გურიის სოციალური მომსახურების სამხარეო ცენტრის დირექტორის თეა ლომჯარიას თქმით, დილიდანვე მათი სამსახური ჩვეულებრივ რეჟიმში აგრძელებს მუშაობას.
“გაფიცული არიან სამსახურის თანამშრომლების ნაწილი და ნაწილი კი განარგრძნობს მომსახურებას ხალხისთვის. დილიდანვე მოდიან ადამიანები სოციალურ ცენტრში და შესაბამისად ჩვენი თანამშრომლები ეხმარებიან მათ,“ – გვითხრა თეა ლომჯარიამ.
“გურია ნიუსის“ ინფორმაციით, ოზურგეთის სოციალური მომსახურების სააგენტოს თანამშრომლების ნაწილი პროტესტსს სახლიდან გამოხატავენ. ისინი დღეს სამსახურში არ გამოვიდნენ.
როგორც ცნობილია დღეს საქართველოს მთელი მასშტაბით სოციალური მომსახურების სააგენტოს თანამშრომლები გაიფიცნენ. ისინი ხელფასების მატებას მოითხოვენ.
უკვე სოციალური მომსახურების სააგენტომ გაავრცელა ინფორმაცია, რომ ხელფასების მატება თებერვალში არის დაგეგმილი.
როგორც უწყება განმარტავს, სოციალური აგენტის ხელფასი ორი კომპონენტისგან შედგება – ფიქსირებული და გამომუშავებით ანაზღაურება. გაზრდა შეეხება ორივე კომპონენტს.
“ბოლო თვეების განმავლობაში სოციალური მომსახურების სააგენტოში გამართული აქტიური კონსულტაციების შედეგად მიღებულ იქნა გადაწყვეტილება, რომლის მიხედვითაც სოციალური აგენტის ფიქსირებული ანაზღაურება 60 % -ამდე იზრდება. კერძოდ, 250 ლარის ნაცვლად 400 ლარი გახდება, უფროსი სოციალური აგენტის კი – 550 ლარის ნაცვლად 700 ლარი. ასევე, ოჯახებში შესრულებული ვიზიტების ფარგლებში, ერთ შევსებულ დეკლარაციაზე სოციალური აგენტები 6 ლარის ნაცვლად 10 ლარს მიიღებენ.
ასევე, სოციალური მომსახურების სააგენტოს დაბალი და საშუალო რგოლის 1000-ამდე თანამშრომელს შრომის ანაზღაურება 40%-დან 60 %-ამდე გაეზრდება”.
[sexy_author_bio]
