ოზურგეთის მუნიციპალიტეტის მერია საჯარო ინფორმაციას არ იძლევა _ „გურია ნიუსის“ მიერ 14 დეკემბერს შეტანილ მოთხოვნაზე პასუხი ამ დრომდე არ მიგვიღია.
მუნიციპალიტეტის მერს ჩვენ დანიშვნის ბრძანების ასლები მოვთხოვეთ, რომელიც საქართველოს ზოგადი ადმინისტრაციული კოდექსის თანახმად უნდა მოეწოდებინა, თუმცა, როგორც აღვნიშნეთ, უშედეგოდ _ მერიიდან შუალედური პასუხიც კი არ მიგვიღია, რომ პასუხების მოსამზადებლად ათი დღე ესაჭიროებოდათ.
მიუხედავად ამისა, 10-დღიან ვადას დაველოდეთ და შემდეგ ვეცადეთ, დაგვედგინა, რატომ არ გვაძლევდა ოზურგეთის მუნიციპალიტეტის მერი საჯარო ინფორმაციას და ვინ იყო მერიაში საჯარო ინფორმაციის გაცემაზე პასუხისმგებელი პირი:
„ვერ გევიგე, რაა დარღვეული! დაგიკავათ ვინმემ რამე? ვის მიმართეთ?“ _ აღნიშნა ჩვენთან საუბრისას კონსტანტინე შარაშენიძემ და მას შემდეგ, რაც დეტალების ავხსნა ვცადეთ, ტელეფონი გაგვითიშა.
მოგვიანებით ისევ დავურეკეთ და ვკითხეთ, გვაძლევდა თუ არა საჯარო ინფორმაციას თუ სასამართლოსთვის მიგვემართა. ამის საპასუხოდ შარაშენიძე ყვირილზე გადავიდა:
„ე, ბიჯო, რა სასამართლო! ვიღაცა ხართ ჩემთვის და საერთოდ ნუ რეკავთ“, _ გვითხრა შარაშენიძემ და ტელეფონი გაგვითიშა.
ამ საუბრიდან რამდენიმე წუთში კი ეკატერინე მგელაძე დაგვიკავშირდა, რომელიც მისივე თქმით, გუშინ დაინიშნა საზოგადოებასთან ურთიერთობის განყოფილების უფროსად და გვითხრა, რომ დეტალებს გაარკვევდა.
მოგვიანებით, კი მგელაძემ სოციალურ ქსელში მესიჯი მოგვწერა:
„მე გუშინ დამნიშნეს საღამოს, თორემ მივხედავდი საჯაროს დროულად. ჩასასწორებელია რაღაცეები, ჩაასწორებენ და გამოგიგზავნით“, _ გვწერს მგელაძე.
იმ შემთხვევაში, თუკი ოზურგეთის მუნიციპალიტეტის მერი საჯარო ინფორმაციას დღის ბოლომდე არ მოგვაწვდის, „გურია ნიუსი“ სასამართლოს მიმართავს.
პ.ს. აღსანიშნავია, რომ შარაშენიძეს ჟურნალისტებისთვისთვის პირველად არ მიუყენებია შეურაცხყოფა. 2013 წელს, მაშინ როცა ოზურგეთის მუნიციპალიტეტის გამგებლის მოვალეობას ასრულდება, “გურია ნიუსის” ჟურნალისტის ჟანა მეგრელიშვილის მიერ დასმული შეკითხვა არ მოეწონა და გინებაზე გადავიდა, რისთვისაც, მოგვიანებით, ბოდიში მოიხადა.
