დღეს, ოზურგეთში თხილის ფასი, რაც მიღების სეზონი დაიწყო, პირველად ყველაზე მეტად დაეცა. „ბერძნულა“- 4,20 ლარი ღირს, „გულშიშველა“ – 4 ლარი. წინა დღესთან შედარებით, ეს ფასი დაბალია. „ბერძნულას“ 30 თეთრი დააკლეს, „გულშიშველას“ -20.
_გუშინ და გუშინწინ მქონდა უკეთესი თხილი და დღეს უარესია? ეს რომ ვერ მოაგვარეს ჩინოვნიკებმა ამ ქვეყანაში, 30 წელია, უკეთესს რას შეგვპირდებიან ამ არჩევნებზე? სად, რა სისტემა, რა რეგულაცია არსებობს, რომ ყოველდღე ფასი ათამაშონ? „გურია ნიუსს“ განსაკუთრებით გთხოვთ, გააშუქეთ ყოვედღე, რა ხდება თხილის ფასის ირგვლივ. წელს თხილის სეზონის ორი მნიშვნელოვანი თვე, ზუსტად ემთხვევა ყველაზე ცხელ საარჩევნო პერიოდს. ამ სამ დღეში ფასით ასეთი ბურთაობა, მაფიაა და მეტი არაფერი, _ გვითხრეს დილიდან თხილის რიგში მდგარმა ოზურგეთის მუნიციპალიტეტის სოფლების მცხოვრებლებმა: მარიკა დარჩიამ, მარინა ქავთარაძემ, ხათუნა ვაშაყმაძემ და სხვებმა, რომლებსაც თხილი ჰქონდათ ჩასაბარებლად ჩამოტანილი. ისინი სხვადასხვა პუნქტებთან მოძრაობდნენ, რომ ცოტა უფრო მაღალ ფასად ჩაებარებინათ, თუმცა, პასუხი ყველგან ერთნაირი იყო: თხილის ფასი დაეცა!
თავის მხრივ სწუხან თხილის მიმღები ოპერატორები და აწონვასა თუ დატვირთვაზე მომუშავე ახალგაზრდები, „ფასებს ხომ ჩვენ არ ვადგენთ. ღამის სამ საათამდე გვიწევს მუშაობა, დატვირთვა, გადატანა, თითქმის უძილო ვართ“.
თუ მოარულ ხმებს დავუჯერებთ, დღეიდან თხილის ფასი სულ მერყევი იქნება, უფრო კლებისკენ. ეს ხდება იმ ფონზე, როცა საწვავის და პროდუქტის ფასი ღიად თუ შემპარავად იზრდება.
„ელოდოს „ქართული ოცნება“ ახლა რომ ხმებს მიიღებს, ასე დაწერეთ“ _არაერთხელ მოგვაძახეს გაბრაზებულმა მოქალაქეებმა.
[sexy_author_bio]
