7 ივლისს, ოზურგეთის მ. ბერძენიშვილის სახელობის სახვითი ხელოვნების ცენტრმა ჩოხატაურელ მხატვარს, არჩილ კუტალაძეს უმასპინძლა.
ამ წლის 4 მარტისთვის დაგეგმილი გამოფენა, რომლის შეფერხების მიზეზი პანდემია და ამის გამო, გამოცხადებული საგანგებო მდგომარეობა გახდა, სახვითი ხელოვნების ცენტრში სეზონის გახსნაა და ასე ვთქვათ, აღმავალი ტრენდი გახდა ხელოვნების მოყვარულთათვის.
დარბაზში, კედლებზე სიცოცხლის ფერები მაქსიმალურად ჭარბობდა, რომელსაც მნახველში ასეთივე ემოცია გადმოჰქონდა.
_ არჩილ კუტალაძე ძალზე პროდუქტიული, დაუღალავი, მრავალმხრივი მხატვარია, რომლის შემოქმედებიდან რეალიზმი, აბსტრაქციონიზმი, კუბიზმი თუ გრაფიკული ხელწერა ავტორისეულ ხედვაშია შერწყმული და მნახველშიც თავისუფლად გადმოდის. აქ გამოფენილი მისი 70 ნახატიდან, ყველა 2018- 2020 წლებშია შექმნილი, _ თქვა სახვითი ხელოვნების ცენტრის წარმომადგენელმა, ლია ურუშაძემ. მან გამოთქვა კმაყოფილება, რომ საგანგებო მდგომარეობის შემდეგ, მოგვიანებით, მაგრამ მაინც კარგ დროს შედგა, ოზურგეთის სახვითი ხელოვნების ცენტრში ცოცხალი შემოქმედებითი საღამო, რომლის მოწყობის დიდი სურვილი თავად მხატვარს ჰქონდა.
სახვითი ხელოვნების ცენტრის დირექტორმა, ავთანდილ თავართქილაძემ თავისი ემოციური სიტყვით, არჩილ კუტალაძე კიდევ უფრო ახლოს მიიყვანა მხატვრობის მოყვარულთა გულებთან:
_დღევანდელი დღე ისეთივეა ჩვენთვის, როგორც ადამიანისთვის სუფთა ჰაერი. იმ დღიდან მოყოლებული, როცა საჭირო გახდა თვითრეალიზება, ადამიანი ქუჩაში ხელში ფუნჯითა და საჭრეთლით იდგა, ხატავდა და არჩენდა ოჯახს. ამავე დროს, ქმნიდა ხელოვნებას. მხატვარი ის არის, ვინც თავისი მხატვრობით ჩანს და არჩენს ოჯახს. ძალიან დიდი ენერგეტიკა მოდის მისი შემოქმედებიდან. ყველა ნახატში თავისებური მუსიკა დევს. კომპოზიციებით და ნათელი ფერებითაა დატვირთული მთელი ეს შემოქმედება. მიხარია, რომ მას ძალიან სურდა აქ, ჩვენს სახვით ცენტრში შემდგარიყო ეს გამოფენა, რომელიც 4 მარტს იყო დაგეგმილი და მაინც შედგა დღეს – თქვა მან.
არჩილ კუტალაძეს მიესალმა ოზურგეთის მერიის განათლებისა და კულტურის სამსახურის უფროსი მარინა ჯაფარიძე. მან გამორჩეული სტილისადა დაუღალავი შრომის სანაცვლოდ შექმნილი შემოქმედებისთვის, რომლითაც დიდი სიხარულს ანიჭებს ხელოვნების მოყვარულებს, მადლობა მოუხადა ნიჭიერ მხატვარს.
არჩილ კუტალაძის შემოქმედებაზე ისაუბრა გურიის მხატვართა კავშირის თავმჯდომარემ, თამაზ დარჩიამ. მან მხატვრის შემოქმედებას, ქართულ მხატვრობაში დადებული კიდევ ერთი აგური უწოდა, რომელიც თავისი სტილით სამყაროს ახლებურად დანახვის შანსს აძლევს ადამიანს.
_დარბაზში რომ შემოდიხარ, უკვე ხედავ რომ ოზურგეთის სახვითი ხელოვნების ცენტრში გაზაფხულია. აქედან ენერგეტიკა მოდის, უხილავი, ულევი. რომ შეხედავ, უკვე ხვდები, რომ ეს არჩილის ნამუშევარია. ასეთი ცნობადობა რომ დაუმკვიდრო საკუთარ ნამუშევარს, არ არის ადვილი, _ თქვა თავისი მისალმებისას, ცნობილმა მხატვარმა ვახტანგ მამეშვილმა.
ჩოხატაურის მუნიციპალიტეტის მერიის, განათლებისა და კულტურის სამსახურის უფროსმა, გოჩა დათაშვილმა მადლობა მოუხადა და შეაფასა მხატვრის შემოქმედება.
_ პირველ რიგში, უღრმესი მადლობა იმისთვის, რომ დარბაზში შემოვედით სამთვიანი უძრაობის შემდეგ და ასეთი სამყარო გვხვდება. აბსტრაქციონიზმი და კუბიზმი შეუთავსო ერთმანეთს, არ არის ადვილი. ბევრ მის ნახატში აშკარდ ჩანს მუსიკა. იმედია, ის მომავალში უფრო მეტად გაგვახარებს, – თქვა გოჩა გათაშვილმა.
არჩილ კუტალაძეს, გარდა ამ ნამუშევრებისა, მარტო პანდემიის პერიოდში, 90-მდე ნახატი აქვს შექმნილი რომელც ჯერ სამზეოზე არ გამოუტანია და სამომავლოდ აპირებს გამოფენას.
_მე მინდა, უდიდესი მადლობა მოვუხადო ყველას ოზურგეთის სახვითი ხელოვნების ცენტრში. სიმართლე გითხრათ, ოზურგეთელი მხატვრების, ასე ვთქვათ, მეშინოდა კიდეც. კრიტიკა აუცილებელია და მეტიც, მის გარეშე ხელოვნება ვერ იქნება, თუმცა მათ მაინც რაღაცნაირად თბილად გამაკრიტიკეს, რაც სტიმულია ჩემთვის. ბევრი რამ უკვე სხვანაირად დავინახე. სულ სხვას ის ხედვა, რომლითაც შენ განსხვავებული, საკუთარი ხელწერის მქონე უნდა იყო. კიდევ ერთხელ დიდი მადლობა. არ შევმცდარვარ, ასე ძალიან რომ მსურდა ჩემი გამოფენა აქ, ოზურგეთში შემდგარიყო, – თქვა „გურია ნიუსთან“ არჩილ კუტალაძემ.
დღეისთვის ოზურგეთის სახვითი ხელოვნების ცენტრში არჩილ კუტალაძის გამოფენა გრძელდება და ერთი თვის მანძილზე ხელოვნების მოყვარულებს ექნებათ საშუალება, მათ გაეცნონ.
„სიყვარული“, „ორი ფიქრი ერთ სულში“, „საქსაფონი“, „ტაიმ-აუტი“, „ახალი სიცოცხლე“, „ნიღაბი“, „დაფარული ვნებები“, „ფიქრია“, „ავტოპორტრეტი“, „კოპისტა“, „სინათლის ქალაქი“ – ესენი და კიდევ ბევრი სხვა ნამუშევარი, რომლებიც გამოფენილია ახლა ოზურგეთის გალერეაში, სწორედ ის ქმნილებებია, რომელთა ხილვამ აქ მოსულ დამთვალიერებელს სხვა ხელწერის მქონე მხატვარი დაანახა.
უახლოეს მომავალში, ოზურგეთის სახვითი ხელოვნების ცენტრში დაგეგმილია არაერთი ცოცხალი ღონისძიება.
უძრაობის რამდენიმეთვიანი პერიოდის შემდეგ, როგორც დირექტორმა ავთანდილ თავართქილაძემ გვითხრა, ეს არის სახვითი ხელოვნების ცენტრის მხრიდან უდიდესი პოზიტიური სვლა, შემოქმედების მოყვარულთა გულებისკენ. მალე აქ ნახავენ აჭარის ხელოვნების მუზეუმის დირექტორის ნინო ნიჟარაძის და ბესო ბესელიას ნამუშევრების გამოფენას. შემდეგ კი გურიის შემოქმედებითი ჯგუფისა და ბექა ხინთიბიძის გამოფენას უმასპინძლებენ. შემოდგომაზე ასევე დაგეგმილია უმნიშვნელოვანესი მოვლენის, მერაბ ბერძენიშვილის ბიუსტის საზეიმო გახსნა, სახვითი ხელოვნების ცენტრის წინ.
