ოზურგეთის მუნიციპალიტეტის საკრებულოს თავმჯდომარე დავით დარჩია და დეპუტატები მოგვიანებით მივიდნენ ოზურგეთში, ჭავჭავაძის ქუჩაზე გაჩეხილ გაზონებთან. მათ საყვედურით მიმართეს აქ მომუშავეებს და ჰკითხეს, ვისი ინიციატივით და რატომ გადაწყვიტეს, გადაეჩეხათ გაზონები.
დეპუტატმა ლავრენტი ბიგვავამ ოზურგეთის მომსახურების ცენტრის უფროსს თენგიზ ქუტიძეს მიმართა:
_ ფორმირებას კი არ აკეთებთ, ეს არის ძალიან ცუდად გადაჭრა. რატომ არ შემოდით წინადადებით, რომ ეს პროექტი გქონდათ? იქნებ დაგთანხმებოდით, თუ კარგად გაკეთდებოდა ან სულაც უარი გვეთქვა. რა საქციელია ეს? რაღაც სქემა მაინც ხომ უნდა წარმოგედგინათ საკრებულოში?
_ ცოტა წამოიზრდება და ზომიერად დავტოვებთ, _ თქვა ქუტიძემ.
_ არ იყო ზომაზე? _ გამოეხმაურნენ დეპუტატები.
დეპუტატმა მარი ჩხიკვიშვილმა ჰკითხა ქუტიძეს, დოკუმენტურად თუ ჰქონდათ რაიმე გაკეთებული, რომ ეს ნამდვილად არ გახმება, რაზეც უპასუხეს, რომ საბუთით არაფერი გაკეთებულა, თუმცა გახმობის საფრთხე არ არსებობს.
ტარიელ აროშიძემ შეახსენა მათ, რომ გასულ წელს, როცა ტოტი მიატეხეს ამ შესანიშნავ ნარგავებს და ერთი ბუჩქიც მოიპარეს, საპატრულო პოლიცია გამოიძახეს და მერე მსგავსი არ მომხდარა.
დავით დარჩიამ „დეკორატორებს”, უჩვეულო სიმკაცრით უთხრა, ზემოთ აღარ გააგრძელოთ გაზონების გადაჭრა და მსგავს რაიმეს რომ აკეთებთ, საკრებულოს უნდა შეუთანხმდეთო.
დეპუტატებმა აღნიშნეს ისიც, რომ ძალიან ბევრმა, ძალიან ცუდად გაიგო ეს ყველაფერი. ზევით ძროხები ჭამენ ყველაფერს, ქვემოთ ესენი ჩეხავენ. ამ დიდ ხუთშაბათს ოზურგეთის შესაბამის სამსახურს საქმე დაელია, ბოროტებად აღქმული ქმედება რომ არ ჩაიდინონო?
ადგილზე მოვიდა ოზურგეთის ყოფილი მერი ბეგლარ სიორიძე.
_რას შვებით, ხალხო? ამას ნორმალური ადამიანი იზამს? ჭადარი ხომ არის, რომ გადაჭრა? სიმწრით გახარებული და გაზრდილი ასე უნდა გააჩანაგოთ? რა შუაშია, ვინ დარგო, როდის დარგო… რა საქციელია, ადამიანებო? რატომ შვებით ამას, რატომ? _ კითხვით მიმართა ირგვლივ მყოფთ.
_ ქუტიძემ განაცხადა, რომ წამოიზრდება და ფორმას მისცემდნენ, რაზეც სიორიძემ უთხრა, გაზრდილი მოჭერით და ახლა გაიზრდებაო, მეუბნებით? გაკრეჭა უნდა გაზრდილს, 80 სმ სიმაღლის გზაგამყოფი რა მოძრაობას უშლის ხელს? რა მანქანით დადიხართ, რომ 80 სანტიმტრით დაბლა იყურებით? და სად იყურებით საერთოდ? ვარდებით იყო მოედანი სავსე და ერთი ძირი აღარ არის. ოზურგეთის სავიზიტო ბარათად იყო ქცეული ეს ყველაფერი და რას შვებით? თუ ჩემს ჯინაზე ამას აკეთებს ვინმე, მაშინ ადექით და ზვანიდან გაკირულამდე გადაწვით ქალაქი. რა უბედურებაა ეს? _ თქვა სიორიძემ და მალე იქაურობა დატოვა.
დეპუტატები და ქუტიძის ბრიგადა შეთანხმდნენ, რომ ჭავჭავაძის ქუჩის იქით აღარ გააგრძელებდნენ ბუჩქების გადაჭრას.
„გურია ნიუსთან“ საკრებულოს თავმჯდომარემ და დეპუტატებმა განაცხადეს, რომ ამ მომენტისთვის ზეპირი შეთანხმება შედგა და ხვალიდან თვალს მიადევნებენ აქ განვითარებულ მოვლენებს.
ამავე თემაზე:
ბეგლარ სიორიძე: ნუთუ ასე წავიდა ოზურგეთის საქმე _ ამასაც დაიჯერებენ?
რას აპროტესტებენ ოზურგეთის საკრებულოს წევრები ოზურგეთის ცენტრში (ვიდეო)
ოზურგეთის მუნიციპალიტეტის მერია გაზონების ჭრის საკითხს ეხმაურება
მარადმწვანე ჭანჭყატის გაკრეჭა თუ გაჩეხვა _ ოზურგეთის ცენტრში გაზონებს შეესივნენ
