დღეს, ოზურგეთის ცენტრალურ ბიბლიოთეკაში შეხვედრა მოუწყვეს ქალაქის მეორე საჯარო სკოლის ქართული ენისა და ლიტერატურის მასწავლებელს მაია ღლონტს და ამავე სკოლის მე-11 კლასელ ნიკოლოზ შაფაქიძეს. დედა-შვილთან შეხვედრის მთავარი მოტივი მათი პოეზია გახლდათ, რომელსაც საქართველოში, განსაკუთრებით, ლიტერატურულ წრეებში, კარგად იცნობენ.
ბიბლიოთეკის დირექტორი ლიკა ბაქანიძე მოწვეულ სტუმრებს ესაუბრა პოეტი დედაშვილის მიმართ საზოგადოების დიდ სიყვარულზე, რომ უნიკალური შესაძლებლობების მქონე მაია ღლონტის გენეტიკური გზა შვილზეც გადავიდა და ნიკოლოზ შაფაქიძე უკვე სერიოზული ლექსების ავტორია.
_ ბევრს ვერაფერს გეტყვით, ჩემს სათქმელს ჩემი ლექსები ამბობენ და უდიდეს მადლობას მოგახსენებთ ამ ლამაზი დღისთვის, _ თქვა მაია ღლონტმა და ის ლექსები წაიკითხა, რომელიც ყველაზე მეტად უყვარს.
სახეებით აზროვნება და ახალი შედარებები უხვად არის არის მობნეული მის ლექებში: „სიზმარცხადა გაზაფხული“, „შემოდგომის მწუხრისფერი განტოლება“, „ხეტიალივით დამჩემდი“ და კიდევ მრავალი სხვა.
სტუმრებმა ისაუბრეს, მაია ღლონტზე, როგორც შემოქმედებით, მოღვაწეობით, ქალურობით, ნიჭიერებით გამორჩეულ ადამიანზე.
_ ყველამ კარგად იცის, როგორი შრომა უწევს სიტყვიერების მასწავლებელს გაკვეთილზე, მით უფრო, თუ ის ბუნებისგან მომადლებული ნიჭითაა დაჯილდოებული. მის სიტყვას სულ სხვა ძალა აქვს, სხვა სურნელი ასდის. დედისგან შვილზე გადასული ნიჭის მადლმა ახალ გასაქანი იპოვა და ეს არის ჩვენთვის სასიხარულო. მიხარია და ვარ ბედნიერი, რომ მას დიდი ხანია ვიცნობ და არის ჩვენი სკოლის სამაგალითო მასწავლებელი, _ თქვა ოზურგეთის მეორე საჯარო სკოლის დირექტორმა ფატი სიორიძემ.
განსაკუთრებით ამაღელვებელი იყო მოსწავლეების მიმართვა. მარიამ სამსონიამ ემოციურად „აღიარა“, რომ მაია მასწავლებელს სამი შვილი კი არა ყველა ჩვენ ვყავართ, მსგავსი არავინ მინახავს. რაც შეეხება ნიკუშას, ის მხოლოდ ნიჭიერებით კი არა, საოცარი ადამიანურობით გამორჩეული ახალგაზრდაა, ჩვენი კლასის იმედია.
შეხვედრაზე არაერთი გულიდან წამოსული სიტყვა ითქვა. პედაგოგმა ლალი ბასილაშვილმა კი ასეთი აკორდით დაასრულა შეხვედრა: „თქვენი მოსწავლეები ქართულად აზროვნებენ, ქართული სურნელი ასდის თქვენს შემოქმედებას და ყველაზე მთავარი, რაც დავინახე _ თქვენი მოსწავლეები გეჯიბრებიან. ეს კი ბედნიერებაა! გილოცავთ და მადლობა ამ სიხარულისთვის“ _ თქვა მან.
პედაგოგთა პროფკავშირის რაიონული ორგანიზაციის თავმჯდომარემ როზა გოგუაძემ სამახსოვრო საჩუქარი გადასცა ქალბატონ მაიას, ხოლო ბიბლიოთეკის დირექტორმა ლიკა ბაქანიძემ ყველაზე სიმბოლური საჩუქარი _ ოქროსწვერიანი კალამი გადასცა დედა-შვილს.
