ოზურგეთის ბაზრის ტერიტორიაზე (საუბარია წინ ნაწილზე) განლაგებული სასურსათო მაღაზიების გახსნა იგეგმება. სურსათის ეროვნული სააგენტოს გურიის რეგიონული სამმართველოს უფროსი, მანანა ერქომაიშვილი, ჩვენთან საუბრის დროს ამბობს, რომ მაღაზიების გახსნა დღეს ან ხვალ მოხდება.
„მაღაზიების წინ განლაგებული ჰქონდათ სასურსათო-სასოფლო მეურნეობის პროდუქტები, რაც არ შეიძლებოდა. ამის გამო მაღაზიები დროებით დაიკეტა. ახლა გაიხსნება მხოლოდ ის მარკეტები და მაღაზიები, რომლებმაც გაითვალისწინეს ჩვენი რეკომენდაციები. მინდა ასევე აღვიშნო, რომ მაღაზიების გახსნა, არ ნიშნავს აგრარული ბაზრის გახსნას. ოზურგეთის აგრარული ბაზრის გახსნა ამ ეტაპისთვის არ იგეგმება, ეს მოხდება მაშინ თუ შეასრულებენ იმ რეკომენდაციებს, რომლის შესრულება ამ ეტაპზე დიდად მნიშვნელოვანია“,_ გვითხრა სურსათის ეროვნული სააგენტოს გურიის რეგიონული სამმართველოს უფროსმა, მანანა ერქომაიშვილმა.
„გურია ნიუსი“ უცვლელად გთავაზობთ იმ რეკომენდაციებს, რომელიც სურსათის ეროვნულმა სააგენტომ ქალაქ ოზურგეთში მდებარე აგრარული ბაზრის დირექციას ოფიციალურად გადასცა.
მოვაჭრე პერსონალის ვალდებულებები – აგრარულ ბაზარში მოვაჭრე პერსონალი ვალდებულია (ამონარიდი): ა) სამუშაო პროცესი განახორციელოს ამ რეკომენდაციების და ბიზნესოპერატორის მითითებების შესაბამისად; ბ) სამუშაო ადგილზე დაიცვას ჰიგიენის წესები; გ) მისალმებისას არ ჩამოართვან ხელი ერთმანეთს და მოერიდონ სხვებთან კონტაქტს (შეხებას და სხვა); დ) არ გადასცენ მობილური ტელეფონი გამოყენებისთვის სხვა პირს;ე) მოერიდონ თავშეყრას, დაიცვან რეკომენდაციით გათვალისწინებული სოციალური დისტანცია (არანაკლებ 2 მ-სა); ვ) სამუშაოების შესრულებისას გამოიყენონ ინდივიდუალური დაცვის საშუალებები, რომელსაც აწვდით ან/და მიუთითებთ ბიზნესოპერატორი დამსაქმებელი; ზ) სამუშაოს დაწყებისა და დამთავრებისას სადეზინფექციო საშუალებებით დაასუფთავონ სამუშაო ადგილები და ის ხელსაწყოები, რომელსაც იყენებენ სამუშაო პროცესის მიმდინარეობისას; თ) სამუშაო ადგილზე არ გამოიყენონ სამკაულები, ხელის ჰიგიენის სრულყოფილად ჩატარებისათვის; ი) ხელის ჰიგიენა ჩაიტარონ დამატებით აუცილებლად : ი.ა) საკვების მიღებამდე და მიღების შემდეგ; ი.ბ) დახველების ან დაცემინების შემდეგ; ი.გ) საპირფარეშოთი სარგებლობამდე და შემდეგ; კ) საფუძვლიანად დაიბანონ ხელები წყლითა და საპნით. დაბანის შემდგომ ხელები კარგად გაიმშრალონ; ლ) გამოიყენონ სპირტის შემცველი ხელის საწმენდი საშუალებები იმ შემთხვევაში, თუ ვერ ახერხებენ ხელების დაბანას და გაშრობას. მ) დახველების და დაცემინების დროს მიიფარონ სუფთა ერთჯერადი ხელსახოცი ან იდაყვი. გამოყენებული ერთჯერადი ხელსახოცი კი გადააგდონ ურნაში/კონტეინერში;ნ) მოერიდონ ხელებით თვალებზე, ცხვირზე და პირზე შეხებას. მუშაობის პერიოდში მჭიდროდ დაიმაგრონ თმა, რათა მაქსიმალურად შეიზღუდოს თმისა და სახის შეხება;ო) უზრუნველყოს სამუშაო სივრცის დროული დასუფთავება და ნარჩენების დროული გატანა.
ინფორმაციისთვის, ოზურგეთის აგრარულ ბაზარში ვაჭრობა გასულ კვირას აიკრძალა.
ამავე თემაზე: https://gurianews.com/article/mtavari/sazogadoeba/ras-itkhoven-ozurgetis-kerdzo-maghaziebis-
