ოზურგეთის მუნიციპალიტეტის მერი კონსტანტინე შარაშენიძე ნათესავების დასაქმებას და მათ ფინანსურ უზრუნველყოფას განაგრძობს _ მას შემდეგ, რაც ბიძაშვილის მეუღლე შემოქმედის რწმუნებულად დანიშნა და ქალიშვილის სიძეს, ბიუჯეტიდან 30 000 ლარი გადაურიცხა (ამ საქმეს სახელმწიფო უსაფრთხოების სამსახური იძიებს), საკუთარ ბიძაშვილს, დედის ძმისშვილს, დავით გოგუაძეს 73 849,14 ლარის ღირებულების ხელშეკრულება ერთ პირთან მოლაპარაკების წესით გაუფორმა.
ამ თანხით გოგუაძემ ოზურგეთის მუნიციპალიტეტის ძიმითის ადმინისტრაციულ ერთეულში სხვადასხვა სახის სამუშაოები უნდა შეასრულოს.
უფრო კონკრეტულად კი, სოფლის ე. წ. 3-5 ბრიგადის დასახლებაში და სოფლის ცენტრში წყალმომარაგების სისტემა უნდა გააკეთოს; სოფელ ძიმითში (ნასაკირალი) სასაფლაოს აღმართში ბეტონით გზის საფარის მოწყობის სამუშაოები ჩაატაროს; სოფელ ძიმითში (ნასაკირალი) წყლის სისტემის რეაბილიტაცია მოახდინოს და ძიმითის სასაფლაო შეღობოს.
რატომ შეარჩია ერთ პირთან მოლაპარაკების წესით საკუთარი ბიძაშვილი, ამ კითხვაზე ოზურგეთის მერისგან პასუხი ვერ მივიღეთ _ კონსტანტინე შარაშენიძემ ჩვენ სატელეფონო ზარებს არ უპასუხა.
რაც შეეხება შემსრულებელს _ დავით გოგუაძე „გურია ნიუსთან“ საუბრისას ამბობს, რომ ძიმითში სამუშაოები შესრულება შარაშენიძემ პირადად სთხოვა:
_ კოტემ მითხრა, რომ ძიმითი პრობლემური იყო და უნდა მიმეხედა. მე მაქვს გამოცდილება და ასეთი ტიპის სამუშაოსაც ვასრულებ. სხვათა შორის, მარტო კოტემ კი არა, მთელმა სოფელმა მთხოვა, _ აღნიშნა ჩვენთან საუბრისას დავით გოგუაძემ, რომლის თქმით, ძიმითში სამუშაოები ინტენსიურ რეჟიმში მიმდინარეობს.
ეს პროექტი, „საქართველოს სახელმწიფო ბიუჯეტით გათვალისწინებული საქართველოს რეგიონებში გასახორციელებელი პროექტების ფონდიდან“ ფინანსდება და როგორც დავაზუსტეთ, რეგიონული განვითარებისა და ინფრასტრუქტურის სამინისტრომ მუნიციპალიტეტებს რეკომენდაცია მისცა, ხელშეკრულებების გაფორმებამდე ბაზრის კვლევა ჩაატარონ _ ასე მოიქცა მაგალითად, ჩოხატაურის მუნიციპალიტეტი, რომელმაც ბაზრის კვლევაზე ელექტრონული შერჩევა/შეფასება გამოაცხადა კონკურენციის გაზრდის მიზნით.
გადამოწმებისას გაირკვა, რომ მსგავსი პრაქტიკა გამოიყენეს სხვა მუნიციპალიტეტებმაც. თუმცა, ფაქტებით და დავით გოგუაძის კომენტარით თუ ვიმსჯელებთ, ოზურგეთის მერს არც სამინისტროს რეკომენდაცია ადარდებს და მისი მთავარი საზრუნავი ნათესავების კარგად ყოფნაა. წინააღმდეგ შემთხვევაში, ათობით კომპანიას და ინდმეწარმეს იპოვიდა, რომლებიც მსგავსი ტიპის სამუშაოს ასრულებს და მათ შორის, ძიმითშიც.
აღსანიშნავია კიდევ ერთი დეტალი _ კანონით, დედის ძმისშვილი შარაშენიძეს ახლო ნათესავად არ ეთვლება და ინტერესთა კონფლიქტში არ შედის, თუმცა, როგორც იურისტები ამბობენ, ეს ზრდის კორუფციის რისკებს:
_ როდესაც ხელშეკრულება ფორმდება ერთ პირთან მოლაპარაკების წესით და ამ ხელშეკრულებას, ყოველგვარი ბაზრის კვლევის გარეშე უფორმებ ბიძაშვილს, ბუნებრივია, ეჭვები, კითხვები ჩნდება და კორუფციის რისკი იზრდება, _ ამბობენ იურისტები, რომლებსაც მიაჩნიათ, რომ ამ თემით შესაბამისი ორგანოები უნდა დაინტერესდნენ.
ამ საქმეში არის კიდევ ერთი დეტალი _ შარაშენიძის მიერ დავით გოგუაძესთან გაფორმებულ ხელშეკრულებაში ვკითხულობთ: „ხელშეკრულებით გათვალისწინებული ვალდებულებების შესრულების, მოწოდებული საქონლის, შესრულებული სამუშაოს მოცულობის, ხარისხისა და შესრულების ვადების დაცვის კონტროლს (ინსპექტირება) ახორციელებს შემსყიდველის მიერ შექმნილი ინსპექტირების ჯგუფი“ _ ანუ შარაშენიძის ნდობით აღჭურვილი და მას დაქვემდებარებული პირები, რომლებიც, როგორც ოზურგეთში ამბობენ, ნაკლებ სავარაუდოა, რომ მერის ბიძაშვილის მიერ გახორციელებულ სამუშაოებში ხარვეზს აღმოაჩენენ.
