“გურია ნიუსი, ახლახან წერდა, თუ როგორ დაესხა თავს მელექედურის მკვიდრს ძაღლი ოზურგეთის ბაზარში და იქვე მყოფ მოვაჭრეებს სამაშველო სამსახურის გამოძახება დასჭირდათ. საბედნიეროდ, აღნიშნულ შემთხვევა მსხვერპლი არ მოჰყოლია. თუმცა, დღეისთვის კვლავ უამრავი ძაღლი დადის ოზურგეთის ქუჩებში და მოქალაქეები ახლა უმეტესად ჟურნალისტებს გვირეკავენ, გვთხოვენ ადგილზე მისვლას, რომ პრობლემის გადაჭრაში დავეხმაროთ.
6 სექტემბერს, ოზურგეთში, ერთ-ერთი საცხობის წინ, დიდი ზომის ძაღლები გამოჩნდნენ, რომელთაგან არც ერთს არ ჰქონდა იარლიყი. წესდების თანახმად კი, ასეთი ძაღლი მუნიციპალური მომსახურების ცენტრს მხედველობიდან არ უნდა გამოეპაროს.
_ ქუჩაში ვერ გაგვივლია _ ყოველდღე ახალ-ახალი ნაკადი შემოყავს, მგონი, ვიღაცას. ან სად არის ამდენი ძაღლი _ ზრდიან და მერე ქუჩაში ყრიან? აბა, ტყიდან ხომ არ მოვიდოდნენ? არ შეგიძლიათ ისე დაწეროთ, რომ შედეგი გამოიღოს თქვენმა წერილმა? რა გამოვიდა, თუ წერთ და ძაღლები კი მრავლდებიან და უფრო მეტად ჩნდებიან ქალაქის ქუჩებში? _ გვეუბნება ოზურგეთელი მაია სამსონია.
_ “დაბირკული” უნდა დადიოდესო. ჯერ ერთი, რომელია დაბირკული და მეორეც, ძალიან სასიამოვნოა ამდენი მიუსაფარი ძაღლის ჯოგებად სიარული? ნუთუ არაფერი და არანაირი წესი არ არსებობს, რომ ეს საქმე მოგვარდეს? _ გვეუბნებიან გარე მოვაჭრეები, რომლებიც აღნიშნავენ, რომ არაერთხელ აწვდიან საკვებს მიუსაფარ ძაღლებს, თუმცა, ამბობენ იმასაც, რომ ყოველდღე სრულყოფილად ოჯახის გამოსაკვები პურიც ვერ მიაქვთ სახლში, არათუ “ქუჩაში უღირსი ადამიანების მიერ გამოყრილი ძაღლების გამოსაკვებად” იყიდონ.
“გურია ნიუსი” ოზურგეთის მუნიციპალური მომსახურების ცენტრში, უმეთვალყურეოდ დარჩენილი პირუტყვების განყოფილების ხელმძღვანელს, გოგი მაღლაფერიძეს დაუკავშირდა.
კითხვაზე _ რატომ გამოჩნდა ქალაქში ისევ დაუნომრავი ძაღლები, მაღლაფერიძე გვპასუხობს, რომ ეს მოქალაქეების უპასუხისმგებლობის გამო ხდება:
_ კიდევ თუ “დაუბირკავი” ძაღლები ნახეთ, ეს იქნება ახალშემოყვანილი. ძალიან უსინდისოდ იქცევა ბევრი სოფლის მოქალაქე _ შემოყავთ პირდაპირ ქალაქში და ტოვებენ ქუჩებში. ჩვენ სულ დავდივართ, ვიჭერთ, თუ საჭიროა, ვუკეთებთ სტერილიზაციას, ვაბნევთ “ბირკას” და ვუშვებთ ისევ ქალაქში.
_ ბატონო გოგი, ქალაქიდან რომ გაიყვანონ სოფელში, ტყისკენ, უფრო სარწმუნოა და სოფლიდან ქალაქში როგორ მოჰყავთ და უშვებენ? ამას ვერავინ ხედავს?
_ ღამით მოჰყავთ, ბატონო, ღამით. ადვილად ჩამოირბენენ, უღებენ კარს, ან საბარგულიდან გადმოყავთ პირდაპირ. არაერთხელ წავესწარი. ხომ არ გგონიათ, გატყუებთ? ახლა რასაც მეუბნებით, ჩემთვის უცნობია, რადგან დილით არ იყო ქალაქის ტერიტორიაზე “დაუბირკავი” ძაღლები.
_ ახლახან გადაღებული ფოტოები გვაქვს _ ყველა ძაღლი იარლიყის და შესაბამისად, ნომრის გარეშეა, რის გამოც მოსახლეობა წუხს.
_ მჯერა, რომ გექნებათ. რამდენიმე წუთში გავალთ და მივხედავთ მაგ საქმეს.
გოგი მაღლაფერიძე, ასევე, გვესაუბრა სოფელ ოზურგეთში არსებული ძაღლების თავშესაფრის შესახებ:
_ ახლა თავშესაფარს უტარდება რემონტი. 15 დღის განმავლობაში დამთავრდება და ძაღლებს მათი მხრიდანაც მაქსიმალური ყურადღება მიექცევა. გარწმუნებთ, არც ახლა ვაკლებთ ყურადღებას, არც ჩვენ და არც ისინი, თუმცა, მოქალაქეები უფრო მეტად იქცევიან უპასუხისმგებლოდ და საზიანოდ ვიდრე _ ძაღლები. მიჰყავთ სახლში პატარა ლეკვები, ზრდიან, მერე ან არ მოსწონთ, ან რჩენა ეზარებათ და ქუჩაში აგდებენ. ცოდვაა ცხოველი, თუმცა, ეს ყველას ესმის? _ გვითხრა მაღლაფერიძემ.
