კითხვა, ფინანსდებოდა თუ არა საფეხბურთო კლუბი „მერცხალის“ ფეხბურთელები ადგილობრივი ბიუჯეტიდან, კვლავ პასუხგაუცემელია.
2018 წლის იანვრიდან დღემდე ადგილობრივი ბიუჯეტიდან ჩაერიცხა თუ არა კლუბ „მერცხალის“ ფეხბურთელებს ხელფასები; და თუ ჩაერიცხა, რამდენ ფეხბურთელს და რა რაოდენობის? „გურია ნიუსმა“ ამ კითხვებით ოზურგეთის მუნიციპალიტეტის მერიას მიმართა, მანამდე კი ჩვენთვის ცნობილი გახდა, რომ „მერცხალის“ ფეხბურთელების ერთი ნაწილი ბავშვთა ფეხბურთის მწვრთნელებად იყო გაფორმებული და ხელფასს ადგილობრივი ბიუჯეტიდან იღებდნენ.
ოზურგეთის მერიიდან საკმაოდ მოკლე, არაფრისმთქმელი და, რაც მთავარია, იურიდიულ საფუძველს მოკლებული პასუხი მივიღეთ: „თქვენი 03.09.2018 წლის განცხადების პასუხად, რომელშიც ითხოვთ ინფორმაციას საფეხბურთო კლუბ „მერცხალის“ ფეხბურთელთა დაფინანსებასთან დაკავშირებით, გაცნობებთ, რომ ამ კითხვებით უნდა მიმართოთ კლუბის ადმინისტრაციას“.
„გურია ნიუსმა“ ამ პასუხის კანონიერების შესახებ კომენტარი საქართველოს ახალგაზრდა იურისტთა ასოციაციის ოზურგეთის ოფისის ხელმძღვანელს თამაზ ტრაპაიძეს სთხოვა.
_ ბატონო თამაზ, აქვს თუ არა კანონიერი საფუძველი ოზურგეთის მუნიციპალიტეტის მერიას, არ მოგვაწოდოს საჯარო ინფორმაცია საფეხბურთო კლუბ „მერცხალის“ დაფინანსებასთან დაკავშირებით და გადაგვამისამართოს კლუბის ადმინისტრაციასთან?
_ იმ შემთხვევაში, თუ საფეხბურთო კლუბი “მერცხალი” არის ადგილობრივი თვითმმართველობის მიერ დაფუძნებული კერძო სამართლის იურიდიული პირი ან თუ ფეხბურთელთა დაფინანსების თანხები სახელმწიფო ან ადგილობრივი თვითმმართველობის ბიუჯეტიდან იხარჯება, მერიას უნდა გამოეყენებინა ზოგადი ადმინისტრაციული კოდექსით განსაზღვრული 10-დღიანი ვადა, გამოეთხოვა ინფორმაცია საფეხბურთო კლუბ „მერცხალიდან“ და მოეწოდებინა თქვენთვის.
თუ საფეხბურთო კლუბი „მერცხალი“ არ წარმოადგენს ადგილობრივი თვითმმართველობის მიერ დაფუძნებულ კერძო სამართლის იურიდიულ პირს ან თუ ფეხბურთელთა დაფინანსების თანხები სახელმწიფო ან ადგილობრივი თვითმმართველობის ბიუჯეტიდან არ ფინანსდება, აღნიშნულ შემთხვევაში სწორია გადამისამართება, თუმცა, უპრიანი იყო მერიას გაეკეთებინა შესაბამისი განმარტება და ისე გადაემისამართებინეთ კლუბის ადმინისტრაციულ ორგანოსთან, _ გვითხრა ტრაპაიძემ.
თამაზ ტრაპაიძის კომენტართან დაკავშირებით განვმარტავთ, რომ ოზურგეთის მუნიციპალიტეტის ვებგვერდზე _ oz.gov.ge, საფეხბურთო კლუბი „მერცხალი“ მოხსენიებულია, როგორც ოზურგეთის მუნიციპალიტეტის ა(ა)იპ. აქედან გამომდინარე, მერია ვალდებული იყო „გურია ნიუსისთვის“ მიეწოდებინა საჯარო ინფორმაცია, თუ რა თანხები იხარჯება ბიუჯეტიდან ამ ა(ა)იპ-ზე.
სტადიონის დირექტორი მამუკა გოგუაძე ამბობს, რომ ფეხბურთელები ადგილობრივი ბიუჯეტიდან ფინანსდებოდნენ და ამასთან დაკავშირებით მურთაზ აბაშიძემ უნდა გააკეთოს კომენტარი, თუმცა, ოზურგეთის სტადიონის გენერალური დირექტორი მურთაზ აბაშიძე ჩვენს კითხვებს არ პასუხობს.
„მერცხალის“ საქმეს აუდიტის სამსახური სწავლობს. ოზურგეთის მუნიციპალიტეტის მერიის შიდა აუდიტის განყოფილების უფროსი, გერასიმე ბოლქვაძე ამ ეტაპზე მედიასთან „მერცხალში“ შესვლის მიზეზებზე არ საუბრობს:
„უნდა გვაცალოთ. მიდის გეგმიური შემოწმება და ყველაფერი მას შემდეგ გახდება ცნობილი, რაც დავასრულებთ საქმის შესწავლას“.
„გურია ნიუსი“ კლუბის ბუღალტერს ლია მაზნიაშვილსაც დაუკავშირდა, მაგრამ ამ საკითხზე არც მან გააკეთა კომენტარი:
„საქმეს აუდიტი სწავლობს და ახლა დეტალებზე საუბარი არ შემიძლია“, _ გვითხრა მაზნიაშვილმა, თუმცა, ადრინდელ საუბრებში ადასტურებდა, რომ ფეხბურთელებს ხელფასი ბიუჯეტიდან ეძლეოდათ.
ფეხბურთის განვითარების ფონდის დირექტორის მოადგილე გიორგი კალანდაძე კლუბ „მერცხალში“ ბოლო დროს განვითარებულ მოვლენებთან დაკავშირებით ინფორმაციას არ ფლობს და კითხვაზე, რეგიონულ ლიგაში ეძლევათ თუ არა ხელფასები ფეხბურთელებს ფონდიდან, გვპასუხობს: „ყველა მოგებულ თამაშზე ფეხბურთელებისთვის განკუთვნილია პრემია“.
„გურია ნიუსი“ „მერცხალის“ თემაზე მუშაობას აგრძელებს და ახალ ინფორმაციებს დეტალების დაზუსტებისთანავე შემოგთავაზებთ.
