პარლამენტის საზოგადოებასთან ურთიერთობის სამსახურის ინფორმაციით, საქართველოს პარლამენტის თავმჯდომარე შალვა პაპუაშვილი პარლამენტების თავმჯდომარეთა მსოფლიო კონფერენციის (IPU) გენერალურ დებატებზე სიტყვით გამოვიდა.
„[უცხოური] დახმარების ინდუსტრია და ბიუროკრატია… ემსახურება მსოფლიო მშვიდობის დესტაბილიზაციას, უცხო ქვეყნებში ისეთი იდეების ხელშეწყობით, რომლებიც პირდაპირ ეწინააღმდეგება ქვეყნებს შიგნით და ქვეყნებს შორის ჰარმონიულ და სტაბილურ ურთიერთობებს” – ეს არის შეერთებული შტატების პრეზიდენტ დონალდ ტრამპის სიტყვები მისი აღმასრულებელი ბრძანებიდან „აშშ-ის საგარეო დახმარების გადაფასება”, რომელსაც ინაუგურაციის დღესვე მოაწერა ხელი.
ამ სიტყვების ყველაზე მნიშვნელოვანი ასპექტი ის არის, რომ თავისუფალი სამყაროს ლიდერმა ამხილა უცხოური დახმარების მავნე პრაქტიკა, რომელიც ხშირად პოლიტიკური მიზნით ჩარევისთვის გამოიყენება, თუმცა წარმოჩენილია, როგორც დახმარება დემოკრატიულ განვითარებაში”, – განაცხადა შალვა პაპუაშვილმა.
უფრო მეტიც, ხმის ამოღება და უცხოური დახმარების, განსაკუთრებით კი არასამთავრობო ორგანიზაციების დაფინანსების მორალურობასა და ეფექტიანობაში ეჭვის შეტანა ტაბუდ იქცა.
თუმცა, ამ კონცეფციების, პრინციპებისა და პროცესების დეტალურ შესწავლას ძალიან არასასიამოვნო დასკვნამდე მივყავართ: უცხოური დახმარებისა და სამოქალაქო საზოგადოების მანიპულირების გზით, დემოკრატიის არსი დაშორდა თავის თავდაპირველ განმარტებას – მმართველობა ხალხის მიერ შეიცვალა უცხოური მმართველობით. „დემოკრატიის” (ხალხის მმართველობა) ნაცვლად, შემოგვთავაზეს „ელიენოკრატია” (უცხოური მმართველობა), ანუ მმართველობა არა ხალხის ნების შესაბამისად, არამედ უცხოეთიდან დაწესებული დოგმებით, რომლებიც ლეგიტიმაციას უცხოეთიდანვე დაფინანსებული არასამთავრობო ორგანიზაციების კონსენსუსის საფუძველზე მოიპოვებენ”, – აღნიშნა საქართველოს პარლამენტის თავმჯდომარემ.
მისივე განმარტებით, მიუხედავად იმისა, რომ დემოკრატიის ყველაზე ძლიერი საყრდენია ნორმების, მოსაზრებებისა და არგუმენტების მრავალფეროვნება, ელიენოკრატიამ, ანუ უცხოურმა მმართველობამ იდეოლოგიურ დონეზე შეზღუდა ეს მრავალფეროვნება და უპირატესობა მიანიჭა საზოგადოების იმ ჯგუფებს, რომლებიც უცხოელების მიერ თავსმოხვეულ დღის წესრიგს და იდეოლოგიას იზიარებენ.
„თუმცა, ჩვენ კარგად ვიცით, რომ დემოკრატია ცხოვრების წესია და არა – იდეოლოგია. დემოკრატიული დახმარების საფარქვეშ პოლიტიკური გავლენის თავსმოხვევა დემოკრატიის არსს ეწინააღმდეგება. ხალხის მმართველობის ნაცვლად, ჩვენ ვიღებთ თვითდანიშნული უცხოელი დემოკრატიის მენტორების მმართველობას.
ის ფაქტი, რომ ნამდვილი სამოქალაქო საზოგადოება ყალბმა არასამთავრობო ორგანიზაციებმა შეცვალეს, პირდაპირი დარტყმაა დემოკრატიაზე”, – განაცხადა შალვა პაპუაშვილმა.მისივე თქმით, დემოკრატიისა და სამართლის უზენაესობის ინტერესები გვავალდებულებს, დავუბრუნდეთ წესებზე დაფუძნებული საერთაშორისო წესრიგის ფუნდამენტურ ნორმებს – სუვერენიტეტს, დემოკრატიასა და შიდა საქმეებში ჩაურევლობას.
„ჭარბმა უცხოურმა ჩარევამ გზა უნდა მისცეს ეროვნული სუვერენიტეტის პატივისცემას, ხოლო უცხოეთიდან დაფინანსებულმა არასამთავრობო ორგანიზაციებმა – ნამდვილ სამოქალაქო საზოგადოებას და, შესაბამისად, ნამდვილ დემოკრატიას”, – აღნიშნა საქართველოს პარლამენტის თავმჯდომარემ.
