თამარ ნადირიძემ და კახა ჩავლეიშვილმა ოზურგეთის მერიას სასამართლო მოუგეს

ქალაქ ოზურგეთის ცენტრში ჩაის სახლი აღარ აშენდება. ამის საფუძველი კი ქალაქ ოზურგეთის ოზურგეთის რაიონულ სასამართლოს მოსამართლე ბიძინა სტურუას გადაწყვეტილებაა, რომლითაც საკრებულოს დეპუტატის თამარ ნადირიძისა და იურისტის კახა ჩავლეშვილის სარჩელი დაკმაყოფილდა.

 სასამართლომ ბათილად ცნო შემდეგი აქტები: “ქალაქ ოზურგეთის მუნიციპალიტეტის მერის გადაწყვეტილება _ ქ.ოზურგეთის მუნიციპალიტეტის საკრებულოსთვის მიმართვის თაობაზე -ქ.ოზურგეთის მერის 16.12.2016 წლის #01-3246 მიმართვა საკრებულოს, ოზურგეთის მუნიციპალიტეტის საკუთრებაში არსებული უძრავი ქონებიდან 310 კვ.მ. ფართის არასასოფლო-სამეურნეო მიწის ნაკვეთის 45 წლით აღნაგობის უფლების სარგებლობაში გადაცემა პირდაპირი განკარგვის წესით“; “ქალაქ ოზურგეთის მუნიციპალიტეტის საკრებულოს ბიუროს რიგგარშე სხდომის 19.12.2016 წლის ოქმში #24 მუნიციპალიტეტის საკუთრებაში არსებული უძრავი ქონებიდან 310 კვ.მ. არასასოფლო-სამეურნეო მიწის 45 წლით აღნაგობის უფლების სარგებლობაში გადაცემაზე პირდაპირ განკარგვაზე საკითხის მომზადებულად ჩათვლისა და საკრებულოს სხდომაზე დასამტკიცებლად გატანის ნაწილში“; “ქალაქ ოზურგეთის მუნიციპალიტეტის საკრებულოს 20.12.2016 წლის რიგგარეშე სხდომის (ოქმი #24) მიერ მიღებული განკარგულება ოზურგეთის მერისთვის ქალაქ ოზურგეთის მუნიციპალიტეტის საკუთრებაში არსებული უძრავი ქონებიდან 310 კვ.მ. ფართის არასასოფლო-სამეურნეო მიწის 45 წლით აღნაგობის უფლების სარგებლობაში გადაცემაზე პირდაპირი გაკარგვაზე თანხმობის მიცემის თაობაზე“.

ამ ყველაფრის შესაბამისად, “ქართული ოცნების” აქტივისტი ნუგზარ გიორგაძე, საკრებულოზე დამტკიცებულ პროექტს ვეღარ განახორციელებს.

უნდა ითქვას ისიც, რომ თავის დროზე, ამ საკითხის საკრებულოზე განხილვას ხმაური და დაპირისპირება მოჰყვა. მაშინ ქალაქის მერი, ბეგლარ სიორიძე ამბობდა, რომ ე.წ. 9 აპრილის სკვერში ჩაის სახლის აშენება ძალიან კარგი იდეა იყო:

“კიდევ ერთხელ ხაზგასმით აღვნიშნავ,  თუკი რომელიმე მოქალაქე, შემოვა რაიმე პროექტით, რომ ოზურგეთში სურს რაიმეს გაკეთება, ჩვენ ყველანი ვალდებულები ვართ, მხარი დავუჭიროთ ასეთ ინიციატივას. ჩვენ არ ვართ განებივრებულები ინვესტორებით. რა დაგემართათ, ბოლოს და ბოლოს, ნუთუ, ამ საბნელეთიდან ვეღარ უნდა გამოვიდეთ? რა არის ეს, რა უბედურებაა?! ადამიანს უნდა ჩაის სახლის გაკეთება, თუნდაც ამ სკვერში, სადაც შეიძლება ადამიანები დავსხდეთ და საჭირბოროტო საკითხები განვიხილოთ ჩვენი ქალაქისთვის, რანაირი მიდგომაა ეს, გამაგებინეთ!” _ ამბობდა სიორიძე.

ამ ეტაპზე უცნობია გაასაჩივრებს თუ არა ქალაქის მერია ოზურგეთის რიაონული სასამართლოს გადაწყვეტილებას. ცნობილია ის, რომ ამავე გადაწყვეტილებით მერიამ კახა ჩავლეიშვილს 200 ლარი უნდა გადაუხადოს.

ამავე თემაზე: რა სარჩელით მიმართა საკრებულოს წევრმა სასამართლოს მერიის წინააღმდეგ