ფრანგული მედიის ცნობით, პარიზის ღვთისმშობლის ტაძარში ხანძარი ლოკალიზებულია.
„ხანძარი ჩამქრალია. თვალს ვადევნებთ ცეცხლის კერების ნარჩენებს და ვაგრილებთ შენობის ცხელ ნაწილებს, მათ შორის კარკასს, რათა დავრწმუნდეთ, რომ ხანძარი არ განახლდება“, _ განაცხადა სახანზრო სამსახურის წარმომადგენელმა გაბრიელ პლიუსმა “ფიგაროსთან” საუბრისას.
მეხანძრეები, ტაძარში ცეცხლის ჩაქრობას ცხრა საათის განმავლობაში ცდილობდნენ.
ხანძრის შედეგად, მთლიანად დაიწვა ტაძრის ხის სახურავი, თუმცა, მეხანძრეებმა შეძლეს და ღვთისმშობლის ტაძრის სტრუქტურა სრული განადგურებისგან გადაარჩინეს.
ხანძარს გადაურჩა საკურთხეველი და მთავარი რელიკვიები _ მაცხოვრის ეკლის გვირგვინი და წმინდა ლუის ტუნიკა.
საფრანგეთის პრეზიდენტის ემანუელ მაკრონის განცხადებით, ტაძრის აღსადგენად საჭირო თანხის შესაგროვებლად საერთაშორისო კამპანია დაიწყება.
წინასწარი ინფორმაციით, ხანძრის გაჩენის მიზეზი სარეაბილიტაციო სამუშაოები გახდა. მომხდარზე გამოძიება დაუდევრობის შედეგად ზიანის მიყენების მუხლით არის აღძრული.
პარიზის ღვითსმშობლის ტაძარი XII-XIV საუკუნეებში აშენდა. გოთიკური საკათედრო ტაძარი საფრანგეთის მთავარი ღირსშესანიშნაობაა, რომელსაც ყოველწლიურად მილიონობით ტურისტი სტუმრობს. ის კუნძულ სიტეზე მდებარეობს, რომელსაც პარიზის ცენტრში მდინარე სენას ორი ტოტი ქმნის. ტაძარში ინახება ქრისტიანობის ერთ-ერთი მთავარი რელიკვია – ქრისტეს ეკლის გვირგვინი. ასევე, ტაძარში წარმოდგენილია მსოფლიოში ერთ-ერთი უდიდესი ორღანი.
