დღეს, ოზურგეთის მუნიციპალიტეტის საკრებულოს ბიუროს სხდომაზე, მუნიციპალიტეტის მიერ დაფუძნებული კერძო სამართლის იურიდიული პირების მიერ, 2020 წელს გაწეული საქმიანობის ანგარიშების მოსმენისას, ბიურომ, საკრებულოს სახელით განსაკუთრებული მადლობა გამოხატა საზოგადოებრივი ჯანდაცვის ცენტრის მიმართ, COVID -19 -თან ბრძოლაში შეტანილი წვლილისთვის და გაწეული საქმიანობისთვის.
_ 16 ადამიანია სულ დასაქმებული და მათ მართლაც გმირობის ტოლფასი საქმე გააკეთეს და აგრძელებენ დღესაც, _ თქვა დათო დარჩიამ.
ცენტრის ხელმძღვანელმა მაია ქუტიძემ, საანგარიშო გამოსვლისას, თავის მხრივ, ისაუბრა წლის ბიუჯეტის, 130 ათასი ლარის ხარჯვის თაობაზე, _სახელფასო თუ სხვა მიმართულებებზე. რომ საკრებულო, მერია და გუბერნია კოორდინირებულად, ერთობლივი ძალისხმევით დაეხმარა ჯანდაცვის ცენტრს, რომ პანდემიას გამკლავებოდნენ.
_შევიძინეთ მანქანა. ასე ვთქვათ პანდემიამ შეგვაძენინა. მუნიციპალიტეტის მერიამ დაგვიდგა ჯიხური. მე დღეს ძირითადად პანდემიის შესახებაც მოგახსენებთ. სულ, 2020-2021 წელს, პანდემიის დაწყებიდან დღევანდელ პერიოდამდე, 24783 ადამიანი გვყავს დატესტილი. აქედან 10450 დადებითი აღმოჩნდა. 3254 პირმა საკარანტინო სივრცეში მოიხადა, სასტუმროებში. დღეს 28 ადამიანია სტაციონარში. აქედან 11 მედალფაშია, დანარჩენი სხვადასხვა სივრცეში. გვყავს 3159 გამოჯანმრთელებული. სამწუხაროდ, 30 ადამიანია გარდაცვლილი, _ თქვა ქალბატონმა მაიამ.
