გურიის მოქმედი ჩემპიონი ჭადრაკში ლანა ლომაძე ახალ ინიციატივას ამკვიდრებს. ოზურგეთის საჭადრაკო კლუბის მხარდაჭერით, ყოველ კვირას ჩატარდება საჭადრაკო ტურნირი.
ლანა ლომაძის თქმით, 9 აპრილს ჩატარდა პირველი ტურნირი სწრაფ ჭადრაკში, სადაც მონაწილეობა ათმა ბავშვმა მიიღო.
ლანა ლომაძე: _ ჭადრაკთან მაკავშირებს მთელი ჩემი ბავშვობა და ლამაზი მოგონებები, ჭადრაკის გავლენას ვგრძნობდი და ვგრძნობ ჩემი ცხოვრების ყველა ეტაპზე! რასაც არ უნდა ვაკეთებდე, ყველაფერში ძალიან მეხმარება ის უნარები, რაც ჭადრაკმა შემძინა… და ეს არაერთი მოჭადრაკისგან გამიგია, რომლებიც ცხოვრებამ სხვადასხვა მიმართულებით წაიყვანა...
ამიტომაც არ იქნება გასაკვირი, რომ სურვილი მაქვს, ჩემი შვილებიც დაეუფლონ ამ საოცარ თამაშს, რომელზეც დღემდე ვერ თანხმდებიან სპორტია, ხელოვნება თუ მეცნიერება…
მე თუ მკითხავთ ყველაფერია ერთად გაერთიანებული და ამიტომაცაა უნიკალური!
შვილებიდან გამომდინარე, ბოლო პერიოდში აქტიურად ჩავერთე საჭადრაკო ცხოვრებაში და სიმართლე გითხრა, ძალიან შემტკივა გული… ისეთი ნიჭიერი მომავალი თაობა გვყავს და ისე აკლიათ სატურნირო პრაქტიკა. არადა, შეჯიბრებების გარეშე ძალიან ძნელია შედეგებზე საუბარი. მიზეზი? _ ფინანსები! ყველას არ აქვს შესაძლებლობა, დაფაროს სამივლინებო ხარჯი… ადგილზე ჩატარებასაც ხარჯი სჭირდება _ პრიზები, მსაჯები, რესურსი და ა.შ. ტურნირები ტარდება, მაგრამ არა საკმარისი, საკმარისთანაც კი არაა ახლოს.
გურიის ჭადრაკის ფედერაციის პრეზიდენტის, ბატონ ზურაბ ანდღულაძის და მამაკაცთა შორის ოთხ გზის გურიის რეგიონის ჩემპიონის გიორგი გოგოლაურის მხარდაჭერით, ყოველ კვირა დღეს ჩავატარებთ საჭადრაკო ტურნირს. ტურნირში მონაწილეობა იქნება უსასყიდლო. ასევე, სურვილის შემთხვევაში, პატარა მოჭადრაკეებს ჩავუტარებთ მასტერკლასს.
შევეცდებით, ბავშვებს შევძინოთ ის უნარები, რაც მათ ძალიან გამოადგებათ, როგორც საჭადრაკო ცხოვრებაში, ასევე, სამომავლოდ.
მოაზროვნე მომავალი თაობა კი ქვეყნის ჯანსაღი განვითარების საწინდარია!
ჰოდა ასე! – აღნიშნა ჩვენთან საუბრის დროს ლანა ლომაძემ.
გურიის ჭადრაკის ფედერაციის პრეზიდენტის, ზურაბ ანდღულაძის თქმით, რაც მეტი დამატებითი სასწავლო კურსები და ჩემპიონატები ჩატარდება ჭადრაკში, მით უფრო კარგია ახალი თაობისთვის და არა მარტო მათთვის.
“წელიწადში ოც ღონისძიებას ვატარებთ ჭადრაკში. კარგია, რომ ამ სიას კიდევ ერთი საჭადრაკო ტურნირი შეემატა. მინდა გითხრათ, რომ ბოლო დროს, განსაკუთრებით რესპუბლიკურ და საერთაშორისო ტურნირებზე, ოზურგეთელები ძალიან გააქტიურდნენ და ორ წელიწადში 35 მედალი აქვთ აღებული. ასევე, 20 ბავშვი ოზურგეთიდან არის ფიდეს რეინტიგში”, _ აღნიშნა ჩვენთან საუბრის დროს ზურაბ ანდღულაძემ.
მისივე თქმით, ყოველი ტურნირის დასასრულს გამოვლინდება გამარჯვებული და ყველა მონაწილეს გადაეცემა დიპლომები.
ავტორი
