პარლამენტთან მიმდინარე აქციაზე რამდენიმე მოქალაქე დააკავეს. ადგილზე მყოფების ინფორმაციით, ისინი სტუდენტები არიან. ამ დროისთვის არსებული ინფორმაციით საუბარია სამ ადამიანზე.
სოციალურ ქსელში გავრცელებულ კადრებში ჩანს, რომ პოლიციელები ორ ადამიანს ძალის გამოყენებით სვამენ მანქანაში და მიჰყავთ. ადგილზე შეკრებილები პოლიციელებს ეკითხებოდნენ, რა გახდა მათი დაკავების საფუძველი. ერთმა ახალგაზრდამ პოლიციელების წინ ტაშის დაკვრა დაიწყო. ამის შემდეგ, რამდენიმე პოლიციელმა ისიც ძალის გამოყენებით ჩასვა მანქანაში და წაიყვანა.
როგორც თვითმხილველები ჰყვებიან, საქართველოს უნივერსიტეტის სტუდენტებმა, რომლებიც უკვე მე-5 დღეა პარლამენტთან ათენებენ ღამეს, ადგილზე სკამები მიიტანეს. პოლიციელებმა მათ უთხრეს, რომ სკამები არ გამოეყენებინათ და მიუთითეს, რომ ისინი “საფრთხის შემცველია”. სტუდენტებმა სკამები ტროტუარზე დადგეს და დასხდნენ. სწორედ ამას მოჰყვა მათი დაკავება.
