როგორც ცნობილია, ევროკავშირის დახმარებით, გურიაში და კონკრეტულად ოზურგეთში, განახლების საუშაოები ტარდება.
უკვე დასრულდა თეატრის წინ მდებარე მოედნის სივრცეზე, ასევე ჭადრების ბაღში, ძველი ფილაქანის ახლით (პროექტით განსაზღვრული) ჩანაცვლება.
ამ დროისთვის დაწყებულია ყვავილების, მარადმწვანე ბუჩქოვანების და წიწვოვანი მცენარეების სპეციალურად განკუთვნილ რკინის კონსტრუქციის მასიურ ქოთნებში ჩარგვა.
დასრულებული სამუშაოების შემდეგ, აქ, რკინის კონსტრუქციის მასიური ქოთნების შემოტანას, გარკვეული მითქმა-მოთქმა მოჰყვა. არც იყო გასაკვირი _ უცებ, როგორც „ზედმეტი ნივთები“, ისე გამოჩნდა განახლებულ მოედანზე.
მალე სარკასტული ხუმრობებიც გაისმა, რომ ქოთნები კუბოებს ჰგავს _ გურულებს მკბენარა იუმორიც ახასიათებთ.
ყველაზე ზუსტ პასუხს და ასევე შეფასებას, თვით მშენებლები და ნეიტრალური ადამიანები აკეთებენ.
_ქოთნების დაჟანგვაზე არ იდარდოთ! პენოპლასტი აქვს შიდა კედლებზე აკრული. მალე დასრულდება ჩარგვა. ულამაზესი მარადმწვანე ბუჩქები და წიწვოვანებია, ხომ ხედავთ. მერე შევღებავთ და ნახავთ, თუ არ იქნება ლამაზი, _ გვეუბნებიან აქ დასაქმებული მუშები.
ლილი დოლიძე, ოზურგეთის მკვიდრი:
_ძალიან ლამაზად დაიგო ქვაფენილი, ირგვლივაც კარგად გაკეთდა. რაღაც ჩვენც გვეუცხოვა მერე შემოტანილი ეს რკინის ქოთნები. თუმცა, რომ დასრულდება, ალბათ, ძალიან ლამაზი იქნება, ვნახოთ! თავიდან აქაურობა რომ გადათხარეს, მაშინ საშინელი სანახავი იყო, ბრაზობდა ხალხი, მაგრამ ახლა ყველა ამბობს რომ ლამაზად გაკეთდა, – გვითხრა მან.
_კონკრეტულად ამ თემაზე თუ მეკითხებით, რაც გაკეთდა, ლამაზია. ისე კი გურულს ხუმრობას ვერ მოაშლევინებ. რკინა, ჩემი აზრით, არ უნდა გამოეყენებინათ. ბორდიურები რომ გაკეთებულიყო, ცემენტის, უმჯობესი იქნებოდა. არსებობს ბორდიურებისთვის განკუთვნილი საბორტე ქვა. ასეთებით შემოსაზღვრული უმჯობესი იქნებოდა. არაერთი ადამიანისგან მოვისმინე. მე ასე ვფიქრობ. აწი გაკეთებულია და შეღებავენ, ყვავილები დაირგვება და ლამაზი აუცილებლად იქნება, მგონია, – თქვა ოზურგეთელმა გრამიტო მამინაშვილმა.
რკინის კონსტრუქციის ქოთნების განლაგება, განსაკუთრებით მწვავედ შეაფასეს ოზურგეთელმა ნაციონალებმა.
“გურულები ზოგადად ყველაფერში და ყველაზე სწრაფები რომ ვართ, ცნობილი ფაქტია, ქოცებიც ყველაზე სწრაფები გვყავს. სულ თავისით დაიდგეს ესენი ქალაქის ცენტრში – მე ერთი ასოციაცია მიჩნდება მარტო და რავიცი, თქვენ რას ფიქრობთ, რას უნდა ნიშნავდეს?”_ წერს სოციალურ ქსელში თათია ნიკოლაშვილი.
ოზურგეთის მუნიციპალიტეტის მერი, ავთანდილ თალაკვაძე, ამის თაობაზე, თავის ფეისბუქგვერდზე , ასეთ პოსტს (მაკეტით თანდართულ) აქვეყნებს:
„აი ასეთი იქნება სინამდვილეში განახლებული მოედანი თეატრის წინ.
იმის ნაცვლად, რომ თავისი ქალაქის და მუნიციპალიტეტის ინტერესები დაიცვან, თავისი კუთხის პატრიოტები იყვნენ, “ _ ნაციონალური მოძრაობა” აქაც ოზურგეთის იმიჯის და ღირსების შელახვით არის დაკავებული. ცხადია, რომ ოზურგეთის განახლება და განვითარება აღიზიანებთ. საკუთარი ქალაქის დაცინვა სამარცხვინოა! საკუთარი ქალაქის წინააღმდეგ ჩასაფრება სამარცხვინოა!”
ავტორი
