რამდენიმე დღის წინ, ქალაქ ოზურგეთში ყაჩაღობა მოხდა. გრიბოედოვის ქუჩაზე , #25 მდებარე, მრავალბინიან კორპუსში მცხოვრები ა.ს. ორმა ნიღბიანმა სახლიდან გამოსვლის დროს დააყაჩაღა. შემთხვევა 13 იანვარს, დილის 6 საათზე მოხდა. “გურია ნიუსის“ წყაროს ინფორმაციით, დაზარალებულს 50 ათასი ლარი წაართვეს, მანამდე კი სასტიკად, კომბლებით სცემეს. ინფორმაციას ადასტურებენ შსს და განმარტავენ, საქმეზე აღძრული იყო სსკ 178 მუხლით, რაც ძარცვას გულისხმობს, თუმცა, შემდეგ გადაკვალიფიცირდა ეს მუხლი და ამჟამად გამოძიება მიმდინარებს სსკ 179 მუხლით, რაც ყაჩაღობას გულისხმობს.
აღნიშნულ საქმესთან დაკავშირებით, სამართალდამცავებს ჯერ არავინ დაუკავებია.
როგორც დაზარალებული ა.ს.“გურია ნიუსთან“ აღნიშნავს, ის თბილისში სავაჭროდ მიდიოდა:
_ მაქვს საკუთარი ბიზნესი ოზურგეთში, მაღაზიები. საკუთარ სადარბაზოსთან დამხვდნენ 6 საათზე, წამართვეს თანხა. პოლიცია ყოველდღე მუშაობს გაძლიერებულად. თუმცა, ინფორმაციას არ მეუბნებიან. რა ხდება, არ ვიცი, სანამდე არ იქნება რეალური შედეგი, იქამდე. მე მარტო ვიყავი, ყველა დაკითხეს ამ უბანში. პირველ სართულზე, სადარბაზოსთან გაიგონა მეზობელმა ჩემი ხმა და იყვირა, არ მოკლათო. მე უკვე წაქცეული ვიყავდი და მირტყამდნენ. დამნაშავეებმა ჩემ შესახებ ყველაფერი იცოდნენ. სავარაუდოდ, ის არის ჩვენი ძალიან ახლობელი.
აღნიშნული ბინის პირველ სართულზე მცხოვრები შუა ხნის ქალბატონი ე.რ. “გურია ნიუსთან“ ყაჩაღობის დეტალებს იხსენებს:
_ რომ შემომესმა ხმა, გავიხედე და დავინახე, რომ ვიღაც ეგდო, გამოთლილი კომბლებით ურტყამდნენ. მე რომ დავინახე, ნიღბები აღარ ეკეთათ, მაგრამ როგორც დაზარალებული ამბობს, თავიდან ნიღბებით იყვნენ. რა თქმა უნდა, შემეშინდა, მაგრამ ინსტიქტურად ვყვიროდი. გამოცვივდნენ მეზობლები. აქ მცხოვრები აბსოლუტურად ყველა ოჯახი წაიყვანეს დაკითხვაზე. ძალიან დიდ თანხაზეა საუბარი. ა.ს-ს უთქვამს გიცანითო. მოსაკლავად ჰყავდათ განწირული. ფული რომ არ მიეცა, ალბათ მოკლავდნენ. ახლა თვითონ ა.ს. აღარ ამბობს და მე „მაწვება“ პოლიცია და პროკურატურა _ შენ დაინახე და თქვი, ვინ იყვნენო. მე რა ვიცი, განათება არ იყო და რას ვიცნობდი. ახლა მგონი მე მაბრალებენ ყაჩაღობას, ისე მიბღვერენ, _ ამბობს “გურია ნიუსთან“ ე.რ. და თავისი სიძის ყაჩაღობის ამბავს იხსენებს, რომელიც რამდენიმე თვის წინ მოხდა და საქმე პოლიციის მიერ გახსნილი ჯერ კიდევ არ არის:
_ ასე გაუკეთეს ზუსტად ჩემს სიძეს, მსგავსი ხელწერით, ასეთივე კომბლებით სცემეს. ბათუმის ქუჩაზე ცხოვრობს დ.გ. მას ბანკის ვალი ჰქონდა. გამოიტანა მეორე ბანკიდან 8 000 ლარი და იქ შეიტანა. ეტყობა ეგონათ, რომ სახლში წაიღო ეს ფული. ამის გამო მიადგნენ სახლში და ზუსტად ისეთივე გამოთლილი ჯოხებით უმოწყალოდ სცემეს და დაჩეხეს, მოგვეცი ფულიო. ახლა დადის ყავარჯნით. ეს ამბავი, დაახლოებით, ერთი წლის წინ მოხდა. არ არის ეს საქმე გახსნილი, დამნაშავეები არ არიან დაჭერილები. კლავდნენ და მეზობლებმა გადაარჩინეს. ისეთ დღეში არიან შვილი და სიძე ჩავარდნილები, ბანკი სახლს ართმევს. უსახლკაროდ რჩებიან. პოლიცია დუმს.
შსს აღნიშნულ ფაქტთან დაკავშირებით განმარტავენ, რომ შემთხვევაზე გამოძიება მიმდინარეობს სსკ 117 მუხლით, რაც სხეულის განზრახ მძიმე დაზიანებას გულისხმობს.
“გურია ნიუსის“ წყაროს ინფორმაციით, ა.ს-ს დაყაჩაღების ფაქტზე დაკითხეს, ასევე, ახალგაზრდა ქალბატონიც, რომელსაც პოლიციამ სოფელ მაკვანეთში, სახლში მიაკითხა. მას სამართალდამცავები მთელი ღამის განმავლობაში კითხავდნენ.
აღნიშნულ საქმესთან დაკავშირებით შსს-ში განმარტავენ, რომ ამ ეტაპზე მიმდინარეობს ინტენსიური საგამოძიებო მოქმედებები, ჩანიშნულია შესაბამისი ექსპერტიზები, ამიტომ იმ პირების შესახებ ინფორმაცია, ვინც დაიკითხა, ინფორმაცია შსს-ში გასაიდუმლოებულია.
