პარლამენტის საზოგადოებასთან ურთიერთობის დეპარტამენტის ინფორმაციით, პლენარულ სხდომაზე პირველი მოსმენით განიხილეს და 83 ხმით, ერთხმად დაუჭირეს მხარი „მოქალაქეთა პოლიტიკური გაერთიანებების შესახებ” და „საქართველოს საკონსტიტუციო სასამართლოს შესახებ” ორგანულ კანონებში შესატან ცვლილებებს.
“ფრაქცია „ქართული ოცნების” საკანონმდებლო ინიციატივა სხდომაზე იურიდიულ საკითხთა კომიტეტის თავმჯდომარის პირველმა მოადგილემ თორნიკე ჭეიშვილმა წარადგინა.
ცვლილების თანახმად, საკონსტიტუციო სასამართლოს შეეძლება აკრძალოს პარტია, რომლის გაცხადებული მიზანი ან/და საქმიანობის არსი (მათ შორის, პერსონალური ან/და შესაბამის საარჩევნო კომისიაში წარდგენილი პარტიული სიის შემადგენლობა) არსებითად გაიმეორებს ამავე მუხლის პირველი პუნქტის საფუძველზე საქართველოს საკონსტიტუციო სასამართლოს მიერ აკრძალული პარტიის გაცხადებულ მიზანს ან/და საქმიანობის არსს (მათ შორის, პერსონალურ შემადგენლობას).
„არაკონსტიტუციური პარტიის აკრძალვის ინსტიტუტი არის თავდაცვისუნარიანი დემოკრატიის კონცეფციის ერთ-ერთი მნიშვნელოვანი კომპონენტი. ამის გათვალისწინებით, საქართველოს კონსტიტუციის 23-ე და მე-60 მუხლებით არის განსაზღვრული კონკრეტული სტანდარტები, შეზღუდვები, შესაბამისი პროცედურები, რაც შეიძლება გახდეს პარტიის აკრძალვის საფუძველი. თუმცა, ამავდროულად, მნიშვნელოვანია, რომ კანონმდებლობა ითვალისწინებდეს ასევე, ეფექტიან სამართლებრივ მექანიზმებს არაკონსტიტუციური პარტიების აკრძალვის შემდგომ სხვა სახელწოდების, თუ სხვა შეფუთვის საფარქვეშ მათი პოლიტიკური რეინკარნაციის პრევენციის მიზნით”, – განაცხადა მომხსენებელმა.
მისი თქმით, მნიშვნელოვანია, კანონმდებლობაში მკაფიოდ გაიწეროს და დაზუსტდეს რეგულაციები, რომლებიც პარტიის აკრძალვის შესახებ საკონსტიტუციო სასამართლოს გადაწყვეტილების ეფექტს კიდევ უფრო სრულფასოვან მასშტაბს შესძენს და ფიქციური აკრძალული პარტიების ე.წ. მემკვიდრე პარტიების შექმნითა და საქმიანობით საკონსტიტუციო სასამართლოს გადაწყვეტილების დაძლევის შესაძლებლობას დააზღვევს.
თორნიკე ჭეიშვილის განმარტებით, „მოქალაქეთა პოლიტიკური გაერთიანებების” შესახებ საქართველოს ორგანული კანონის 36-ე მუხლს ემატება მეორე პუნქტი, რომლის თანახმადაც, საკონსტიტუციო სასამართლოს შეეძლება აკრძალოს პარტია იმ შემთხვევაში, თუ მისი გაცხადებული მიზანი ან/და საქმიანობის არსი მათ შორის, პერსონალური შემადგენლობა საარჩევნო კომისიაში წარდგენილი პარტიული სიის შემადგენლობა არსებითად იმეორებს აკრძალული პარტიის მიზნებსა და საქმიანობის არსს. ამის პარალელურად, „საქართველოს საკონსტიტუციო სასამართლოს შესახებ” ორგანულ კანონში ზუსტდება პოლიტიკური პარტიის საქმიანობის კონსტიტუციურობის განხილვისა და შესაბამისი გადაწყვეტილების გამოტანის შემჭიდროებული ვადები”,_ წერია პარლამენტის საზოგადოებასთან ურთიერთობის დეპარტამენტის ინფორმაციაში.
