2 სექტემბერს, ოზურგეთის მუნიციპალიტეტის საკრებულოს სხდომა პირველად შედგა საზაფხულო შესვენების შემდეგ. სულ საკრებულოს სხდომაზე ცხრა საკითხზე იმსჯელეს.
ერთ-ერთ უმთავრეს საკითხზე, ოზურგეთის მუნიციპალიტეტის 2020 წლის დამტკიცებულ ბიუჯეტში ცვლილებების და დამატებების შესახებ”, საფინანსო სამსახურის უფროსმა, გია მამაკაიშვილმა ისაუბრა. მან თქვა, რომ სულ ოზურგეთის ბიუჯეტი 1 418 441, 88 ლარით შემცირდება.
როგორც მამაკაიშვილმა აღნიშნა, ახალი კორონავირუსის პანდემიამ მნიშვნელოვანი გავლენა მოახდინა ყველაფერზე და შემცირდა საქართველოს ეკონომიკური ზრდის საგადასახადო შემოსავლების პროგნოზები.
სულ შემოსავლების და გადასახდელების ნაწილში, ბიუჯეტი გაიზრდება მილიონ 152 700 ლარით. კერძოდ, სტიქიის შედეგების სალიკვიდაციო ღონისძიებების გასახორციელებლად 900 000 ლარით; სოფელ ბახვში საავტომობილო გზის რეაბილიტაციისთვის _ 252 700 ლარით. ამავე შემოსავლების და გადასახდელების ნაწილში _ ორი მილიონ 571 141,88 ლარით. კერძოდ, საქართველოს მთავრობის განკარგულებით, ცვლილება შევიდა რეგფონდიდან მუნიციპალიტეტისთვის გამოყოფილი თანხის რაოდენობაში _ ის ოზურგეთს მუნიციპალიტეტს 349 201 ლარით შეუმცირდა. ეს არის პროექტით გათვალისწინებული სამუშაოები. ასევე, ოზურგეთის მუნიციპალიტეტს შეუმცირდა მთავრობის განკარგულების _ “ზოგიერთი მუნიციპალიტეტისთვის უფლებამოსილების ხელშეკრულების საფუძველზე დელეგირების შესახებ”, საფუძველზე განსაზღვრული თანხა 411 940, 88 ლარით. მათ შორის, საჯარო სკოლების მცირე სარეაბილიტაციო სამუშაოებისთვის _ 90 000 ლარით, ხოლო საჯარო სკოლების მოსწავლეების ტრანსპორტირებით უზრუნველყოფა შემცირდა 321 940, 88 ლარით.
არის რიგი ცვლილებები შემცირების მხრივ, რამაც, საერთო ჯამში, როგორც მამაკაიშვილმა დასაწყისშივე თქვა, ოზურგეთს ბიუჯეტის 1 418 441, 88 ლარით შემცირება გამოიწვია.
დეპუტატი ლელა საჯაია დაინტერესდა, ბიუჯეტის შემცირება ხომ არ შეაფერხებდა იმ 17 ოზურგეთელი პირველკურსელის დაჯილდოებას, ვინც ასპროცენტიანი გრანტი მიიღო. როგორც ცნობილია, საკრებულოს დადგენილების თანახმად, ფულად ჯილდოს, 3 ათას ლარს, ყოველ წელს იღებენ საჩუქრად წარმატებული აბიტურიენტები.
_ ეს თანხა, სულ 68 ათასი ლარია და ბიუჯეტის სეკვესტრი არ შექმნის პრობლემას, რომ ჯილდო გადაეცეს წარმატებულ ახალგაზრდებს. პირიქით, ძალიან კარგი იქნება, დავგეგმოთ ლამაზი ღონისძიება მათ დასაჯილდოებლად. ვფიქრობ, ეს იქნება სასიხარულო, როგორც პოზიციის, ისე _ ოპოზიციისთვის, _ თქვა გია მამაკაიშვილმა.
ინტერესი გამოიწვია საკითხის _ “ოზურგეთის მუნიციპალიტეტის საკუთრებაში არსებული დაბა ნასაკირალის ადმინისტრაციულ ერთეულში მდებარე არასასოფლო-სამეურნეო დანიშნულების 498.00 კვ.მ. მიწის ნაკვეთის სარგებლობის უფლებით გადაცემაზე, ოზურგეთის მერისთვის” განხილვამ.
საკითხის წარმოდგენისას ეკონომიკის სამსახურის უფროსმა, ალეკო მამეშვილმა განმარტა, რომ ეს ნაკვეთი საქართველოს საპატრიარქოს უნდა გადაეცეს.
_ რა დანიშნულებისთვის არის საჭირო ეს მიწის ნაკვეთი? რატომ ითხოვთ? _ იკითხა საკრებულოს სხდომაზე ნასაკირალის დეპუტატმა ოზურგეთის საკრებულოში, ბესო ქათამაძემ, რაზეც ალეკო მამეშვილმა უპასუხა, რომ ოზურგეთის მერს შემოქმედელმა მიტროპოლიტმა მიმართა თხოვნით, რადგან იქ იგეგმება ტაძრის მშენებლობა.
_ გასაგებია, მივესალმები, _ განაცხადა ქათამაძემ.
საკითხი, საარჩევნო სააგიტაციო მასალის განთავსების რეგულირების შესახებ, სადისკუსიოდ იქცა. კერძოდ, საბავშვო ბაღების შენობებზე და ღობეებზე სააგიტაციო მასალების გაკვრა დეპუტატებმა არ ჩათვალეს მიზანშეწონილად.
მათი წინააღმდეგობის შედეგად, სხვადასხვა შენობა-ნაგებობების, სახელმწიფო ხელისუფლების თუ მუნიციპალიტეტის ორგანოების, პროკურატურის და პოლიციის შენობების გარდა, სააგიტაციო მასალების გაკვრა აიკრძალა საბავშვო ბაღების შენობებსა და ღობეებზე.
_ ამ პანდემიის პირობებში, ისედაც რთულ მდგომარეობაში მყოფ საბავშვო ბაღების აღმზრდელ-მასწავლებლებს ნუ გავუჩენთ ახალ თავსატეხს და სამუშაოს, რომ შემდეგ ეს შენობები და ღობეები წმინდონ. იცით, რომ ტოვებენ და ერთეულები თუ ასუფთავებენ კედლებს, ღობეებს თუ ბოძებს, _ თქვა საკრებულოს წევრმა, ლელა საჯაიამ.
_ სანამ საარჩევნო კამპანია დაიწყება, მანამდე რომ არის გამოკრული სააგიტაციო მასალა, იმას რა ეშველება? ვერ ხედავთ, რომელი პარტიები აკრავენ? _ თქვა საკრებულოს წევრმა, მარიკა ჩხიკვიშვილმა. მას სხვა დეპუტატებიც დაეთანხმნენ და საუბარში გაირკვა, რომ “ევროპულმა საქართველომ” უკვე, კარგა ხანია, “ააჭრელა” ელექტროსადენების ბოძები.
_ რა დააშავეს ელექტრობოძებმა, ეს გამძღარი სახეები რომ არ გამოაკრათ? _ იკითხა საკრებულოს წევრმა ლეიბორისტული პარტიიდან, დავით მამალაძემ. კოლეგებმა მას მხოლოდ სიცილით უპასუხეს.
საკრებულოს სხდომის შემდეგ, “გურია ნიუსი” პარტია “ევროპული საქართველოს” ოზურგეთის რაიონული ორგანიზაციის ხელმძღვანელს, მიხეილ გოგოტიშვილს ესაუბრა:
_ საარჩევნო კოდექსის შესაბამისად, სანამ არჩევნები გამოცხადდება, პარტიებს აქვთ უფლება, განათავსონ სააგიტაციო მასალა. ვინც არ იცის, სხვა საკითხია. ხოლო, როცა არჩევნების თარიღი გამოცხადდება, მერე საკრებულო მიიღებს გადაწყვეტილებას, სად შეიძლება განთავსდეს სააგიტაციო მასალა არჩევნებში მონაწილე პარტიებისთვის. ჩვენ, როგორც პასუხისმგებლიანი პარტია, სააგიტაციო მასალას ვაკრავთ ისეთ ადგილზე, რომელიც არის მითითებული დადგენილებაში. თუმცა, შევინარჩუნეთ ის ადგილები, რომლებიც წინა წლებში იყო გათვალისწინებული, _ გვითხრა გოგოტიშვილმა.
2 სექტემბრის საკრებულოს სხდომაზე, ასევე დაამტკიცეს განკარგულებები საპრივატიზაციო ნუსხისა და გეგმის დამტკიცების შესახებ, საჯარო ადმინისტრაციული წარმოების დაწყებაზე.
საჯარო ადმინისტრაციული წარმოება დაიწყო მუნიციპალიტეტის საკუთრებაში არსებული შემოქმედის ადმინისტრაციულ ერთეულში მდებარე 6 000 კვ.მ. არასასოფლო-სამეურნეო დანიშნულების მიწის ნაკვეთის (ისევე, როგორც დაბა ნასაკირალის ადმინისტრაციულ ერთეულში მდებარე არასასოფლო-სამეურნეო დანიშნულების მიწის
ნაკვეთის) სარგებლობის უფლებით გადაცემაზე ოზურგეთის მუნიციპალიტეტის მერისთვის თანხმობის მიცემის შესახებ”.
საკრებულოზე დაამტკიცეს განკარგულება: “ოზურგეთის მუნიციპალიტეტის მერიასა და გაეროს განვითარების პროგრამა საქართველოში (UNDP) შორის გაფორმებული საგრანტო ხელშეკრულების შეთანხმების შესახებ”, რომელიც გრანტის გამოყოფას ეხება, დაბა გომისმთის განაშენიანების გენერალური გეგმის შემუშავების მიზნით.
საკითხი არქიტექტურის სამსახურის უფროსმა, თამაზ ლომჯარიამ წარმოადგინა.
დეპუტატმა “პატრიოტთა ალიანსიდან” ნანული ორაგველიძემ დასვა კითხვა, თუ რატომ ხდება გომისმთაზე მიწის საკუთრებაზე განაცხადის თუ რეგისტრირების არასწორად წარმართვა.
_ ახლა საკუთრების საკითხს არ განვიხილავთ, ეს ეხება საგრანტო ხელშეკრულებას, რომელიც გომისმთის განაშენიანების გეგმის შესამუშავებლად უნდა გამოიყოს, _ უპასუხა მას ლომჯარიამ.
