ოზურგეთის ბაზარში, ცნობილი მოვლენების შემდეგ, როცა ის რამდენჯერმე დაიკეტა და კვლავ გაიხსნა, შედარებით დარეგულირდა სიტუაცია. მოწესრიგდა და დასუფთავდა ისეთი ადგილები, სადაც ანტისანიტარიის ბუდე იყო.
დღეისთვის ბაზარში ჩვეულებრივი ხალხმრავლობაა, უმეტესობა ხილს, ბოსტნეულის თუ ყვავილების ნერგებს დაეძებს.
ახლა ძირითადად აქ მოვაჭრეთა უმრავლესობა ფასების სიძვირესა და რეგულაციებით გათვალისწინებული ნიღბების გაკეთებაზე ბუზღუნებენ.
_შვიდი ლარი რომ ბალი ეღირება და ათი ლარი ჟოლო, ისეც აკრული გაქ პირი, რად გინდა კორონა და პანდემია. ყველი გააიაფო და რვა ლარია ერთი კილოგრამი, ესაა იაფი? რას ერჩი საპანდემიო ფასებია, ყოლისფერს ეძებნება გამართლება, _ ხმამაღლა ესაუბრებიან ერთმანეთს გაფაციცებით მოსიარულე გურულები.
ბაზარში განსაკუთრებით მაღალი ფასებია ახლად შემოსულ ხილზე. კერძოდ, ერთი კილოგრამი ბალი ხუთიდან შვიდ ლარამდე ღირს, მარწყვი – ოთხი ლარია, გარგარი სამლარნახევარი, ერთი კილოგრამი ატამი კი _ 2,50 ლარი. ალუბალი -ხუთი ლარი. ალუჩა – 2,50 ლარი, ერთი კილოგრამი საზამთრო კი 1 ლარი ღირს.
არც ისე იაფია ბოსტნეული. ერთი კილოგრამი ხარისხიანი კარტოფილი ერთი ლარი ღირს, პომიდორი 2 ლარი, შედარებით გაიაფდა მხოლოდ კიტრი, _ ერთი კილოგრამი 70-80 თეთრი ღირს. ნიორი, რომლის ფასმა გასულ თვეებში, თითქმის, 30 ლარს მიაღწია, დღეისთვის ხუთი ლარი ღირს.
ბოლო სამიდღის განმავლობაში გაიზარდა რძის ნაწარმის ფასი. ერთი კილოგრამი ყველი ახლა რვა ლარი ღირს. ცოტა ხნის წინ კი 6,50_7 ლარად შეიძლებოდა ერთი კილოგრამის ყიდვა. ერთ ლიტრ რძეს ორ ლარად ყიდიან.
რაც შეეხება ხორცის ფასს, ერთი კილოგრამი 16 ლარი ღირს. შვიდი ლარი ღირს ერთი კილოგრამი ახალი თევზი.
თუ ბაზრის საერთო სურათს დავაკვირდებით ფასების კლება-მატების მხრივ, როგორც საბაზრო ეკონომიკის დინამიკას ჩვევია, მერყეობა სახეზეა და ყოველდღიური სტანდარტული ფასი არ არსებობს. რაც შეეხება ყველაზე ძვირ ან პირიქით ყველაზე იაფ პროდუქციას, ამ მხრივ ახლა „ორ პოლუსს“ ხილი (ყველაზე ძვირი) და ბოსტნეული (შედარებით ყველაზე იაფი) განსაზღვრავს, ასევე გაიაფდა ბოსტნეულის და ყვავილების ნერგებიც, რომელიც ერთი თვის წინ სამჯერ უფრო ძვირი იყო, ვიდრე დღეს არის.
შაქარი რომ გაგვიიაფეს, ესაა საკვირველი და მადლობა ვის შევწიროთ, მთავრობას თუ პანდემიას, ეს აღარ ვიცით, – კვლავ ხუმრობენ გურულები და თან ერთმანეთსაც ურჩევენ, როგორმე მოახერხონ და შაქარი, რომელიც დღეს, ერთი კილოგრამი 1 ლარი და 45 თეთრი ღირს, როგორმე მოახერხონ, იყიდონ და შეინახონ, უახლოეს მომავალში, მურაბების თუ ღვინის გასაკეთებლად.
