ოზურგეთის მუნიციპალიტეტის მერმა, პაატა კუნჭულიამ „გურია ნიუსის“ კითხვებს ოზურგეთის მუნიციპალიტეტის 2026 წლის ბიუჯეტის დამტკიცების დღეს უპასუხა.
პაატა კუნჭულია: _ 2026 წლის ბიუჯეტის პრიორიტეტი არის ინფრასტრუქტურა, განათლება, კულტურა, ჯანდაცვა და სპორტისა და სოციალური საკითხები. 2026 წლის ბიუჯეტის 48 მილიონ 070 ათასი ლარია. ბიუჯეტი მორგებულია ჩვენი მოქალაქეების საჭიროებას და მხარდაჭერას.
_ „ქართული ოცნების“ დეპუტატების სიტყვის გამოსვლისას აღნიშნეს, რომ ყველაზე დიდი თანხა ინფრასტრუქტურული პროექტებს მოხმარდება. საინტერესოა, იმ პროექტებს რა ბედი ეწევა, რომელიც წინა მერის, ავთანდილ თალაკვაძის დროს დაიწყო და თქვენ კონკრეტულად რა პროექტების გახორციელებას გეგმავთ?
_ წინა მერის და მისი გუნდის მუშაობის შედეგად განისაზღვრა ის მიმდინარე პროცესები, რომლებიც დაწყებულია და სჭირდება ბოლომდე მიყვანა. როგორც აღვნიშნე, ჩვენი ერთ-ერთი პრიორიტეტია ინფრასტრუქტურა და ამ მიმართულებით გრძელდება მუშაობა.
_ ბატონო პაატა, ოზურგეთში, წლებია, დაანონსებულია ახალი სკოლების შენობების მშენებლობა, მაგრამ ამ ეტაპზე ამ მშენებლობების შესახებ კონკრეტულად ცნობილი არაფერია. ჰქონდათ თუ არა ამ საკითხებზე საუბარი განათლების სამინისტროსთან და როდის მოხდება დაანონსებული პროექტების გახორციელება?
_ ჩვენი ერთ-ერთი ძირითადი პრიორიტეტი არის ახალგაზრდები, განათლების და სასკოლო მიმართულება. დაგეგმელია საგანმანათლებლო დაწესებულებების რეაბილიტაცია, რაც ძალიან მალე დაიწყება და მალევე მოვა სრულყოფილებაში.
_ რა ეტაპზეა 2025 წლის თებერვლის სტიქიის დროს დაზარალებულებისთვის დახმარების პროგრამა?
_ სტიქიასთან დაკავშირებით მიმდინარეობს სამუშაო პროცესი და ძალიან მალე გვექნება კონკრეტული პასუხი.
_ ბატონო პაატა, არ შეგიძლიათ კონკრეტულად გვითხრათ, რა არის დაგეგმილი ამ კუთხით?
_ კონკრეტულად ამ და სხვა საკითხებზე მოგვიანებით აუცილებლად გავაკეთებ კომენტარს, როცა საბოლოო გადაწყვეტილება იქნება მიღებული.
_ 2026 წლის ბიუჯეტის დამტკიცებას ოპოზიცია არ ესწრებოდა (საუბარია „ლელოს“ და „გახარია საქართველოსთვის“ ორ წევრზე), არ ისმოდა კრიტიკული შეფასებები და ერთპარტიულ გარემოში მოხდა წლის მთავარი დოკუმენტის მიღება…
_ მთავარია, რომ ყველაფერი კარგად მიდის და არის მშვიდობა. მშვიდობა როცაა, ყველა სფერო, მათ შორის, ეკონომიკაც ვითარდება. ყველაფერი კეთდება იმისთვის, ამ ქვეყანაში იყოს მშვიდობა. ოპოზიცია ესწრებოდა (საუბარია ხელისუფლებასთან დაახლოებულ ოპოზიციაზე) სხდომას და 2026 წლის ბიუჯეტი დატკიცებულია.
ავტორი
