დღეს, დილიდან, ოზურგეთში აქტიურად საუბრობენ მგზავრობის საფასურის მოსალოდნელ გაზრდაზე.
სოფლების მარშრუტის ზოგიერთმა მძღოლმა გუშინ უკვე გამოუცხადა მგზავრებს, რომ ორშაბათიდან მგზავრობის საფასური მოიმატებს, რადგან საწვავის ფასი, 4 ლარამდე გაიზარდა.
_რა ქნან მძღოლებმა? ერთი ლიტრი დიზელის საწვავის ფასი 4 ლარზე ავიდა. 2 თეთრი აკლია, 3,98 ლარი ღირს. ბენზინი 3,70 ლარი ღირს. წყალს ხომ არ ჩაასხამენ? – გვითხრეს ოზურგეთის სამგზავრო ავტოსადგურში.
აქვე ისიც გვითხრეს, რომ ჯერჯერობით ფასი არაა მომატებული, თუმცა, სავარაუდოდ ეს ასე მოხდება.
რაც შეეხება რიგით მოქალაქეებს, ყველა ბრაზობს.
_დიზელის საწვავის ფასი რომ ასე „გაფრინდა“, სხვა ჩანაფიქრითაც ხდება. ხვნა-თესვის სეზონი მოდის და შაქრის ფასის არ იყოს, რაღაც ხომ უნდა მოიფიქრონ ხალხის წასახრჩობად. ახლა არ დაგვიწყოს ვინმემ ბიზნესია და როგორც გაუხარდებათ, ფასს ისე დაადებენო. როგორც სურთ ისე რომ გვექცევიან, კი ვხედავთ. ამიტომაა პროტესტი საჭირო, – გვითხრეს ავტოსადგურში დილაადრიან მოსულმა მგზავრებმა, რომლებიც თბილისისკენ მიმავალ ავტობუსს ელოდებოდნენ.
_შვილებს ხანდახან ერთი ჩანთით სოფლის ნობათს ვუგზავნით. ადრე 5 ლარს ვიხდიდით, ახლა კი ათი ლარიც სახვეწარია ერთი ათკილოიანი ჩანთა რომ გაგზავნო დედაქალაქში. ესაა საქმე? მძღოლმაც რა ქნას, მაგრამ 21-ე საუკუნეში ასე საცოდავად თუ ვიცხოვრებდით, აღარ გვეგონა, – ასე ბუზღუნებდნენ რიგითი ოზურგეთელები , რომლებმაც ვინაობის დასახელება რომ ვთხოვეთ, შემოგვწყრნენ, „მოძებნეთ, კმაყოფილი ვინაა, იმის გვარ-სახელი ჩაწერეთო“.
ავტორი: მარინა ჩიხლაძე
