფტები ოზურგეთში? მაღალსართულიან სახლებში მცხოვრები მოქალაქეები ამბობენ, რომ უმეტესად, სატვირთო ლიფტები არ მუშაობს.
ჩვენ ოზურგეთში არსებული ხუთი 12-სართულიანი საცხოვრებელი კორპუსის მცხოვრებლებს შევხვდით და ლიფტებთან დაკავშირებულ პრობლემებზე ვესაუბრეთ.
ოზურგეთში ყველაზე მაღალი თორმეტსართულიანი საცხოვრებელი კორპუსებია. ასეთი სულ ხუთია _ გრიბოედოვის, კოსტავას (ორი კორპუსი), ფარნავაზ მეფის და იოანე პეტრიწის ქუჩებზე.
აღნიშნული საცხოვრებელი კორპუსების მცხოვრებთაგან, “გურია ნიუსთან” ბევრი ამბობს, რომ გადასაადგილებლად განკუთვნილი ლიფტები ყველგან წესრიგშია. თუმცა, უმეტესად არ მუშაობს (და არც არასდროს უმუშავია) ავეჯის, სხვადასხვა ტვირთის გადასატან ლიფტებს, რომელთა კაბინა, ყველა სადარბაზოში არსებული პატარა ლიფტის პარალელურად არის განთავსებული.
_ რა შეიძლება ვთქვათ, როცა მეათე და მეთორმეტე სართულიდან მიცვალებული წამოყუდებული ჩამოგვყავს? ზოგს ეცინება კიდეც ამაზე. შეიძლება მიცვალებული კუბოზე მიაბა და ისე ჩამოიყვანო? ეს ხომ ახალი პრობლემა არ არის? კი, ბატონო, უამრავი პრობლემა არსებობს, ბევრი საქმეა გასაკეთებელი. ფასადები გაკეთდა, რაც კარგი საქმე გაკეთდება, ყველას გვიხარია, მაგრამ ამ ტვირთის გადასატანი თუ ავადმყოფის ან მიცვალებულის გადასაყვანი ლიფტების მოწესრიგებას საშველი არ დაადგა, _ გვეუბნებიან იოანე პეტრიწის ქუჩაზე მდებარე, 12-სართულიანი სახლის მცხოვრებლები.
_ აქ 1994 წლიდან ვცხოვრობთ. გვარ-სახელის და ვინაობის გამოკითხვა რად გინდათ? ზოგ კორპუსში საერთოდ არ უმუშავია ასეთ ლიფტს, ჩვენთან კი ერთი წლის წინ გაფუჭდა. მანამდე სულ მუშაობდა. პატარა ლიფტები როცა გააკეთეს, თქვეს, რომ ესეც რომ გაკეთებულიყო, 80 ათასი ლარი დასჭირდებოდაო. ჩვენ არ ვიცით, ზუსტად რა თანხებია ამისთვის საჭირო. თუმცა, როგორმე უნდა მოხერხდეს გაკეთება. მიცვალებულს და ავადმყოფს ვერ ჩამოიყვან მაღალი სართულებიდან, ავეჯს ვერ აიტან. ამაზე უფრო მეტი გასაჭირი რა უნდა დაგვადგეს? ერთ-ერთი ოჯახიდან პიანინოს ჩამოტანა სურთ და ვერ ახერხებენ, _ გვეუბნებიან აქ მცხოვრები ქალბატონები.
_ მე კოსტავას ქუჩაზე, 12-სართულიან კორპუსში ვცხოვრობ. აქ ორი ასეთი კორპუსია. ტყუპებსაც ვეძახით. ნომერ ორ კორპუსში ლიფტების პრობლემა ნამდვილად არ არის. გადასარევად მუშაობს. თუმცა, უარესი _ კანალიზაციის პრობლემა გვაქვს. მილები დახეთქილია. ზოგ ოთახში გუბეები დგება. აუცილებლად უნდა მოწესრიგდეს. როგორი გასაძლებია, როცა კანალიზაციის მილებია დაზიანებული, ჩატეხილი და არ იცი, როდის გადმოხეთქავს ბინძური მასა? _ გვეუბნება აქ მცხოვრები გალინა ფუტკარაძე.
იქვე, კიდევ ერთ 12-სართულიან სახლში (კოსტავას ქუჩა #4) მცხოვრები გია ზაქარიაძე ლიფტის პრობლემაზე საუბრობს:
_ აქ 48 ოჯახი ცხოვრობს. ყველას უნდა, რომ სატვირთო ლიფტი მოწესრიგებული იყოს. სადაც ასეთი ლიფტების პრობლემაა, ძირითადად, ყველგან არის ავადმყოფის თუ მიცვალებულის გადაყვანის პრობლემაც. ადამიანები ავეჯს ყიდულობენ ან სადმე გადააქვთ. ხომ უნდა აიტანონ ან ჩამოიტანონ? ეს არაა უბრალო პრობლემა. იქნებ, როგორმე შეძლონ და მოაწესრიგონ. თუ ჩვენგან რაიმე იქნება საჭირო, თანამონაწილეობას არ დავიზარებთ, _ გვითხრა მან.
გია ზაქარიაძემ, ასევე, თქვა, რომ კანალიზაციის მილების პრობლემა ოთხ ნომერ კორპუსშიც არსებობს და ჯერჯერობით, არ მოგვარებულა. მისი თქმით, საქმე უარესობისკენ მიდის.
ოზურგეთის სახელმწიფო თეატრთან ახლოს, ფარნავაზ მეფის ქუჩაზე მდებარე 12-სართულიანი საცხოვრებელი სახლის მობინადრეები, ასევე, სატვირთო ლიფტის ამუშავებას ითხოვენ.
_ პირველ რიგში, არ შემიძლია მადლიერება არ გამოვთქვა, ჩვენს კორპუსში ჩატარებული განახლებითი სამუშაოების გამო. საუცხოოდ მოაპირკეთეს, შეღებეს აივნები, იატაკიან-ჭერიანად მოგვიწესრიგეს. კორპუსის წინ მდებარე სკვერი თავისი განათებებით გაკეთდა. ყველა გახარებულია. თუმცა, ამ დიდი ლიფტის კაბინის პრობლემა მუდამ იყო. 40 წელია, აქ ვცხოვრობთ და არასდროს უმუშავია. სპეციალური შახტა კი არის, მოძრავი პატარა ლიფტის გვერდით. გეუბნებით, ცნობილი ამბავია, რომ მიცვალებული “კონახზე” მიბმული ან აყუდებული ჩამოჰყავს ხალხს და ძლივს ამაგრებენ, რომ არ დაუვარდეთ. კიბეებზე ჩამოსვლას ვერ ახერხებენ. იქნებ, ამ საქმეშიც დაგვეხმარონ, _ გვეუბნება გულიკო მახარაძე.
ამავე კორპუსის მცხოვრებლებმა გაიხსენეს ისიც, რომ ერთხელ გულით ავადმყოფი პაციენტი, სასწრაფო დახმარების მანქანამ ვერ გადაიყვანა იმიტომ, რომ მაღალი სართულიდან ვერ მოხერხდა ავადმყოფის ჩამოყვანა და ადამიანი გარდაიცვალა.
აღნიშნულ 12-სართულიან კორპუსებში, თითოეულში, ყველგან 48 ოჯახი ცხოვრობს. როგორც აქ მცხოვრებლები გვეუბნებიან, ზოგი ბინა დაკეტილია. წასული არიან სამუშაოდ სხვა ქალაქებში. თუმცა, უმეტესობა ცხოვრობს აქ და ყველას სურს ლიფტის პრობლემის მოგვარება.
“გურია ნიუსი” ოზურგეთის მუნიციპალიტეტის მერიის ინფრასტრუქტურის სამსახურის უფროსს, გოჩა აბაშმაძეს ესაუბრა. მან დაგვიდასტურა, რომ აღნიშნული პრობლემა არსებობს.
_ დიდი ლიფტების ამუშავების საკითხი დგას და ამის შესახებ ვიცით. პირველ რიგში, უნდა მოხდეს აღრიცხვა. შემდეგ კი გარემონტება ან შეცვლა. მთლად ადვილად მოსაგვარებელი არ არის. თუმცა, დღის წესრიგში დგას და აუცილებლად ვიზრუნებთ პრობლემის მოსაგვარებლად, _ გვითხრა მან.
“გურია ნიუსი” თვალს მიადევნებს, თუ როგორ და რა ვადებში მოგვარდება აღნიშნული პრობლემა.
ავტორი
